Deuteronomium 19 - Herero Revision Bible (HRR)

Ovihuro vyomaundiro

1 “Muhona, Ndjambi woye, tja zu nokunyona oviwaṋa vyehi eye ndi me ku pe, nove o vi ramba mouini wavyo, no tura movihuro na mozondjuwo zavyo, 2 ritoororera ovihuro vitatu mehi ndi. 3 Ehi Muhona, Ndjambi woye, ndi me ku pe, ri rire ouini woye, ri haṋa motukondwa tutatu, nu morukondwa aruhe ngamu kare otjihuro tjimwe. Nu ondjira, ndji yenda ngo, i koronga nawa kutja auhe ngwa zepa omundu, a sore okutaurira ngo. 4 Tji pe nomundu ngwa zeperere omukwao ngu ha ri novita na ye, eye ma yenene okutaurira ku tjimwe tjovihuro mbyo, na kayamwa. 5 Rumwe mape kara nai: Ovarumendu vevari mave i pamwe mokuti okukaka ozonguṋe, nu umwe ngunda ama ke omuti, ekuva ari homoka komupiṋe nari zepa omukwao, eye nga taurire ku tjimwe tjovihuro mbi, a kayamwe. 6 Ape ha yandjerwa omunangore kutja momazenge we a tezere ingwi omuzepe, nokutja mena roure wondjira e mu vaze, nu e mu zepe; orondu omurumendu ngwi ka pwire pokuṱa, tjinga e ha ri omunavita nomukwao rukuru. 7 Opu me ku rakizire ame tja nai: Ritoororera ovihuro vitatu.

8 “Nu Muhona, Ndjambi woye, tji ma parangisa ehi roye otja tja kwizikira ooiho mukururume noruyano, ne ku pe indi ehi arihe nda kwizikire, 9 ritoororera ovihuro vitatu vyarwe okuviweza ku imbi ovitenga. Eye me ku pe ehi ndi, tji mo ṱakamisa nawa omatwako nga aehe ngu me ku rakiza ndinondi, amo suvere Muhona, Ndjambi woye, nokuryanga aruhe mozondjira ze. 10 Tjita nai kutja o ha tura ondjo yokuzepa omundu omuhinandjo mehi ra Muhona, Ndjambi woye, ndi me ku pe ri rire otjirumatwa tjoye.

11 “Nungwari tji pe nomundu ngu novita nomukwao, ne mu honine nokumutjendjereka nokumutona nga tja koka, nu tjazumba a taurire kotjihuro tjimwe tjaimbi, 12 ovanane votjihuro tjawo ngave hinde ovandu kutja a kakamburwe nu a yandjewe komunangore, kutja a ṱe. 13 O mu ṱire ondjenda. Isa mo omatirahiro wombinḓu ohinandjo mOisrael, kutja u kare nombwiro.

Omiruko vyehi nomahongonona woposyo

14 “O rundurura omuruko wopopezu na ove, ooiho mukururume mbu va twire po kotjirumatwa tjoye mehi Muhona, Ndjambi woye, ndi me ku pe ri rire ouini woye.

15 “Omuhongonone umwe ke nokuyenena okuhongonona ondataiziro poo ondjo ngamwa aihe yomundu; omahongonona wovandu vevari poo vetatu ongu maye raisa kutja omundu omunandjo poo omuhinandjo. 16 Omundu umwe tji ma kondjo okuhihamisa omukwao, ame mu kuminine posyo kutja u nondjo, 17 ovarumendu mba vevari mbe notjiposa, ngave kakurame komurungu wa Muhona, komurungu wovapristeri novapangure mbu mave kara mbo momayuva ngo. 18 Novapangure ngave konḓonone otjiposa hi nawa; nomundu tja kuminine omukwao mombanguriro, 19 mamu sokutjita ku ye tjimuna indu eye omuini tja vanga okutjita komukwao. Komuhingo mbwi otji mamu isa mo ouvi mokati keṋu. 20 Nu auhe warwe ngu ma zuu ihi tji tja tjitwa, ma tira na ha tjiti otjiṋa otjivi tji tja sana ngo rukwao. 21 O ṱotjari; indji omberero mai rire omuinyo komuinyo, eho keho, eyo keyo, eke keke, nombaze kombaze.