EHUNGI RA DANIEL NOMAPANGA WE
Ovarumendu omitanda pondjuwo youhona wa Nebukadnesar
1 Mombura oitjatatu youhona wa Jojakim, ombara ya Juda, Nebukadnesar, ombara ya Babilon, otja rwisa Jerusalem ne tji kovere. 2 Muhona wa yandja ombara Jojakim momake wa Nebukadnesar, na yandjere Nebukadnesar kutja a huure ovihuze tjiva vyondjuwo ya Muhona. Eye wa twara ovahuurwa tjiva kondjuwo yoomukuru ve vovisenginina mObabilon, na katwa ovihuze mbya huura momatuwo womapwikiro wondjuwo ndji.
3 Ombara Nebukadnesar wa rakiza Aspenas, omuhongore we otjiuru, kutja a toorore mokati kovahuurwa Ovaisrael ovarumendu tjiva omitanda veṱunḓu rouhona novomaṱunḓu wovakwatwa vanawa. 4 Owo va sere okurira ovawa ovamanise novanazondunge nu mba hongwa nawa, mbe hakahana okurihonga nu mbe hi novipo kotutu kutja ve yenene okukarera mondjuwo youhona. Aspenas wa sere okuvehonga okuresa nokutjanga eraka rOtjibabilon. 5 Ombara wina ya rakiza kutja eyuva arihe owo ve pewe ovikurya nomavinu tjingevyo otja imbi vyovandu vondjuwo youhona. Kombunda yozombura ndatu zomahongero nga owo ve sokukurama komurungu wombara. 6 Mokati kovarumendu omitanda, mba toororwa, mwa ri mba: ODaniel na Hananja na Misael na Asarja, avehe mba va ri ovomuhoko wa Juda. 7 Omuhongore otjiuru we ve ruka omana omape nga: Daniel wa rukwa Beltsasar, Hananja wa rukwa Sadrak, Misael wa rukwa Mesak, nu Asarja wa rukwa Abed-Nego.
8 Daniel we rimana kutja eye ke nokurizunḓa omuini mokurya ovikurya na mokunwa omavinu wondjuwo youhona, eye otja ningira Aspenas kutja e mu vatere. 9 Nu Ndjambi wa tjita kutja Aspenas a ṱire Daniel ondjenda. 10 Nungwari Aspenas aa tira ombara, nopa tjera nai ku Daniel: “Ombara ya tye imbi mbi mamu ri na imbi mbi mamu nu, nu tji mu hi nokumunika nawa pu pe ṱeki omitanda omikweṋu, mape ya ai ndji zepa.”
11 Daniel otja ya komutjevere ngwa zikirwe i Aspenas okutjevera Daniel nomapanga we yetatu, 12 na katja nai komutjevere ngwi: “Tu rora oure womayuva omurongo. Tu pa ozombowa tu rye, nomeva tu nwe, 13 tjazumba u tu sasaneke novarumendu omitanda mbe rya ovikurya vyondjuwo youhona, nu u tye kutja matu munika vi.”
14 Eye wa itavera kutja owo ve rorwe oure womayuva omurongo. 15 Omayuva nga tji ya kapita, owo otjaave munika ouveruke novanamasa pu imba avehe mbaa ve ri ovikurya vyombara. 16 Okuza ku nai omutjevere otje ve yandjera okurya ozombowa moruveze rwovikurya mbi ombara mbi ya rakiza kutja ve pewe.
17 Ndjambi wa yandja ondjiviro nozondunge zokukonḓonona omatjangwa nozokuripura ounongo kovarumendu mba vane omitanda. Eye wina wa yandja ozondunge zokuhandjaura ovirimunikise noturoto ku Daniel.
18 Kombunda yozombura ndatu nḓa tuwa po i ombara, Aspenas otja twara ovarumendu avehe omitanda ku Nebukadnesar. 19 Ombara Nebukadnesar wa hungira na imba avehe, nu Daniel na Hananja na Misael na Asarja ve mu pa onyuṋe tjinene povakwao avehe varwe. Owo otji va rira ovakarere vondjuwo yombara. 20 Motjiṋa atjihe tjounongo nondjiviro ombara mbyaa i ve pura, ovarumendu vane mba aave tjiwa okuyezira povikando omurongo okukapita ozombuke nozondjai nḓa ri mouhona wayo auhe. 21 Daniel wa kara pondjuwo youhona nga Kirus, ombara ya Persie, tja havera ehi ra Babilon.
© Herero Revision Bible © Bible Society in Namibia, 2021.
