Esekiel 32 - Herero Revision Bible (HRR)

Ombara ya Engipte mai sasanekwa nongandu

1 Meyuva etenga komueze outjamurongo na vivari wombura oitjamurongo na mbari youhuura wetu, Muhona wa hungira nai ku ami: 2 “Muatje womundu, tjitira ombara ya Engipte omutambo. Keipe ombuze yandje ndji amo tja:

Ove u ritjinda otja ongeyama mokati koviwaṋa,

nungwari ove u ri otja ongandu

ndji tjupa omeva monḓonḓu.

Ove u harisa omeva omunoko nozombaze

zoye nu u ṱunda ozonḓonḓu.

3 Omihoko omingi tji vya wongara,

ami me ku kambura mombate yandje,

novyo mavi nanene

indji ombate komukuro.

4 Ami me ku imbirahi pehi,

nu me eta ozonḓera azehe novipuka

mouye auhe kutja vi ku sasaure.

5 Ami me rimbi oturova twoye tu twa

wora kozondundu na momikutu.

6 Me tirahi ombinḓu yoye nga tji ya

rimbara kozondundu,

nu nga tji ye urisa ozonḓonḓu.

7 Tji me ku yandeke,

me vandeke evaverwa

nu e zorerisa ozonyose.

Eyuva mari rihoreke kongotwe

yovikamba nomueze kau tji nakuyera.

8 Ami me ṱumbisa omamunine aehe weyuru,

nu me twa ehi roye monḓorera.

Ami, ngu mbi ri Muhona Ndjambi,

owami ngu mba hungire.

9 “Oviwaṋa ovingi mavi kurungisiwa tjinene ami tji mba rimbi ombuze yomayandekero woye momahi ngu u hi nokutjiwa. 10 Imbi mbi me tjiti kove mavi urumisa oviwaṋa ovingi. Tji mba taka engaruvyo randje, ozombara maze zezerisiwa i omburuma. Meyuva, ndi mo u, avehe mave zezera nondira mena rominyo vyawo oveni.”

11 Muhona Ndjambi ma tja nai kombara ya Engipte: “Ombara ya Babilon mai ku rwisa nengaruvyo. 12 Ami me isa ovarwe wovita vomihoko ovindandi kutja ve nane omangaruvyo nu ve zepe ovandu voye avehe. Ovandu voye avehe, noviṋa avihe vyarwe mbi u ritongamisira mavi yandekwa. 13 Ami me zepere ozongombe zoye pondjombo aihe. Kape nokukara omundu poo ongombe okuharisa omeva omunoko rukwao. 14 Me porimanisa omeva woye ye rire omakohoke, nu e pupisa ozonḓonḓu zoye nouporimane. Ami, ngu mbi ri Muhona Ndjambi, owami ngu mba hungire. 15 Tji mba tjiti Engipte okurira ongaango, nu tji mba yandeke avehe mba tura mo, notji mave tjiwa kutja owami ngu mbi ri Muhona. 16 Omaronga omakukutu nga onge ri eimburiro romutambo. Ovakazendu vomihoko mave ri imbura okutjitira Engipte novandu varo avehe omutambo. Ami, ngu mbi ri Muhona Ndjambi, owami ngu mba hungire.”

Ombara ya Engipte mai pundu motjovakoke

17 Meyuva oritjamurongo na yetano komueze omutenga wombura oitjamurongo na mbari youhuura wetu, Muhona wa hungira ku ami 18 a tja: “Muatje womundu, tjitira ovimbumba avihe vya Engipte omutambo. Vi hinda kotjovakoke puna oviwaṋa ovikwao ovinamasa. 19 Itja nai ku vyo:

Mamu tjangovasi oweṋe

mbu mu ri ovawa ovamanise

povandu avehe varwe are?

Mamu pundu motjovakoke

nu amu kakara mo

puna imba mbe hi na Ndjambi.

20 “Ovandu va Engipte mave ṱu puna imba mba ṱa motjirwa. Engaruvyo ri ri pokuvezepa avehe. 21 Ozombanḓe ozonenenene na imba mba rwa komukuma wa Engipte mave tjakanenene Ovaengipte motjovakoke. Owo mave ravaere ave tja: ‘Imba mbe hi na Ndjambi nu mba ṱa motjirwa va punda muno, nu owo va rara mba!’

22 “Ehi ra Asirie ri ri mbo, nomaendo wovarwe varo wovita avehe ya kondoroka ehi ndi. Owo avehe va ṱa motjirwa, 23 nomaendo wawo ye ri mourekoto wotjovakoke. Ovarwe varo wovita avehe va ṱa motjirwa, nomaendo wawo ya kovera eyendo raro. Nungwari owo rukuru va tirisire ehi rovanamuinyo.

24 “Ehi ra Elam ri ri mbo, nomaendo wovarwe varo wovita avehe ya kondoroka ro. Owo avehe va ṱa motjirwa, nowo va punda motjovakoke ave hiya sukara. Ngunda ave nomuinyo va tirisa ouye auhe, nungwari nambano va koka nu va yambururwa. 25 Elam ra saravara mokati kaimba mba ṱa motjirwa, nomaendo wovarwe varo wovita avehe ye ri kondoroka. Owo avehe ovahasukara, nu va ṱa motjirwa. Ngunda ave nomuinyo va tirisa ouye auhe, nungwari nambano owo va koka nu va yambururwa, nu ve ri moumba puna imba mba ṱa motjirwa.

26 “Ehi ra Mesek nora Tubal ye ri mbo, nomaendo wovarwe vawo wovita avehe ya kondoroka ro. Owo avehe ovahasukara, nu va ṱa motjirwa. Nungwari owo rukuru va tirisire ehi rovanamuinuyo. 27 Owo kave pakerwe nondengero otja ozombanḓe zoruveze orukuru, nḓa punda motjovakoke aze ripangaṋa novirwise; omangaruvyo wazo ya tuwa kehi yoviuru vyazo, notuvao twazo twa tuwa kombanda yoturova twazo. Ozombanḓe nḓa rukuru za ri ozonamasa tjinene okutirisa ovanamuinyo.

28 “Ovaengipte wina otji mave saravara ava hahaurwa mokati kovahasukara, mba ṱa motjirwa.

29 “Ehi ra Edom ri ri mbo puna ozombara novanane varo avehe. Owo va ri ovarwe wovita ovanamasa, nungwari nambano va saravara motjovakoke puna ovahasukara, mba ṱa motjirwa.

30 “Ovaingona avehe vokomukuma wokeyuva kokunene ve ri mbo, nOvasidon avehe wina. Omasa wawo rukuru ya tirisire ouye, nungwari nambano owo va punda nohoṋi motjovakoke puna imba mba ṱa motjirwa nu mba kasuva ave hiya sukara. Owo ve yambururwa puna imba mba punda motjovakoke.

31 “Ombunikiro yaimba avehe mba ṱa motjirwa mai huhumiṋa ombara ya Engipte notjimbumba tjayo tjovita.” Muhona Ndjambi ongu ma tja nai.

32 “Ami mba yandjera kutja ombara ya Engipte i tirise ovanamuinyo, nungwari oyo notjimbumba tjayo tjovita atjihe mave ṱunu mave kasuva puna ovahasukara avehe mba ṱa motjirwa.” Muhona Ndjambi ongwa hungire.