Rirongereye omakotokero wa Muhona
1 Nungwari indwi oruveze oviṋa mbi ndu mavi tjitwa, vakwetu, kahepero okumutjangera. 2 Orondu eṋe oveni mamu tjiwa kutja Eyuva ra Muhona mari ya otja erunga mouṱuku. 3 Ovandu tji mave tja: “Ku norusuvero nohange”, omanyoneno maye ve worereke tjimuna ozongama zomukazendu otjingundi. Nu kape nomundu ngu me ye taurire. 4 Nungwari eṋe, vakwetu, kamu ri monḓorera, nu kamaamu himisiwa i Eyuva ra Muhona tji reya, tjimuna erunga tji mari mu himisa. 5 Eṋe amuhe oweṋe ovandu vondjerera, ovandu veyuva; kaweṱe ovandu vouṱuku poo vonḓorera. 6 Otji tu hi nokusokurara otja ovandu varwe, nungwari ngatu kare katumba atu nomeritjaerero. 7 Imba mbe rara owo ve rara uṱuku; nu imba mbe purukisiwa i omanuwa omazeu owo ve puruka uṱuku. 8 Nungwari eṱe mba oveyuva tu sokukara nomeritjaerero atwa zara ongamburiro norusuvero otja ombanda yotjitenda yomorukoro, nomaundjiro wondjamo yetu otja ekori rotjitenda. 9 Ndjambi ketu toororere omberero yomazenge we, nungwari we tu toororera okuyamwa i Muhona wetu Jesus Kristus. 10 Eye we tu ṱira, kokutja tu kare nomuinyo puna ye, kutja we tu vaza atu nomuinyo, poo kutja we tu vaza atwa ṱa, eye tji meya. 11 Panḓiparisasaneye nu mu vaterasane otja punga amu tjita hapo.
Omaronga omasenina nozombinika
12 Vakwetu, matu riyarikaṋa ku eṋe kutja mu yandje ondengero ndja yenena ku imba mbe ungura nomasa mokati keṋu, mbe mu hongorera nu mbe mu ronga mongarero youkriste. 13 Ve tjindeye nondengero onene tjinene norusuvero motjimbe tjoviungura vyawo. Karasaneye nohange. 14 Matu mu rongo, vakwetu, kutja mu vyure ovanatjirweyo, mu yanḓiparise imba vomitima omitarazu, mu vatere ovingundi nu mu kare nomuretima novandu avehe. 15 Tareye kutja ape ha ningi ngu ma yarura ouvi mouvi. Kondjeye aruhe okutjitasana ouwa na kovandu avehe.
16 Yorokeye aruhe. 17 Kumbeye nokuhaisa ko. 18 Itjeye okuhepa ku Ndjambi momihingo avihe, orondu ihi Ndjambi otje undja ku eṋe mu Kristus Jesus.
19 Amu pirukire Ombepo Ondjapuke; 20 amu tengurura omaronga eye ngu memu pe. 21 Roreye oviṋa avihe nu mu ṱakamise ihi tji tji ri otjiwa, 22 nu kareye ohumburuko nouvi ngamwa auhe.
23 Ndjambi, ngu yandja ohange, nge mu yapure momuhingo ngamwa auhe nu nge mu ṱakamise okumana mombepo na momuinyo na morutu kutja mu kare ovehinatjipo nga komakotokero wa Muhona wetu Jesus Kristus. 24 Eye, ngwe mu isana, ma yenenisa ihi, tjinga e ri omuṱakame.
25 Kumbireye eṱe wina, vakwetu.
26 Minikeye ovakambure avehe noruhupito rwoupanga woukriste.
27 Ami me mu yanene ku Muhona kutja orutuu ndwi mu ru resere ovakambure avehe.
28 Otjari tja Muhona wetu Jesus Kristus ngatji kare na eṋe.
© Herero Revision Bible © Bible Society in Namibia, 2021.
