Ombongo ya Ndjambi
1 Ami otja ngu mbi ri omutarere wombongo me riyarikaṋa kovatarere wombongo mokati keṋu. Owami omuhongonone womahihamisiro wa Kristus, nu wina me kara norupa mondjozikiro, ndji mai kamunika. Ami me mu ningire kutja 2 mu rire ovarise ovasemba worupanda Ndjambi ndwa yandja ku eṋe nu mu ru ṱakamise nombango yeṋu oveni otja Ndjambi punga ama vanga; nungwari amu he ru ṱakamisa otja mbu mwa ṋiṋikizirwa ko noutwe. Amu ungura oviungura vyeṋu motjimbe tjotjimariva, nungwari kareye nonḓero aihe motjiungura tja Ndjambi. 3 Nu wina amu roro okuhonaparera imba mbu mwa pewa okuṱakamisa, nungwari rireye otjihorera kuwo. 4 NOmurise omunene tje ya, eṋe mamu pewa oruzenga rondoṋeno rongeṋangeṋeno ongarerere.
5 Nu momuhingo tjingewo, eṋe mitanda, riwiseye kehi yovarumendu ovanene. Eṋe amuhe risusupariseye, nu aruhe mu rirongerere okukarerasana. Orondu omatjangwa maye tja: “Ndjambi u pirukira overitongamise, nungwari imba overisusuparise e ve ṱire otjari.” 6 Notji mamu sokurisusuparisa kehi yeke enamsa ra Ndjambi, kokutja eye e mu tongamise moruveze rwe oruwa. 7 Omerikendero weṋu aehe yumbeye kombanda ye, eye tjinga e mu pa imbi mbi mwa hepa.
8 Kareye nomeritjaerero nu mu kare katumba! Omunavita na eṋe, ingwi Satan, u ryanga otja ongeyama, ndji mai tye ovimboro amai paha ingwi ngu mai vanga okurya. 9 Zikameye mongamburiro yeṋu nu mu mu pirukire. Amu zembi kutja mouye auhe ovakambure ovakweṋu ve tjinda omahihamisiro tjingewo. 10 Nungwari tji mwa zu nokuhihamisiwa oruveze orusupi, Ndjambi omuini ngu notjari atjihe, ngwe mu isanena ondjozikiro ye yaaruhe mu Kristus, eye me mu yarura koupe, ne mu zeuparisa, ne mu pe omasa, ne mu zikamisa. 11 Ndjambi, u nomasa aruhe nga ko nga aruhe! Amen.
Ozombinika
12 Ami mba tjanga orutuu orusupi ndwi nombatero ya Silvanus, ngu mbi vara otja omukambure omukwetu omuṱakame. Ami mba vanga okumuyanḓiparisa nokuhongonona kutja otji tji ri otjari tjatjiri tja Ndjambi. Zikameye mu tjo.
13 Ombongo ongweṋu mObabilon, wina ndja toororwa i Ndjambi, mai mu minike, nomuatje wandje Markus wina me mu minike. 14 Minikasaneye norusuvero roukriste. Ohange ngai kare na eṋe amuhe mbu mu ri ova Kristus.
© Herero Revision Bible © Bible Society in Namibia, 2021.
