Jeremia nomuprofete Hananja
1 Mombura tjingeyo ndjo, momueze outjatano wombura oitjaine youhona wa Sidkija mOjuda, omuprofete Hananja, omuzandu wa Asur, ngwa zire kotjihuro Gibeon, wa hungira ku ami mondjuwo ya Muhona. Eye we ndji raerera povapristeri na potjiwaṋa atjihe, 2 kutja Muhona Omunamasaaehe, Ndjambi wa Israel, wa tjere nai: “Ami mba teya ouvara wombara ya Babilon. 3 Moure wozombura mbari ami me kotora oviungurise avihe vyondjuwo ya Muhona kotjirongo hi ombara Nebukadnesar mbya twarere kObabilon. 4 Wina me kotora ombara ya Juda, Jekonia, omuzandu wa Jojakim, puna otjiwaṋa atjihe tja Juda tji tja twarewa mouhuura kObabilon. Ii, ami me teya ouvara wombara ya Babilon. Ami, ngu mbi ri Muhona, owami ngu mba hungire.”
5 Ami mba hungira nai ku Hananja momurungu wovapristeri notjiwaṋa atjihe tji tja woronganena mondjuwo ya Muhona: 6 “Ngape tjitwe nao! Ami me undju kutja Muhona ma tjiti nao! Ami, tjiri, me undju kutja eye ma yenenisa omaukiro woye, nokutja Muhona ma kotora oviungurise avihe vyondjuwo ya Muhona novahuurwa avehe okuza kObabilon. 7 Nungwari puratena ku imbi mbi me hungire kove na kotjiwaṋa atjihe. 8 Ovaprofete, mba ri po rukuru komurungu wandje na eṋe va ukire kutja ovita nondjara nomutjise omuzeu mavi ya koviwaṋa ovingi na komauhona omanamasa. 9 Nungwari omuprofete ngu zuvarisa ohange ma sora okutjiukwa kutja omuprofete ngwa tumwa i Muhona tjiri, indu inga omazuvarisiro womuprofete ngo tji ya yenenisiwa.”
10 Tjazumba Hananja arire tja isa ko otjiyoke kosengo yandje ne tji teya, 11 na tja nai momurungu wotjiwaṋa atjihe: “Muhona wa tja komuhingo mbwi eye otji ma teya otjiyoke hi Nebukadnesar, ombara ya Babilon, tja twa kozosengo zoviwaṋa avihe; notjiṋa hi eye me tji tjiti moure wozombura mbari.” Ami, Jeremia, arire tji mba i.
12 Hananja tja za nokutjita nai, Muhona we ndji raera 13 kutja mbi katje nai ku Hananja: “Muhona wa tja ove wa teya otjiyoke tjomuti, nungwari moruveze rwatjo Muhona ma yarura po otjiyoke tjotjitenda. 14 Muhona Omunamasaaehe, Ndjambi wa Israel, wa tja eye ma twako otjiyoke tjotjitenda koviwaṋa avihe mbi, novyo mavi karere Nebukadnesar, ombara ya Babilon; nandarire ovipuka vyokuti wina mavi mu karere.”
15 Ami arire tji mba raere Hananja e tja: “Puratena, Hananja! Muhona ke ku hindire, nove mo pukisa ovandu mba kutja ve kambure movizeze. 16 Nu Muhona omuini otji ma tja, eye me ku isa po; ombura ndji ngunda ai hiya yanda mo koka, orondu ove wa raera otjiwaṋa kutja tji pirukire Muhona.”
17 Nu Hananja wa koka momueze outjahambombari wombura ndjo.
© Herero Revision Bible © Bible Society in Namibia, 2021.
