Ongumbiro yomutanda ngu ri moumba
Ongumbiro yomunandjenda ngwa hihamwa omutima nu ngu ma raisa omerikendero we komurungu wa Muhona.
1 Puratena kongumbiro yandje, Muhona,
nu u zuvire ondjuriro yandje!
2 Tji mbi ri moumba,
o horeke ko omurungu woye ku ami!
Puratena ku ami, nu u hakahane
okundjizuvira tji me ku kove.
3 Omayuva womuinyo wandje maye
zengi tjimuna omuise;
orutu rwandje maru pi tjimuna ezuko.
4 Ami mba tonwa notji mba kukuta
tjimuna ehozu;
nu hi nonḓero okurya ovikurya.
5 Mena romatjemeno wandje
omanene ami mba rira omaṱupa porwe.
6 Ami mba sana kondera yokuti
onguza na kotjisiwi momatundu.
7 Mbi rara katumba; mba sana konḓera,
ndji kara aiyerike komututu wondjuwo.
8 Ovanavita na ami ve uhara amave
ndji nyekerere;
nu imba mbe ndji hemba
ena randje va isa po etuka.
9-10 Mena romazenge nomapindi woye
ami mbi rya omutwe aayo ovikurya,
nomahoze wandje ya
hovekwa nomanuwa wandje.
Ove we ndji toora no ndji nakaura.
11 Omayuva womuinyo wandje ye ri
otja omuzire womapeta;
ami mbi ri otja ehozu nda kukuta.
12 Nungwari ove, Muhona,
u honapara aruhe nga aruhe;
ena roye ri zemburukwa okuza
komuhoko nga komuhoko.
13 Ove mo sekama no tjariparere Sion;
oruveze rwokutjariparera tjo tjinga arwe ya;
orwo ondu ri oruveze orusemba.
14 Ovakarere voye ve tji suvera,
nandarire kutja otjo tja hahaurwa;
owo ve ṱondjenda na tjo,
nandarire kutja otjo tja rira otjitambatundu.
15 Oviwaṋa mavi tira ena ra Muhona;
nozombara azehe zouye maze tira ouvara we.
16 Orondu Muhona ma tungurura Sion,
nu e riraisa momasa we.
17 Eye ma zuvire otjiwaṋa
tje tji tja imbirahiwa,
nu ma puratene kongumbiro yatjo.
18 Tjangera ozondekurona zokombunda
imbi Muhona mbya tjita,
kokutja ihi otjiwaṋa tji
tji hiya kwatwa tji mu tange.
19 Muhona wa tara pehi okuza
kotjouyapuke tje kombanda,
eye wa tara kombanda
yehi okuza meyuru,
20 kokutja a zuve ondjemeno
yovahuurwa nokukutura imba
mba pangurwa kokuṱa.
21 Ena re otji mari zuvarisiwa mOsion,
neye ma tangwa mOjerusalem
22 oviwaṋa nomauhona tji mavi
worongana okurikotamena ku Muhona.
23 Muhona we ndji ngundiparisa
ngunda ambi ri omutanda;
nomayuva womuinyo wandje
we ye susuparisa.
24 Ndjambi, o ndji twara nambano,
ngunda ambi hiya kurupa.
Muhona, ove u kara po aruhe nga aruhe.
25 Rukuru ove wa utire ehi
nu wa utire omayuru nomake woye omuini.
26 Eyuru nehi mavi yanda,
nungwari ove mo karerere po;
owo maye kurupa otja ozombanda.
Ove mo ye imbirahi otja ozombanda ozonguru,
nowo maye zengi.
27 Nungwari ove aruhe mo kara tjingeye ove,
nozombura zoye kamaaze yanda ko.
28 Ovanatje vetu mave tura mehi nokuhinooma,
nu mondjamo yoye ozondekurona
zawo maze kara morusuvo.
© Herero Revision Bible © Bible Society in Namibia, 2021.
