Omaisiro wondjo mOmbura Oitjahambombari
(Lev 25:1-7)1 “Aruhe kombunda yozombura hambombari, isira ovandu mbe nozondjo zoye. 2 Omuano mbwi nga rire mbu wa tjiti: Auhe ngwa yazemisa otjiṋa kOmuisrael omukwao, nge mu isire; eye ke nakuṋiṋikiza ko ingwi Omuisrael omukwao, tjinga Muhona omuini a zikamisa kutja ondjo yoviyazemwa ngai zemisiwe. 3 Owozonganda mo yenene okumuṋiṋikiza, nungwari ingwi Omuisrael omukweṋu tje nondjo kove, mu isira.
4 “Nungwari kape nokukara omusyona pove, Muhona, Ndjambi woye, tjinga ame ku sere ondaya tjinene, mehi eye ndi me ku pe otja otjirumatwa, ri rire ouini woye, 5 tji mo puratene nawa keraka re, na tji mo ṱakamisa inga omatwako aehe ngu me ku rakiza ndinondi, 6 Muhona, Ndjambi woye, me ku sere ondaya, otja pe ku kwizikira. Ove mo yazemisa oviṋa vyoye koviwaṋa ovingi, nungwari ove omuini ko nakuhepa okuyazema; mo honapara kombanda yoviwaṋa ovingi, nungwari ovyo kavi nakuhonapara kombanda yoye.
7 “Tji pe nOmuisrael omukweṋu ngu nouhepe, motjihuro tjoye tjimwe, mehi Muhona, Ndjambi woye, ndi me ku pe, o kukutisa omutima woye, nu o panḓa okumuvatera. 8 Nungwari roporora eke roye ku ye, nu kara nombango okumuyazema otja pu pa yenene kouhepe we. 9 O panḓa okumuyazema otjiṋa, mena rokutja indji Ombura yOmaisiro wondjo i ri popezu. O kara nomeripura omavi momutima woye. Ove tji mo panḓa okumuyazema, eye me ku kwire ku Muhona, nove mo rire omunandjo. 10 Mu pa nombango aihe nokuhinekurungo; orondu mena raihi Muhona, Ndjambi woye, me ku sere ondaya moviungura vyoye avihe. 11 Aruhe mape kara ovasyona novahepe mehi roye; opu me ku rakizire nai: Rira ondjandje kOmuisrael omukweṋu omuhepe nomusyona mehi roye.
Onguturiro yovakarere
(Eks 21:1-11)12 “Omuheberi omukweṋu, omurumendu poo omukazendu, tje rirandisa kove, nge ku ungurire oure wozombura hamboumwe; nungwari mombura indji oitjahambombari mu kutura, a yende. 13 Nungwari tji we mu kutura, o mu esa a yende nokuhinatjiṋa. 14 Mu rongerisa nonguta ndja yenene, yozonyanda zoye, noyovikokotwa vyoye nomavinu woye; mu pa mu imbi Muhona, Ndjambi woye, me ku sere ondaya. 15 Zemburuka kutja ove wa ri omukarere mOengipte, nokutja Muhona, Ndjambi woye, we ku kutura; opu me zu okukurakiza otjiṋa hi ndinondi.
16 “Nungwari omukarere tja tja nai kove: ‘Ami hi nokuvanga okuyenda,’ eye tjinga e ku suvera puna onganda yoye, na kara nawa puna ove, 17 mu twara pomuvero wondjuwo yoye, na rire pu we kemutoporera okutwi nondungo; komuhingo mbwi ma karerere omukarere woye; nu komukarere woye omukazendu nga rire tji wa tjiti nao wina. 18 O kara nomuhihamwatima, tji mo kutura omukarere woye, eye tjinga e ku ungurira oure wozombura hamboumwe kondjambi ohinga pu indji ndji sokusutwa komuungurire wondjambi; nu Muhona, Ndjambi woye, me ku sere ondaya mu avihe, mbi mo tjiti.
Oviveri vyovinamuinyo
19 “Otjiveri atjihe otjirume tjotjinamuinyo tji matji kwatwa mozongombe poo mozonyanda zoye, tji yapurira Muhona, Ndjambi woye. O ungura oviungura vyoye notjiveri tjimwe tjozongombe zoye, nu o henye otjiveri tjimwe tjozonyanda zoye. 20 Mombura aihe, ove neṱunḓu roye mamu vi rire momurungu wa Muhona, Ndjambi woye, poṋa Muhona puma vanga okukumbirwa. 21 Nu ndoovazu otjiveri hi tji notjipo tjorive, kutja otjiṱeṱu poo otjipoṱu poo tji notjipo ngamwa otjivi, o tji eta ku Muhona, Ndjambi woye. 22 Ove tji rira poyoye, nandarire omukohoke nomuhakohoke wina nokuhinambangu tjimuna onyama yonḓuno poo yohorongo. 23 Posi yombinḓu porwayo ondji mu hi nokuyenena okurya; i tirahira pehi tjimuna omeva.
© Herero Revision Bible © Bible Society in Namibia, 2021.
