Hosea 8 - Herero Revision Bible (HRR)

Muhona ma vere Israel mokurikotamena koomukuru vovisenginina

1 Muhona ma tja nai komuprofete: “Posisa ohiva! Ovanavita mave taurire mehi randje tjimuna ozonguvi! Otjiwaṋa tjandje tja teya omerikutiropamwe ngu mba tjita na tjo nu atji pirukire omatwako wandje. 2 Nandarire kutja owo ve ndji tja owami Ndjambi wawo, nu ve tja owo otjiwaṋa tjandje, nokutja owo ve ndji i, 3 owo va nakaura imbi mbi ri oviwa. Ovanavita na wo opu ve za okuvetjera okuzepa.

4 “Otjiwaṋa tjandje tja toorora ozombara, nungwari tje ritoororera otjini nokuhinombango yandje. Otjo tja zika ovanane, nungwari nokuhinousemba wandje. Otjo tja toora osilveri nongoldo yatjo natji ungura po oomukuru vovisenginina kokutja tji yandekwe otjini. 5 Ami mba tonda otjiserekarera tjondana yongoldo ku ku rikotamena ovature votjihuro Samaria. Ami mba pindika na wo. Owo hapo mave rikotamene kovisenginina vyawo nga ruṋe? 6 Omuisrael onongo ongwa ungura otjiserekarera tjondana hi, notjo kamukuru oparukaze! Ondana yongoldo ku ku rikotamenenwa mOsamaria mai nyanyaurwa! 7 Owo tji va kunu ombepo mave kondo otjivepo. Ehi romakunino wovikokotwa mbi ha horo kamaari eta ovikurya. Nungwari andakuzu vya hora, ovandu wozonganda atjave vi rya okumana. 8 Otjiwaṋa tja Israel tja rira otja oviwaṋa vyarwe nu otjihinahepero tjimuna onyungu ndja tauka. 9 Ovaisrael ovirangaranga tjimuna ozongoro, nu ve kayenda ondjira yawo oveni. Owo ve kapaha ombatero kOvasirie, nu ve suta oviwaṋa vyarwe kutja vi ve vatere. 10 Nungwari nandarire kutja va tjita nao, ami nambano meve woronganisa nu e ve vere, nowo mave rihutu momihihamo, indji ombara ya Asirie tji mai ve ṋiṋikiza.

11 “Ovaisrael punga ave tungira ko ovipunguhiro ovingi vyokuisa ko ouvi opunga ave karerera ko notuveze otuingi twokutjitira po ourunde! 12 Ami mba tjangera otjiwaṋa tjandje omahongero omengi tjinene, nungwari otjo tje ye nakaura otja oviṋa vyoposyo vyovandu wozonganda. 13 Owo ve ndji punguhira ozombunguhiro nu averi onyama yazo. Nungwari ami ngu mbi ri Muhona hi nonyuṋe mu zo; nambano ami me zemburuka ourunde wawo nu e ve verere wo; meve yarura kOengipte!

14 “Ovaisrael va tunga ozondjuwo ongongo, nungwari va zemba Omuute wawo oveni. Ovajuda va tunga ovihuro ovingi ovinamasa. Nungwari ami me hindi omuriro mbu mau seseta ozondjuwo zawo ongongo novihuro vyawo.”