Baruk ma rese embo emangwa ra Jeremia
1 Mombura oitjaine Jojakim, omuzandu wa Josija, tja ri ombara mOjuda, Muhona wa tja nai ku ami: 2 “Toora embo emangwa nu tjanga mo omambo aehe ngu mbe ku raera Israel na Juda, noviwaṋa avihe. Tjanga mo oviṋa avihe mbi mbe ku raera okuza keyuva, ndi mba uta okuhungira na ove, Josija tja ri ombara, nga ku ndinondi.Embo emangwa 3 Ngahino otjiwaṋa tja Juda tji tja zuu oviwonga avihe, mbi me ripura okueta ku tjo matji tanauka kozondjira zatjo ozombi. Ami otji me tji isire ourunde nouvi watjo.”
4 Ami otji mba isana Baruk, omuzandu wa Nerija, ne mu resere omambo aehe Muhona nga hungirire ku ami. Nu Baruk we ye tjanga membo emangwa. 5 Ami arire tji mba raere Baruk omaraerero nga: “Ami hi tji nokuyandjerwa okuhita mondjuwo ya Muhona rukwao. 6 Nungwari ami me vanga kutja u yende ngo meyuva otjiwaṋa ndi matji ritjaere kovikurya. Karese embo emangwa ndi neraka enene, kokutja ovandu ve zuve omambo aehe Muhona nga hungira ku ami, nu ngu mbe ku tjangisa. Wina ye resera ovandu va Juda mbe ya okuza kovihuro vyawo. 7 Ngahino owo mave riheke ku Muhona, nave zu ko kozondjira zawo ozombi, orondu Muhona wa tanda ovandu mba nomazenge nomapindi omanene.” 8 Baruk otja resera omambo wa Muhona mondjuwo ya Muhona otja punga ambe mu raera okutjita.
9 Momueze outjamuvyu wombura oitjatano youhona wa Jojakim, ombara ya Juda, otjiwaṋa tja woronganisiwa kutja tji ritjaere kovikurya komurungu wa Muhona. Omeritjaerero kovikurya nga ya tjitwa i avehe mba turire mOjerusalem, na imba avehe mbe ya mo okuza kovihuro vya Juda. 10 Ovandu avehe ngunda amave puratene, Baruk wa resa membo emangwa omambo aehe ngu mba hungirire. Oviṋa mbi vya tjitirwa mondjuwo ya Muhona, metuwo enene ra Gemarja, omuzandu wa Safan, omutjangerepo wouhona. Etuwo re ra ri morupanda rwokombanda, popezu nomahitiro wOmuvero Omupe wondjuwo ya Muhona.
Embo emangwa mari reserwa ovahongore
11 Mikaja, omuzandu wa Gemarja, omuzandu wa Safan, wa zuva Baruk ama rese omambo wembo emangwa, Muhona nga heya. 12 Eye wa ya kondjuwo youhona, ketuwo romutjangerepo wouhona, mu mwa haamene ovahongore avehe. Owo va ri Elisama, omutjangerepo wouhona, na Delaja, omuzandu wa Semaja, na Elnatan, omuzandu wa Akbor, na Gemarja, omuzandu wa Safan, na Sidkija, omuzandu wa Hananja, novahongore avehe ovakwao. 13 Mikaja we ve raera omambo aehe nga zuva, Baruk ngunda ama resere otjiwaṋa. 14 Nu imba ovahongore va tuma Jehudi, omuzandu wa Netanja, omuzandu wa Selemja, omuzandu wa Kusi, kutja ma karaere Baruk ma ete embo emangwa eye nda resera otjiwaṋa. Baruk we ve etera embo ndi. 15 Owo va tja nai ku ye: “Kara pehi u tu resere embo ndi!” Baruk otje ri resa. 16 Tja za nokuresa, owo arire tji va tarasana nomburuma nave tja nai ku Baruk: “Eṱe matu okukaserekarera oviṋa mbi kombara.” 17 Nowo ve mu pura nai: “Tu raera nambano kutja omambo nga aehe we ye tjanga komuhingo uṋe? OJeremia ongwe ku tjangisa are?”
18 Baruk wa zira a tja: “Jeremia ongwa hungira omambo nga notjinyo tje ne ndji tjangisa; nami mbe ye tjanga membo emangwa ndi noinga.”
19 Ovahongore otji va tja nai ku ye: “Ove na Jeremia kaṱareye tjimanga. Ape ningi omundu ngu ma tjiwa poṋa pu mu ri.”
Ombara mai nyosa embo emangwa
20 Ovahongore va twa embo emangwa ndi metuwo ra Elisama, omutjangerepo wouhona, nave i kondjuwo youhona ku va kaserekarera ombara oviṋa avihe. 21 Ombara ya tuma Jehudi okukaeta indi embo emangwa. Eye we ri toora metuwo ra Elisama, ne keriresera ombara novahongore avehe, mba kuramene meṋe yombara. 22 A ri okupepera, nombara ya haamene mondjuwo yayo youhona yokupepera pomuriro. 23 Otjikando atjihe, Jehudi tja mana okuresa omakondwa yetatu poo yane, ombara otjaa i ye kondo nokaruvyo nai ye yumbu momuriro. Oyo ya kara pokutjita nai nga embo emangwa arihe tji ra ningirire. 24 Nungwari nangarire ombara poo ovahongore vayo, mba zuva omambo nga aehe, kave urumine nu kave nyondororere ozombanda zawo okuraisa oruhoze. 25 Nandarire kutja Elnatan na Delaja na Gemarja ve riheka kombara ai ha nyosa embo emangwa ndi, oyo kai puratenene ko ku wo. 26 Moruveze rwanao, ombara ya rakiza komuingona Jerakmeel puna Seraja, omuzandu wa Asriel, na Selemja, omuzandu wa Abdeel, kutja ve ndji kambure puna omutjangerepo wandje Baruk wina. Nungwari tjandje Muhona we tu horeke.
Jeremia ma tjanga embo emangwa rarwe
27 Ombara Jojakim tja za nokunyosa embo emangwa, ndi mba tjangisire ku Baruk, Muhona we ndji raera 28 kutja mbi toore embo emangwa rarwe, nu mbi tjange mo omambo aehe nga ri mu indi etenga. 29 Muhona we ndji raera kutja mbi katje nai kombara: “Ove wa nyosa embo emangwa, nu wa pura Jeremia kutja eye wa tjangera tjike kutja ombara ya Babilon mai ya, ai nyono ehi ndi nai zepa ovandu novinamuinyo vyaro. 30 Ami, ngu mbi ri Muhona, otji me tja nai kove, mbara Jojakim, kutja ondekurona yoye kamaai honaparere ouhona wa David. Orurova rwoye maru imbirahiwa pendje, nu maru saravara moupyu womutenya na mombepera youṱuku. 31 Ami me ku vere, nozondekurona zoye wina novahongore voye mena romauvi eṋe amuhe ngu mwa tjita. Kape na umwe, na ove novature va Jerusalem nOvajuda, ngwa puratena komaronga wandje; nami otji me eta ku eṋe amuhe otjiwonga tji mba tanda.”
32 Tjazumba otji mba toora embo emangwa ekwao ne ri yandja komutjangerepo wandje Baruk; neye wa tjanga omambo aehe ngu mbe mu tjangisa. Eye wa tjanga omambo aehe, nga ri membo emangwa indi etenga, nomambo omengi omakwao warwe ami ngu mba weza ko wina.
© Herero Revision Bible © Bible Society in Namibia, 2021.
