Etangero ra David routoṋi
(Psa 18)1 Indi oro etangero ra David nda imburira Muhona, indu Muhona tje mu yama ku Saul na kovanavita na ye avehe:
2 “Muhona eye oruuwa rwandje;
eye otjiṱunga tjandje otjinamasa.
3 Ndjambi eye omaundiro wandje,
nu pu ye me munu ondjamo.
Eye me ndji yama otja oruvao;
eye me ndji rwire nu me ndji yama
eye omuyame wandje;
eye me ndji vatere ne ndji yama kotjitandi.
4 Ami me ku ku Muhona,
neye me ndji yama kovanavita na ami.
Muhona nga tangwe!
5 “Ozongazona zonḓiro ze ndji kovera,
omipupo vyonyonokero vya
ruruma kombanda yandje.
6 Onḓiro ya ṱaisa ozongoze zayo okundjikondoroka,
neyendo re ndji twira po ongwehe.
7 Mombamisiro yandje ami mba kwa ku Muhona;
ami mba kwa ombatero ku Ndjambi wandje.
Mondjuwo ye eye wa zuva eraka randje;
eye wa puratena kondjuriro yandje.
8 “Nu ehi ra nyinganyinga nari kurakura;
omazikameno weyuru ya zezera naye hakiha,
Ndjambi tjinga a ṱomazenge!
9 Omuise wa pita momauru
we; orururumo orusesete nomakara ngaa e yaka
vya pita motjinyo tje.
10 Eye wa peta evaverwa na rauka pehi,
notjikamba otjizorondu tja ri kehi yozombaze ze.
11 Eye wa tuka a kavire ketambo romukerubi;
eye wa tengerera movivava vyombepo.
12 Eye we rikutjira nonḓorera;
ovikamba ovizorondu mbye
ura nomeva vye mu kovera.
13 Omakara ngaa e yaka ya ruruma
morutjeno rwombura komurungu we.
14 “Tjazumba Muhona wa ṱuṱuma meyuru,
nombosiro yowOkombandambanda ya zuvaka.
15 Eye wa yumba oviku vye na piza ovanavita na ye;
eye we ve taurisa nozohanya zorutjeno rwombura.
16 Ourekoto womevakokuvare wa munika,
nomazikameno wehi ya kutjururwa,
Muhona tja kandaiza ovanavita
na ye ne ve tyere ovimboro momazenge we.
17 “Muhona wa roporora eke re okuza
meyuru ne ndji kambura;
eye we ndji nana momeva omakoto.
18 Eye we ndji yama kovendjitonde,
kovanavita na ami mbe nomasa tjinene
kombanda yandje!
19 Tji mba ri moumba, owo ve ndji rwisa,
nungwari Muhona we ndji vatera.
20 Eye we ndji pitisa motjiwonga
ne ndji yama, tjinga a ri nonyuṋe mu ami.
21 “Muhona me ndji pe ondjambi,
tjinga ambi ri omusemba;
eye me ndji sere ondaya,
tjinga ambi hi nondjo.
22 Ami mba kara nonḓuviro
komatwako wa Muhona;
hi pirukirire Ndjambi wandje.
23 Mba ṱakamisa omazikamisiro we aehe;
nu hi nyengurire omarakiza we.
24 Eye ma tjiwa kutja hi tataiza,
nokutja mbe ritjevera kozondjito ozombi.
25 Eye otji me ndji pe ondjambi,
tjinga ambi ri omusemba;
orondu ma tjiwa kutja
owami omuhinandjo.
26 “Ove, Muhona,
oove omuṱakame ku imba mbe ri ovaṱakame,
nu oove omusemba katjotjiri ku imba
mbe ri ovasemba.
27 Kovakohoke oove omukohoke,
nungwari kovarunde oove omunavita.
28 Ove mo yama imba mbe risusuparisa,
nungwari mo susuparisa
imba mbe ritongamisa.
29 “Ove, Muhona,
oove ondjerera yandje;
mo yerisa onḓorera yandje.
30 Ove mo ndji pe omasa
okurwisa ovanavita na ami,
puna Ndjambi wandje me
havere ovendjipirukire.
31 “Ndjambi ngwi, ozondjito ze za pwa, tjiri;
omambo we omaṱakame, tjiri!
Eye oruvao ku
avehe mbe paha omaundiro mu ye.
32 Muhona erike eye Ndjambi;
Ndjambi erike eye oruuwa rwetu!
33 Ndjambi ngwi Eye otjiṱunga tjandje otjinamasa;
eye ma isa mo oviputarise mondjira yandje.
34 Eye me ndji pe ozombaze ozonḓikame otja inḓa zongoṱu;
nu me ndji zikamisa kozondundu nokuhinatjipo.
35 Eye me ndji hongo okurwa
kutja mbi rwe nouta ounamasa tjinene.
36 “Ove, Muhona,
we ndji tjizikiza nu we ndji yama;
ombatero yoye ye ndji tjita kutja mbi tjiukwe.
37 Ove we ndji ṱakamisa kutja e ha kamburwa,
nami hi na pu mba putara.
38 Ami mba tezera ovanavita
na ami ne ve yandeke,
ne ha kotoka nga tji mbe ve havere.
39 Ami mbe ve ṱukuṱura
nga tji ve hi nokuyenena
okusekama rukwao;
nowo va wa kehi yozombaze zandje.
40 Ove we ndji pe omasa motjirwa,
noutoṋi kovanavita na ami.
41 Ove mo taurisa ovanavita na
ami komurungu wandje;
ami mba yandeke imba mbe ndji tonda.
42 Owo va yevayeva ombatero,
nungwari kape na umwe ngwe ve yama;
owo va kwa ku Muhona,
nungwari eye ke ve zuvire.
43 Ami mbe ve kweye otja oruuma rwehi,
ne ve tombo otja omunoko momivanda.
44 “Ove we ndji yama kovendjipirukire,
no ndji toorora okurira
omuhongore woviwaṋa ovinavisenginina;
oviwaṋa mbiye ha tjiwa,
nambano ovyo ovikarere vyandje.
45 Ovozonganda mave ya ku
ami amave wondjo kozongoro;
tji ve ndji zuu, mave kara nonḓuviro ku ami.
46 Ovozonganda mave mumapara nave piti
moviṱunga vyawo amave zezera.
47 “Muhona u nomuinyo!
Hivirikeye omundjiyame!
Ndjambi eye omukuture
wandje omunamasa.
Zuvariseye ounene we!
48 Eye me ndji pe outoṋi kovanavita na ami;
eye ma ṋiṋikizire oviwaṋa kehi yandje,
49 ne ndji kutura kovanavita na ami.
“Ove, Muhona,
u ndji pa outoṋi kovendjipirukire,
nu u ndji yama kovatjite voutwe.
50 Otji me ku hivirike mokati koviwaṋa;
me ku imburire omatangero,
51 Ndjambi u yandja outoṋi ounene kombara ye;
eye u raisa orusuvero oruṱakame
ku ingwi eye ngwa twirisa,
ku David na kozondekurona ze nga aruhe.”
© Herero Revision Bible © Bible Society in Namibia, 2021.
