Muhona ma yandja ondjo kOvaisrael.
1 Muhona ma yandja ondjo kotjiwaṋa tji tja tura mehi ndi. Purateneye, Vaisrael, kombuze eye ndji ma hungire: “Kamu tji nouṱakame norusuvero mehi ndi, notjiwaṋa katji tjiwa kutja owami Ndjambi. 2 Otjo tji tjita omakwizikiro, tjazumba atji ye teya; otjo tji kora ovizeze, tji zepa, tji vaka nu atji katuka otukupo. Ozondjito zoutwe otji ze takavara, nomazepero ye ryamena ko. 3 Komuhingo mbwi ehi mari kukuta, nu avihe mbya tura mu ro mavi koka. Ovipuka avihe nozonḓera na wina ozohi maze koka.”
Muhona ma yandja ondjo kovapristeri
4 Muhona ma tja nai: “Ape ningi umwe ngu ma yandja ondjo kovandu poo ngu meve tena nomambo, ami me yandja ondjo ku eṋe ovapristeri. 5 Eṋe mu putara ouṱuku nomutenya, novaprofete wina kave tjiti nawa pu eṋe. Ami me kayandeka nyoko Israel. 6 Otjiwaṋa tjandje tja yanda, orondu otjo katji ndji tjiwa. Eṋe ovapristeri mwa panḓa okutjiwa ami, nu mwa imbirahi omahongero wandje, nami otji me mu imbirahi, nu me zembi ovanatje veṋu okurira ovapristeri vandje.
7 “Eṋe ovapristeri punga amu takavarera ko opunga amu tjitira ko ourunde komurungu wandje, nami otji me tjitukisa ondengero yeṋu okurira ohoṋi. 8 Eṋe mu hupisiwa i ombunguhiro yokuisapo ourunde wotjiwaṋa tjandje, neṋe otji mu vanga kutja ve tjitire ko ourunde komurungu. 9 Eṋe mamu munu omberero tjingeyo ndji yotjiwaṋa! Ami me mu vere e mu sutisire ouvi mbu mu tjita. 10 Eṋe mamu ri orukondwa rweṋu rwozombunguhiro, nungwari kamu nokukuta. Mamu rikotamene koomukuru votukwato, nungwari tjandje mamu kara nokuhinovanatje, orondu eṋe mwa humburuka na ami nu mwa kongorera oomukuru varwe.”
Muhona ma nakaura omerikotameneno kovisenginina
11 Muhona ma tja nai: “Omavinu omakuru nomape ye yeka otjiwaṋa tjandje ozondunge! 12 Owo ve ningira ondunge kotjihenḓe! Okati oku ke ve raera imbi mbi mave vanga okutjiwa! Owo ve ndji esa. Otja omukazendu punga e rira omukorondu, owo opunga ave riyandja oveni koomukuru varwe. 13 Owo ve punguhira ozombunguhiro zovinamuinyo kozondundu, nu ve twimisira ovyomoro omuwa kozondunda kehi yomiti omire omiparanga, omizire vyavyo tjinga avi ri omiwa tjinene.
“Komuhingo mbwi ovakazona veṋu otji ve rira ovakorondu, novakazona ovakwe veṋu ave katuka otukupo. 14 Nungwari ami hi nokuveverera ozondjito ozombi nḓa, orondu eṋe ovapristeri oveni mu tjitira oukorondu mozondjuwo ozonḓere, nu mu punguha ozombunguhiro koomukuru vovisenginina puna ovakorondu. Otja omuano punga amau hee ‘otjiwaṋa tji tji hi nozondunge matji yandekwa’.
15 “Nandarire kutja eṋe, tjiwaṋa tja Israel, oweṋe ovehinouṱakame ku ami, otjiwaṋa tja Juda atji ririre ko otjinandjo motjiṋa tjingetjo hi. Amu rikotamenene ko mOgilgal na mObet-Awen, nu amu tjitire mo omakwizikiro mena ra Muhona omunamuinyo. 16 Ovaisrael ovirangaranga tjimuna ousinokambe. Ami me sora vi okuveparura otja ozondjona momaryo? 17 Ovaisrael va wana noviserekarera vyovisenginina. Ve eseye ve tware ondjira yawo oveni. 18 Tji va zu nokunwa omavinu omengi owo ve yorokera oukorondu wawo, amave zeri ohoṋi pondjozikiro. 19 Owo mave twarewa aayo mave hingwa i otjivepo, nu mave ṱohoṋi mena rozombunguhiro zawo zoomukuru vovisenginina.
© Herero Revision Bible © Bible Society in Namibia, 2021.
