Eksodus 27 - Herero Revision Bible (HRR)

Otjipunguhiro

1 “Wina ungura otjipunguhiro pomue ozometa mbari nohinga koure na kouparanga, noutonga wometa imwe nohinga. Otjo ngatji kare nomikuma vine mbi ṱeki pamwe. 2 Ungura ozonya kovikoro vine. Nozonya zatjo ngaze rire otjiṋa tjimwe kumwe notjipunguhiro, nu u twe ko ongoporo ku tjo atjihe. 3 Nu tji ungurira ovikangero vyokuukira mo omutwe womaze, wina oviwote noviyaha novitwere, novikangero vyomuriro. Oviungurise mbi avihe vi ungura pongoporo. 4 Twa ko otutenda twongoporo ku tjo tu twa pingasanisiwa; nu twako ozongoho ine zongoporo zomatjindiro kovikoro poune wavyo. 5 Nu kakaterisa itwi otutenda kehi komukuro wotjipunguhiro kutja tu vaze nga mokati kotjipunguhiro. 6 Ungurira otjipunguhiro oviti ovitjindiro pomue, nu u twe ko ongoporo. 7 Nu imbi oviti ovitjindiro mavi hwekwa mozongoho kutja ovyo vi kare komikuma aviyevari vyotjipunguhiro, tji mave tji toora. 8 Ungura ihi otjipunguhiro notutapo kutja tji kare nomututu moukoto, otja tji wa raisirwa kondundu.

Orumbo rwOndanda yOmahakaeneno

(Eks 38:9-20)

9 “Wina ungura orumbo rwOndanda yOmahakaeneno. Komukuma wokokumuho kweyuva ngaku kare omarapi omatjizikize worupera ndwa tungwa nozosepa ozoheze, nḓe noure wozometa omirongo vine na ine komukuma umwe; 10 wina ungura ozongunḓe omirongo vivari, nozombaze zazo omirongo vivari zongoporo. Ovipa nozongoho zozongunḓe ngavi rire ovisilveri. 11 Nu ngaku kare nao wina komukuma wokokunene kweyuva okutja omarapi omatjizikize wozometa omirongo vine nandano koure; puna ozongunḓe omirongo vivari, nḓe nozombaze zazo omirongo vivari zongoporo. Ovipa nozongoho zozongunḓe ngavi rire ovisilveri. 12 Nu kouparanga worumbo komukuma wokongurova ngaku kare omarapi omatjizikize wozometa omirongo vivari na mbari koure puna ozongunḓe omurongo nozombaze zazo omurongo. 13 Imbwi ouparanga worumbo komukuma wokomuhuka ngau kare nozometa omirongo vivari na mbari, 14 kutja pe kare omarapi omatjizikize wozometa hamboumwe nohinga, nozongunḓe ndatu nozombaze zazo ndatu; 15 nu komukuma warwe rukwao ngaku kare omarapi omatjizikize wozometa hamboumwe nohinga, nozongunḓe ndatu nozombaze zazo ndatu. 16 Komahitiro worumbo maku kara erapi etjizikize roure wozometa muvyu, nda ungurwa pomarapi womavara omarovazu nomaserarovazu nomaserandu pyu, norupera ndwa tungwa nozosepa ozoheze, nu nga ri rire erapi romavara omengi puna ozongunḓe ine nozombaze zazo ine. 17 Kozongunḓe azehe, nḓa kondoroka orumbo, ngaku tuwe ozongoho ozosilveri; novipa vyazo ngavi rire ovisilveri, nozombaze zazo zongoporo. 18 Oure worumbo ngau kare nozometa omirongo vine nandano, nouparanga wozometa omirongo vivari na mbari, nozometa mbari nohinga koutonga. Omarapi omatjizikize worumbo ngaye ungurwe porupera, ndwa tungwa nozosepa ozoheze puna ozombaze zongoporo kozongunḓe. 19 Nungwari imbi ovitjuma avihe oviungurirwa mOndanda yOmahakaeneno, nozomboha zayo, nozomboha azehe zorumbo ngavi ungurwe pongoporo.

Omaṱiziro wemunine

(Lev 24:1-4)

20 “Nu ove karaere kOvaisrael, ve ku etere omaze womamunine omawamawa, nga kamwa momiṋinga kutja pe kare emunine ndi mari yaka aruhe. 21 Aron novazandu ve ngave zike emunine ndi mOndanda yOmahakaeneno, posi yerapi etjizikize, ndi ri komurungu wOtjipwikiro tjOmerikutiropamwe. Moukarepo wandje oro mari sokuyaka aruhe okuza kongurova nga komuhuka. Ihi ngatji rire omazikamisiro omakarerere kozondekurona zOvaisrael.