1 Moruveze ndo Ovafilisti va woronganisa otjimbumba tjawo tjovita okukarwisa Ovaisrael. Akis arire tja tja ku David: “Tjiwa nawa kutja ove novarumendu woye mamu i puna ami kovita.”
2 David otja zira nai ku Akis: “Owami omukarere woye, nove mo kerimunina omuini kutja me tjiti tjike.”
Akis arire tja tja ku David: “Osemba, ami me ku tjiti u rire omutjevere wandje wokorutu omukarerere.”
Saul nomukazendu onganguze wa Endor
3 Samuel wa kokere, nOvaisrael avehe ve mu tjitira omutambo nave mu paka motjihuro tje omuini Rama. Saul wa rambere ovakazendu ozonganguze wozombepo zovaṱi, nozombuke mOisrael.
4 NOvafilisti va worongana nave tono ozondanda zawo popezu notjirongo tja Sunem. Nu Saul wa woronganisa Ovaisrael, nowo va tona ozondanda zawo kozondundu za Gilboa. 5 Saul tja muna otjimbumba otjinene tjOvafilisti otja uruma tjinene na zezera. 6 Neye otja kapura Muhona kutja nga tjite vi; nungwari Muhona ke mu zirire embo nandarire rimwe, nangarire moturoto poo momaumbiro wozohanga poo movaprofete. 7 Saul arire tja rakiza ovakarere ve: “Ndji pahereye omukazendu onganguze wozombepo zovaṱi, mbi kemupure.”
Novakarere ve va tja nai ku ye: “MOen-Dor muna umwe.”
8 Saul otje riteturura a zara ozombanda zarwe na kayenda mondjira puna ovaṱike vevari. Tji va kavaza pomukazendu mouṱuku, Saul arire tja tja: “Ndji ukira nombepo yovaṱi, nu u ndji pendurire umwe movakoke ami ngu me ku tamunine.”
9 Nungwari omukazendu wa zira a tja: “Ove omuini mo tjiwa kutja Saul wa tjita tjike, indu tja ramba ovakazendu ozonganguze wozombepo zovaṱi nozombuke. Okutjavi tji mo ndji twire po ongwehe kutja mbi ṱe?”
10 Saul arire tje mu yanene ku Muhona a tja: “Tjimbe tja Muhona omunamuinyo, ko nakuvererwa otjiṋa hi!”
11 Omukazendu we mu pura a tja: “Hi ku pendurire uṋe?”
Neye a ziri nai: “Ndji pendurira Samuel!”
12 Nomukazendu tja muna Samuel, wa ura tjinene na tja ku Saul: “We ndji tjitire tjike otjineya nai? Ove oove ombara Saul!”
13 Nombara ye mu zira nai: “O tira! Mo munu tjike?”
Nomukazendu wa tja ku Saul: “Me munu ombepo, ndji mai zu mehi.”
14 Saul arire tje mu pura a tja: “Ya sana pi?”
Eye arire tja ziri nai: “Oyo omukururume ngu ma penduka mehi, nu ngwe rikutjire ongwava.”
Saul otja zemburuka kutja oSamuel, ne rikoto mondjozikiro.
15 Samuel a tja nai ku Saul: “Mo ndji kondjisire tjike okundjipendura morusuvo rwandje?”
Saul arire tja tja: “Mbi ri mouzeu ounene, Ovafilisti tjinga ave ndji hingire ovita; nu Ndjambi we ndji esa, nu ke tji nakundjizira notjinyo tjovaprofete na moruroto wina. Opu mba zu okukuisana u ndji tjivise tji mba sokutjita.”
16 Samuel wa tja: “Okutjavi tji mo ndji pura, Muhona tje ku esa nu tja rire omunavita na ove? 17 Muhona wa tjita otja pe ku raera notjinyo tjandje. Eye we ku yeka ouhona, ne u yandja ku David. 18 Ove wa kara nokuhinanḓuviro komarakiza wa Muhona, nu ko nyonene Ovaamalek na avihe, mbi va ri na vyo. Muhona opa zu okutjita ihi kove. 19 Muhona ma yandja ove nOvaisrael mouvara wOvafilisti; muhuka ove novazandu woye mamu kara puna ami; nu Muhona ma yandja otjimbumba tjOvaisrael tjovita wina mouvara wOvafilisti.”
20 Tjimanga Saul wa wira pehi na saravara a urumisiwa i omambo wa Samuel. Wina ka ri nomasa, tjinga e ha rire otjiṋa oure weyuva arihe nouṱuku auhe. 21 Omukazendu wa ya ku Saul; nu tja munu kutja Saul wa uruma tjinene wa tja ku ye: “Tara, muhona, omukarere woye wa twa omuinyo we moumba, tja tjiti ihi tji wa ningire. 22 Nambano puratena ku ami; ovikurya ouṱiṱi kove ovyo mbi. Ryaa kutja u hare omasa nu u kayende ondjira yoye.”
23 Nungwari Saul wa panḓa na tja: “Hi nokuvanga okurya.” Nu imba ovakarere ve na ingwi omukazendu ve mu ṋiṋikiza kutja a rye. Eye we ve zuvira, a sekama na kahaama potjiraro. 24 Nomukazendu wa zepa ondana ndja ṋunisirwa monganda; tjazumba otja toora oruhere na rungu, na tereke po omavanda nge hi nosurise. 25 Neye wa twa ovikurya mbi momurungu wa Saul novakarere ve. Nowo va rya, nave i ouṱuku tjingewo.
© Herero Revision Bible © Bible Society in Namibia, 2021.
