Paulus ma kumininwa i Ovajuda
1 Kombunda yomayuva yetano Omupristeri Otjiuru Ananias wa ya kOsesarea puna ovanene tjiva nomutjiwe womatwako wena Tertulus. Owo ve keriraisa ku Feliks nave ka yandja omarondororero wawo nga tjamene na Paulus. 2 Okuzambo Paulus a isanewa a hite, nu Tertulus a utu okukuminina Paulus a tja:
“Mutengwa omutjuṋikwa tjinene! Omananeno woye wounongo ye tu etera ohange oruveze orure, nomarundurukiro omananḓengu ye tjitirwa ombwiro yehi retu. 3 Eṱe oviṋa mbi matu vi yakura akuhe na moruveze aruhe atu nenyando tjinene. 4 Ami hi nokuvanga okukukendisa orure tjinene, nopu me riyarikaṋene kove kutja u zuvire omaserekarerero wetu nomutima omupore. 5 Omurumendu ngwi twe mu muna kutja omunaumba tjinene; eye u uta omazunganeno mokati kOvajuda mouye auhe, neye omunane wotjira tjoposyo tjOvanasareni. 6 Nu tja vanga okuyamburura ondjuwo ya Muhona, eṱe arire tji twe mu kambura. 8b Nove omuini tji wa pura omurumendu ngwi, mo yenene okuzuva mu ye imbi avihe eṱe pu matu mu pere ondjo.” 9 Ovajuda va ya kumwe momakuminino nga, narire tji va tja oviṋa avihe mbi ouatjiri.
Paulus me riyeura komurungu wa Feliks
10 Okuzambo ongooneya ya ṋanga Paulus kutja a hungire, neye arire tja tja:
“Ami me tjiwa kutja oove omupangure wotjiwaṋa hi oure wozombura ozengi, nami otji mbi nenyando okuriyeura omuini komurungu woye. 11 Otja tji mo rimwine omuini pa kapita omayuva uri omurongo na yevari okuza indu tji mba ya kOjerusalem okukakumba. 12 Ovajuda kave ndji vazere ame patasana nomundu mondjuwo ya Muhona, nambi hi nokuhohiza ovandu mozosinagoge na ngamwa akuhe motjihuro. 13 Owo wina kamaave yenene okuraisa omakuminino ngu mave ndji pere po ondjo. 14 Nu ami me hongonona komurungu woye kutja mbi rikotamena ku Ndjambi wootate mukururume nokutwara Ondjira ndji owo ndji ve tja oyo i ri posyo. Nungwari ami wina mbi kambura moviṋa avihe mbya tjangwa mOmatwako wa Moses na momambo wovaprofete. 15 Ami mbi nomaundjiro tjingewo nga mu Ndjambi owo oveni ngu ve na wo wokutja ovandu avehe ovawa novavi mave penduka movakoke. 16 Nami otji mbi kondja aruhe pu mba yenena okukara nomeritjiviro womorukoro omakohoke komurungu wa Ndjambi novandu.
17 “Tji mba zire mo mOjerusalem oure wozombura ozengi, mba ya ngo okutwarera otjiwaṋa tjetu oveni ovimariva ouṱiṱi nokukapunguha ozombunguhiro. 18 Nu ngunda ame punguha ozombunguhiro nao owo otji ve ndji vaza mondjuwo ya Muhona tji mba za nokutjita omerikohororero. Kapa ri ovandu puna ami, nu kapa ri ezunganeno. 19 Nungwari pa ri Ovajuda tjiva mba zire korukondwa rwa Asie; owo va sokuya kove nu ave raisa omakuminino wawo tjinangara ve notjiṋa na ami. 20 Novarumendu mba ngave serekarere ouhasemba mbu mba tjita pu mave ndji pere po ondjo indu tji mba kuramene komurungu wOtjira tjOvajuda, 21 posi yainga omambo ngu mba ravaerere tji mba ri komurungu wawo e tja: ‘Ami me pangurwa i eṋe ndinondi motjimbe tjokutja mbi kambura mombendukiro yovakoke.’ ”
22 Okuzambo Feliks ngwaa tjiwa indji Ondjira youkriste nawa arire tja yandisa omahungiriro na tja: “Lisias, omuhongore wovita tje ya, otji me tye otjiposa tjoye.” 23 Eye wa rakizire komunane wovita ngwaa ṱakamisa Paulus kutja a kare mondjeverero, nungwari wina we mu raera kutja e mu pe ouyara woharive nokutja a yandjere omapanga we okumupa imbi mbi ma hepa.
Paulus komurungu wa Feliks na Drusila
24 Kombunda yomayuva tjiva Feliks we ere puna omukazendu we Omujuda Drusila. Feliks wa isanisa Paulus na puratene ku ye ngunda ama hungire ongamburiro mu Kristus Jesus. 25 Nungwari Paulus tja hungirire komurungu imbwi ousemba nomeritjaerero womundu nomeero wEyuva rOmbanguriro, Feliks arire tja tira na tja: “Nambano yaruka uri. Tji mba munu oruveze oruwa me ku isana rukwao.” 26 Moruveze tjingero ndo Feliks wa ri ama undju kutja Paulus me mu pe ovimariva vyombopero; komuhingo mbwi eye potuingi otjiye mu isana nokuhungira na ye.
27 Nozombura mbari tji za kapita Porsius Festus wa pingena Feliks otja ongooneya, nu Feliks tjinga a vanga okuritjatisa kOvajuda wa kareka Paulus motjovakamburwa.
© Herero Revision Bible © Bible Society in Namibia, 2021.
