Nahum 1 - Herero Revision Bible (HRR)

1 Indji ombuze ohunga na Ninive, embo rotjirimunikise tji tja munikwa i Nahum, ngwa zire kOelkos.

Omazenge wa Muhona kOninive

2 Muhona Ndjambi ka zara ovemupirukire;

eye u vera ovanavita na ye.

Momazenge we eye meve sutisa.

3 Muhona ka ṱomazenge tjimanga,

nungwari eye omunamasa tjinene,

nu kamaa isa omunandjo nokuhinokuverwa.

Imba apehe puma ka wondja,

pe sekama ovivepo;

ovikamba ovyo oruuma ndu sekamisiwa

i ozombaze ze!

4 Eye u rakiza okuvare, nokwo aku pwire.

Eye u kahisa ozonḓonḓu.

Okuti kwa Basan nondundu Karmel va kukuta,

nozongara za Libanon za kanyata.

5 Ozondundu ze nyinganyingira momurungu wa Muhona;

ozondunda ze zuzukira momurungu we.

Ehi mari kurakura Muhona tja munika;

ouye novature vawo avehe mave zezera.

6 Muhona tja pindike,

owaṋi ngu ma kara nomuinyo?

Owaṋi ngu ma kara nomuinyo

momazenge we omandandi.

Eye ma tirire omazenge we

ngu maye ruruma otja omuriro;

otuuwa matu nyanyaukire momurungu we.

7 Muhona eye omuwa;

eye otjiṱunga kovandu ve momayuva woumba,

u tjevera imba mbe riyameka ku ye.

8 Otja omupupo omunene mbu mau rauka

eye u yandeka ovanavita na ye okumana;

imba mbe mu pirukira u ve hinda konḓiro.

9 Mamu rikutire tjike kumwe okupirukira Muhona?

Eye me mu yandeke.

Kape na ngu me mu pirukire tuvari.

10 Otja otjihwa otjipote tjomakuiya noviyaya

eṋe mamu sesetwa nga tji mwa yanda.

11 Okuza kove, Ninive, kwa za omurumendu ngwe ura nomeripura omavi, ngwa pirukira Muhona. 12 Muhona ma tja nai kotjiwaṋa tje Israel: “Nandarire kutja Ovaasirie ovanamasa novengi nai owo mave yandekwa nave zengi. Tjiwaṋa tjandje, ami mbe mu hihamisa, nungwari hi nokutjita nao rukwao. 13 Ami nambano me yandisa ouvara wa Asirie kombanda yeṋu, nu me timbura ouketanga mbwe mu pandeka.”

14 Imbi Muhona ombya zikamisira Ovaasirie indu tja tja: “Owo kave nokukara nozondekurona okuzemburukisa omana wawo. Ami me yandeke omukuru wovisenginina mbe ri mozondjuwo ozonḓere zoomukuru vawo. Me sere Ovaasirie omaendo, owo kave pwire okuhupa!”

15 Tareye, omutumwa eye ngo, ma yende kozondundu nombuze ombwa! Eye u ri mondjira okuyekuzuvarisa ohange. Tjiwaṋa tja Juda, tjita omikandi, nu u yenenise omakwizikiro woye. Omunauvi kamaa taurire mehi roye rukwao. Eye wa yandekwa oparukaze.