Omuzuvarise 3 - Herero Revision Bible (HRR)

Otjiṋa atjihe tji noruveze rwatjo

1 Oviṋa avihe mbi tjitwa mouye vi tjitwa moruveze Ndjambi ndwa twa po.

2 Eye u twa po oruveze rwokukwatwa norwokukoka;

oruveze rwokukuna norwokuzukura imbi mbya kunwa;

3 oruveze rwokuyama omuinyo norwokuzepa;

oruveze rwokutunga norwokuhaṋa.

4 Eye u twa po oruveze rwokurira norwokuyora;

oruveze rworuhoze norwenyando;

5 oruveze rwokusuvera norwokuhinokusuvera;

oruveze rwokuhupita norwokuhinokuhupita.

6 Eye u twa po oruveze rwokupandjarisa norwokupaha;

oruveze rwokupwika norwokuimbirahi;

7 oruveze rwokunyondorora norwokuyatata;

oruveze rwokumwina norwokuhungira.

8 Eye u twa po oruveze rwokusuvera norwokutonda;

oruveze rwovita norwohange.

9 Omundu hapo u munina po ondjambi yatjike kongondjero ndje tjita? 10 Ami mba muna omutwaro Ndjambi mbwa twa kombanda yo mundu. 11 Avihe we vi ungura nawa moruveze oruzikame rwavyo. Eye wa twa omakayendero woruveze ndu maru ya momutima womundu, nokuhinokutja omundu ma sora okutjiwa imbi Ndjambi mbye tjita okuza kombutiro nga kondjandero. 12 Otji mba muna kutja kape nouṋingandu warwe komundu posi yokukara nenyando nondjoroka ngunda e nomuinyo. 13 Nu wina omundu auhe tji ma ri nokunwa nokuyorokera otjiungura tje, okutja nao ihi otjo otjiyandjewa tja Ndjambi.

14 Ami mba muna kutja avihe Ndjambi mbye tjita mavi karerere nga aruhe; kaku nokuweziwa ko otjiṋa, nu kaku nokuisiwa ko otjiṋa ku vyo; nungwari Ndjambi u tjita nao kutja ovandu ve mu tire. 15 Avihe mbi ri po vya ri po okuza korukuru; nu imbi mbi mavi kakara po vya karere po rukurukuru; nu Ndjambi potuingi u yarukira po imbi mbya kapita rukuru.

Ouvi nouhasemba mouye

16 Nu komurungu wanao ami wina mba muna kutja kombanda yehi poṋa pu pe sokukara ousemba nombanguriro yousemba, opo pe nouhasemba. 17 Ami mbe ripura nai mu ami omuini: “Ndjambi ma pangura omusemba nomuhasemba pu pe ṱeki, orondu ondyero nondjito aihe ya twirwa po oruveze rwayo oini.” 18 Ami mbe ripura nai: “Ihi tja tjitwa nai kutja Ndjambi a rorere po ovandu okuveraisira kutja owo oveni ve ri otja ovinamuinyo.” 19 Orondu otjiwonga tji tja tyerwa ovandu otji tja tyerwa ovinamuinyo wina: Punga ape koka omundu, opunga ape koka otjinamuinyo wina; aviyevari vi nomasuvaneno nga sana. Onḓengu yomundu i ṱeki poyotjinamuinyo; orondu avihe ovyo omungandjo uriri. 20 Avihe vi yenda koṋa kumwe, koruuma; avihe vya za moruuma, nu avihe mavi yaruka koruuma. 21 Owaṋi ngu tjiwa kutja omuinyo womundu u ronda kombanda, nokutja omuinyo wotjinamuinyo u punda kehi mehi? 22 Otji mba muna kutja kape notjiṋa otjiwa komundu posi yokuriyorokisira oviungura vye, orondu indji hapo oyo ondyero ye. Owaṋi ngu me mu ryamisa kutja a kamune ihi tji maatji kakara po kombunda yonḓiro ye?