Ongumbiro yokutja Ndjambi ma vere omunauvi
Komuimburise otja kombosiro yOkuhina Okuṱukuṱura. Epsalme ra David.
1 Oweṋe vanane, mu hungira ousemba are?
Nu mu pangura ovandu osemba are?
2 Kako, momitima vyeṋu mu ripura ouvi porwe,
nu mu tjita ozondjito zoutwe mehi.
3 Ovanauvi va puka okuza kongwatero yawo,
novanavizeze va kwatwa novizeze
okuza momazumo wooina.
4 Owo ve ura nouzuwo tjimuna owozonyoka,
ve setika omatwi wawo tjimuna owesu eworo,
5 ndi ha zuu eraka romuworere wozonyoka,
na ingwi ngu tjiwa okupanguṋuna oviṋa vyoundjai.
6 Ndjambi, ṱukuṱura omayo wovandu
mba movinyo vyawo,
nu teya oviṱaṱunino vyozongeyama
ovindandi, Muhona!
7 Owo ngave zenge tjimuna omeva nga pwire;
nu ngave ṱukuṱurwe tjimuna ehozu mondjira.
8 Ngave kare otja ozongorongondji nḓe
handjuruka okurira enanga;
ngave kare otja okanatje ku ka kwatwa aka koka,
ku ke hi na maake munu ondjerera yeyuva.
9 Owo ngunda ave hiya tjiza,
tjandje va kondwa tjimuna ehozu;
meve isa po ngunda ave nomuinyo.
10 Ovasemba mave nyanda,
tji mave munu ovarunde amave verwa;
Owo mave koho ozombaze zawo
mombinḓu yovanauvi.
11 Ovandu mave tja nai:
“Ovasemba, tjiri, mave munu ondjambi yawo;
tjiri, pena Ndjambi ngu pangura ouye.”
© Herero Revision Bible © Bible Society in Namibia, 2021.
