Omazenge wa Jona notjari tja Ndjambi
1 Jona ka ri nohange Muhona tja rundurura ondando ye, eye wa ṱomazenge tjinene. 2 Notja kumba ku Muhona a tja: “Muhona, ihi katji mba hungira tji mba ri mehi randje are? Ami opu mba za okuhenena kOtarsis, tjinga amba tjiwa kutja ove oove Ndjambi omunatjari nomunaunyaṋutima, nokutja u nomuretima nouwa ounene aruhe, nokutja u ṱondjenda nu u pengisa otjiwonga kovandu. 3 Arikana, Muhona, ṱokundjizepa, orondu okokuwa ku ami okukoka komurungu wokukara nomuinyo.”
4 Nu Muhona wa zira a tja: “Ove u nousemba wokuṱomazenge are?”
5 Jona wa pita okuyenda komukuma wokomuhuka wotjihuro na kahaama pehi. Eye we ritungira otjitara na haama momuzire watjo ama undju okumuna kutja otjihuro Ninive matji tjitwa vi. 6 Tjazumba Muhona Ndjambi otja hapisa omuti kombanda ya Jona okumupa omuzire kutja e mu yarure omutima pehi. Nu Jona wa yoroka tjinene tja muna omuti mbwi. 7 Nungwari eyuva rarwe tji pa tji, Ndjambi wa eta etiva momuti mbwi, noro re u hokora, nowo au koka. 8 Neyuva tji ra zu Ndjambi wa hinda ombepo ombyu yokomuhuka. Nu Jona a hara okuseurwa i oupyu womutenya tji mau vete motjiuru tje. Neye we rizera nonḓiro a tja: “Atja rira kokuwa ku ami okukoka komurungu wokukara nomuinyo.”
9 Nungwari Ndjambi wa tja ku ye: “Ove u nousemba okupindikira omuti are?”
Nu Jona arire tja ziri a tja: “Ii, ami mbi nousemba okupindika; okupindika tjinene nga tji mba koka.”
10 Nu Muhona wa tja nai ku ye: “Omuti mbwi wa hapa mouṱuku umwe nu ouṱuku imbwi oukwao au koka; ove ko notjiṋa tji wa tjiti ku wo, nu kau hapisirwe i ove nambano u noruhoze na wo! 11 Nu ami hi sokuṱotjari na Ninive, ihi otjihuro otjinene, tji tji novature ovehinondjiviro mbe ri komurungu womayovi esere rimwe nomirongo vivari, novinamuinyo ovingi wina are?”
© Herero Revision Bible © Bible Society in Namibia, 2021.
