Omakotokero okuza kouhuura
1 Muhona ma ṱotjari notjiwaṋa tje Israel rukwao; eye me tji toorora tji rire otje omuini, nu me tji turisa mehi ratjo otjini rukwao. Ovandu wozonganda mave ya nave tura puna tjo. 2 Oviwaṋa ovingi mavi vatere Ovaisrael kutja ve yaruke kehi Muhona nde ve pa, nu koṋa ngo oviwaṋa mbi mavi kakarera Ovaisrael otja ovakarere ovazandu novasuko. Imba mba huurire Ovaisrael, nambano mave huurwa i Ovaisrael; nOvaisrael mave honaparere imba mbe ve ṋiṋikizire.
Ombara ya Babilon motjovakoke
3 Muhona ma suvisa Ovaisrael kondatumisiro yawo na keputi rawo na koviungura ovizeu mbyaa ve ṋiṋikiziwa okuungura. 4 Eye tji ma tjiti nao, owo mave nyekerere ombara ya Babilon ave tja:
“Ombara otjindandi ya u! Oyo kamaai ka ṋiṋikiza omundu rukwao! 5 Muhona wa yandisa ouvara wovanane ovanauvi, 6 mba ṋiṋikiza ovandu momazenge wawo, nu mbe ha isire okutatumisa oviwaṋa, mbi va huurire. 7 Nambano ouye auhe wa muna orusuvo nohange, novandu avehe mave imbura nondjoroka. 8 Nangarire omuzema na itwi otupapa twa Libanon mavi yorokere ombara ndja u avi tja: ‘Ove nambano tjinga awa u, kape na ngu ma rondo kondundu okutukera pehi!’
9 “Otjovakoke matji rirongerere omeero wombara ya Babilon. Ozombepo zaimba mba ri ovanauvara kombanda yehi maze kandakanda okukuyozika. Otjovakoke matji tjiti kutja ozombara azehe zoviwaṋa ze sekame kovihavero vyazo vyouhona. 10 Ozo azehe maze ravaere kombara ya Babilon aze tja: ‘Ove wina wa ngundipara tjimuna eṱe! Wa rire otja umwe wetu! 11 Ove iyo yozikwa nombosiro yoviharpe; nungwari nambano u ri motjovakoke. Ove wa rangavara pombete yomatoto, nu we rikutjire otjikutjire tjomativa.’
12 “Mbara ya Babilon, onyose yomuhuka ongeṋangeṋe, ove wa u keyuru! Moruveze ndwa kapita ove wa havera oviwaṋa, nungwari nambano wa vandwa pehi. 13 Ove we rimanene okuronda keyuru nokukatwa otjihavero tjoye tjouhona kozonyose zokombandambanda; we ripurire okuhaama otja ombara kondundu ku ku woronganena oomukuru vovisenginina, komukuma wokeyuva kokunene. 14 Ove wa tja wa vanga okuronda kombanda yovikamba u keriṱekise pamwe na ingwi Omunamasaaehe. 15 Nungwari moruveze rwanao ove wa yumbwa mourekoto ounene wotjovakoke.
16 “Ovakoke mave ku munu, mave ku tara ohwiriri nave pura ave tja: ‘Ingwi onguri omurumendu ngwa nyinganyingisa ehi, nu ngwa zezerisa omauhona are? 17 Eye onguri omurumendu ngwa nyona ovihuro, nu ngwa tjita ouye kutja u rire ongaango are? Ingwi onguri omurumendu ngu hi na wa kutura ovakamburwa, nu ngu he ve isire kutja ve yaruke kozoyawo are?’ 18 Ozombara azehe zouye za rara nondengero momaendo wazo. 19 Nungwari ove ko neyendo; orurova rwoye rwa imbirahiwa okuwora. Orwo rwa kutjirwa noturova twovarwe, mba ṱa movita, aru yumbwa morupoko puna two naru tombwa. 20 Ove tjinga awa nyona ehi roye na wa zepa ovandu voye omuini, otji u hi nokupakwa otja ozombara ozongweṋu. Ozondekurona zoye ozonauvi kamaaze katamunwa rukwao. 21 Otjiṱiro ngatji utwe! Ovazandu vombara ndji mave ṱire omauvi wooihe mukururume. Owo kamaave honaparere ouye, nu kamaave tandavara kombanda yehi.”
Ndjambi ma nyono Babilon
22 Muhona Omunamasaaehe ma tja nai: “Ami me rwisa Babilon, nu me tji tjiti kutja tji rire etundu. Hi nokusya mo otjiṋa, nangarire ovanatje nangarire ovandu ngamwa avehe mba sewa ko. Ami, ngu mbi ri Muhona, mba hungire. 23 Ami me tjiti kutja Babilon tji rire otjitombo, nu mu tjo mamu tura ouṱahoni. Me kombo Babilon notjikombo tji tji kombozora oviṋa avihe. Ami ngu mbi ri Muhona Omunamasaaehe mba hungire.”
Ndjambi ma yandeke Ovaasirie
24 Muhona Omunamasaaehe wa yana a tja: “Ihi tji mbe ripura, tjiri, matji tjitwa; nu ihi tji mbe rimana okutjita matji yenenisiwa. 25 Ami me kombozora Ovaasirie mehi randje ra Israel, nu meve tombere kozondundu zandje. Me kutura otjiwaṋa tjandje kouhuura wOvaasirie na komitwaro, mbi tja tjinda koviṱuve vyatjo. 26 Inga onge ri omatyero wandje ngu mbe ripurira ouye auhe, neke randje ra ropororerwa okuvera oviwaṋa avihe.” 27 Muhona Omunamasaaehe we rimana okutjita oviṋa mbi. Eye wa roporora eke re okuvera, nu kape na umwe ngu me mu tjaere.
Ndjambi ma yandeke Ovafilisti
28 Indji ondji ri ombuze ndja zuvarisiwa mombura ndji ombara Ahas ma koka.
29 Tjiwaṋa tjOvafilisti, okati ku ke mu tona nambano ka teka; nungwari kahepero eṋe okuyorokera otjiṋa hi. Onyoka imwe tji ya koka, ongwao ombi tjinene pu indji mai ya moruveze rwayo. Mei ronyoka mu za ohwa onene otjindandi ndji tuka. 30 Muhona ma rire omurise wovasyona votjiwaṋa tje, nu meve suvisa mohange. Nungwari eye ma hindire ozondekurona zeṋu ondjara onene, Vafilisti, noyo kai nokuisa nangarire umwe kutja a kare nomuinyo.
31 Ureye nu mu kwe ombatero, eṋe vihuro amuhe vyOvafilisti! Zezereye, eṋe amuhe! Otjindamwise matji zu komukuma wokeyuva kokunene; otjo otjimbumba tjovita mu mu hi novimumandu.
32 Ovahindwa mbu mave ya ku eṱe okuza kehi rOvafilisti matu ve ziri vi? Matu ve pe ombuze yokutja Muhona wa zika Sion, noyokutja otjiwaṋa tje otjitatumisiwa matji munu omaundiro mu tjo.
© Herero Revision Bible © Bible Society in Namibia, 2021.
