1 Omambo nga Moses onga hungira kOvaisrael avehe munda mbwina na Jordan mokuti onguza, morutjandja ndwa ri ouhunga na Sofa pokati kooParan na Tofel na Laban na Haserot na Di-Sahab. 2 Ondjira, ndji za kOhoreb okuhungama ozondundu za Seir nga kOkades-Barnea i kayendwa oure womayuva omurongo na rimwe. 3 Nu meyuva etenga romueze outjamurongo na umwe wombura oitjamirongo vine, tji va zire mOengipte, Moses wa raera kOvaisrael oviṋa avihe Muhona mbya rakizire ku ye kutja e ve raere. 4 Ihi tja tjitirwe Moses tja za nokuhavera Sihon, ombara yOvaamori, ngwa turire mOhesbon, na Og, ombara ya Basan, ngwa turire mOastarot na Edrei. 5 Moses wa uta okumangururira Ovaisrael omatwako wa Ndjambi, munda mbwina na Jordan, mehi ra Moab, na tja:
6 “Muhona, Ndjambi wetu, wa hungirire ku eṱe kondundu Sinai na tja: ‘Eṋe mwa kara orure tjinene pondundu ndji. 7 Sekameye mu yende kehi rozondundu rOvaamori na kovirongo avihe vyopopezu, okutja okorutjandja rwa Jordan, na kehi rozondundu, na mehi eparanga, na kehi rokeyuva kokumuho, na komukuro wOmuronga Mediterania, twendeye kehi rOvakanaan na kozondundu za Libanon nga konḓonḓu onene Eufrat. 8 Tareye, ehi arihe ndi ami, Muhona, ondi mba kwizikira okuriyandja kooiho mukururume ooAbraham na Isak na Jakob na kozondekurona zawo. Twendeye mu kerikambure.’ ”
Moses ma toorora ovapangure
(Eks 18:13-27)9 “Moruveze ndo ami mbe mu raera nai: ‘Ami erike himee yenene okutjinda omauzeu weṋu. 10 Muhona, Ndjambi weṋu, we mu takavarisa; nu tareye, ndinondi mu ṱeki pouingi wozonyose keyuru. 11 Muhona, Ndjambi wooiho mukururume, nga takavarise otjivaro tjeṋu tjanambano potumayovi omurongo, nu nge mu sere ondaya punga e mu kwizikira! 12 Nu ami erike me yenene vi okutjinda ouzeu, nokupangura oviposa vyeṋu? 13 Toororeye ovarumendu ozonongo novanazondunge novatjiwe momihoko vyeṋu kutja mbi ve zike ve rire ovanane vyeṋu.’ ” 14 Nu eṋe opu mwe ndji zirira namu tja: “Otja pu wa hee pe ri nawa. 15 Otji mba toora ovanane vomihoko vyeṋu, ovarumendu ozonongo novatjiwe mbu mwa toorora, ne ve ziki kutja ve mu hongorere otja ovanane veyovi novesere novomirongo vitano novomurongo umwe. Wina mba zika ovatjevere varwe vomihoko vyeṋu.
16 “Nu moruveze ndo ami mba rakiza kovapangure veṋu e tja nai: ‘Purateneye koviposa vyovandu veṋu, nu mu pangure osemba pokati kovandu, kutja ovandu veṋu oveni poo omundu wozonganda ngu tura puna wo. 17 Amu tjiti ombangu mombanguriro; pangureye omundu auhe nawa nandarire kutja ouṋe. Amu tira nu amu nyengura omundu karive, orondu ondyero aihe ndji mamu tjiti mombanguriro ma i zu ku Ndjambi. Nungwari tji pe notjiposa otjizeu ku eṋe, tji eteye ku ami, nami me tji pangura.’ 18 Moruveze ndo ami otji mbe mu rakizire avihe, mbi mamu sokutjita.”
Ozohoze maze hindwa okuza mOkades-Barnea
(Num 13:1-33)19 “Twa tjita otja Muhona, Ndjambi wetu, pe tu rakizire. Twa womboroka okuza kOhoreb natu tuurunga okuti okunene nokutirise onguza ku mwa muna mondjira, tjiyamu i kozondundu zOvaamori. Neṱe twa kavaza kOkades-Barnea. 20 Ami mbe mu raera nai: ‘Eṋe nambano mwe ya nga kehi rozondundu rOvaamori, Muhona, Ndjambi wetu, ndi me tu pe. 21 Tara, Muhona, Ndjambi woye, we ku pe ehi ndi; kayende u kerikambure ri rire oroye, otja Muhona, Ndjambi wooiho mukururume, pe ku raera; o tira nu o mumapara.’
22 “Neṋe amuhe otji mwe ya ku ami namu tja: ‘Ngatu hinde ovarumendu tjiva komurungu wetu ve kahore ehi ndi nu ve kotoke okuyekutukorera ondjira, ndji matu sokutwara, nokutja ovingehuro mbi ri ngo.’
23 “Omambo nga tjinga aya tjata ku ami otji mba toorora ovarumendu omurongo na vevari, umwe momuhoko auhe. 24 Nowo arire tji va i hakahana kehi rozondundu ave kavaza korutjandja rwa Eskol, nave kahora ehi ndo. 25 Va nikora ovihape tjiva vyokuti ngo, ave vi eterere ku eṱe, nave tu serekarerere amave tja: ‘Ehi ndo, Muhona, Ndjambi wetu, ndi me tu pe, oro ewa.’
26 “Nungwari eṋe kamu vangere okuyenda, mwa pirukira omarakiza wa Muhona, Ndjambi weṋu. 27 Mwa unaunina mozondanda zeṋu namu tja: ‘Muhona tjinga e tu tonda, eye we tu pitisa mehi ra Engipte, ne tu twa mouvara wOvaamori kutja ve tu nyone. 28 Hapo, matu i ku tjiṋe? Ovakwetu ve tu mumaparisa tji va tja ovandu mbo ovanene motutu novare pu eṱe; novihuro vyawo ovinene, nu vi notumbo tu twa tongama tjinene. Neṱe wina twa muna ko Ovarenaka.’
29 “Nu ami mba tjere ku eṋe: ‘Amu mumapara, nu amu ve tira. 30 Muhona, Ndjambi weṋu, ngu me mu hongorere, eye me mu rwire otja tja tjitire momeho weṋu mOengipte, 31 na mokuti onguza. Ove wa muna eye tje ku tjinda oure wondjira aihe ndji wa kayenda, nga tje ku eta nguno otja ihe tji ma tjindi omuna we.’ 32 Nungwari nandi mba tja nao, eṋe kamu kamburire mu Muhona, Ndjambi weṋu, 33 ngwe mu hongorera mondjira okumupahera poṋa pu mamu yenene okuzika ozondanda zeṋu. Eye we mu hongorera ouṱuku notjikamba tjomuriro okumuraisira ondjira; nu mutenya we mu hongorera notjikamba tji tja zorera.”
Muhona ma vere Ovaisrael
(Num 14:20-45)34 “Nu Muhona tja zuva omaunaunino weṋu wa ṱomazenge tjinene, na yana a tja: 35 ‘Kape na umwe womuhoko omuvi mbwi ngu ma kamuna ehi ewa ndi, ndi mba kwizikira ooiho mukururume noruyano okuvepa. 36 Posi ya Kaleb, omuzandu wa Jefune, ongu ma kahita mu ro. Eye wa kara omuṱakame ku ami, neye nozondekurona ze opu meve pere ehi ndi eye nda kahora.’ 37 Wina Muhona wa pindikira ami mena reṋu na tja: ‘Nangarire ove, Moses, ko nakukahita mehi ndo. 38 Nungwari Josua, omuzandu wa Nun, omukarere woye, ongu ma hiti mehi ndo; mu zeuparisa, orondu eye ongu ma hongorere Ovaisrael okukakambura ehi ndo ri rire ouini wawo.
39 “ ‘Nounatje weṋu tjinga mbu hiya punga ozondunge, nu mbu mamu tja mau huurwa, owo ombu mau hiti mehi ndo nokurikambura ri rire ouini wawo. 40 Nungwari eṋe, yarukeye mu yende mokuti onguza nondjira ndja hungama Omuronga wOtuu.’
41 “Neṋe mwe ndji zira amu tja: ‘Eṱe twa katuka komurungu wa Muhona; nungwari nambano matu i okukarwa otja Muhona, Ndjambi wetu, pe tu rakiza.’ Nu auhe weṋu otje ripangaṋa novirwise ne ripura oupupu okuyenda kehi rozondundu.
42 “Nungwari Muhona wa tjere nai ku ami: ‘Ve ronga kutja ave ha karwa, ovanavita na wo tjaa mave ve ramba, tjinga ambi he ri puna eṋe.’ 43 Ami mbe mu raera otja Muhona pa heya, nungwari eṋe kamu puratenene ko. Mwa pirukira omarakiza wa Muhona, nu mokuritongamisa kweṋu arire tji mwa i kehi rozondundu. 44 Nu Ovaamori, mba tura mozondundu nḓo ve mu tjakanena nave mu ramba tjimuna ehapu rozonyutji. Owo ve mu ramba nave kemuhaverera mOhorma mehi ra Seir. 45 Neṋe mwa kotoka namu ririre komurungu wa Muhona, nungwari eye ka puratenene ko kondjuriro yeṋu nu ke mu zuvire ko. 46 Opu mwa karera orure nai mOkades.
© Herero Revision Bible © Bible Society in Namibia, 2021.
