1 Muhona Omunamasaaehe ma tja nai: “Omayuva ngo tji ye ya, oruharwi maru pupu okukohorora ozondekurona za David novature va Jerusalem komauvi na kouhakohoke wawo. 2 Momayuva ngo ami me yandeke omana woviserekarera vyovisenginina mehi, nu kape na ngu me ye zemburuka rukwao. Ami me isa po ngamwa auhe ngu ma tja eye omuprofete, nu me isa po ombango yokurikotamena kovisenginina. 3 Nu tji pe nomundu ngu ma panḓere pokutjita omaprofetero, ihe na ina mave mu raere kutja ma sokuṱa, orondu eye omuini wa tja u hingira embo ra Muhona, nungwari moruveze rwanao wa hungira ovizeze porwavyo. Eye tji ma tjiti omaprofetero, ihe na ina mave mu twere ave zepa. 4 Omayuva ngo tji ye ya, omuprofete auhe ma ṱohoṋi mena rovirimunikise mbya muna nu mbya serekarera, nu ke nokuzara ombanda yovinyuru yomuprofete okutikura ovandu. 5 Moruveze rwanao eye ma tja nai: ‘Ami kawami omuprofete. Owami omukune. Ami mba ungura ehi romakunino oure womuinyo wandje auhe.’ 6 Tjazumba omundu worive tji me mu pura a tja: ‘Ovirwaro mbyo mbi ri morukoro rwoye ovyatjike?’ Eye ma ziri nai: ‘Ami mbe vi isa motjirwa pondjuwo yepanga randje.’ ”
Omarakiza wokuzepa omurise wa Ndjambi
7 Muhona Omunamasaaehe ma tja: “Penduka, ngaruvyo, nu u rwise omurise ngu ndji ungurira! Mu zepa, nozonḓu maze pizuka. Ami me rwisa otjiwaṋa tjandje, 8 nu mehi arihe otukondwa tuvari ku tutatu twovandu matu ṱu. 9 Nu ami me roro indwi orutjatatu ndwa hupu, e ru zuzura momuriro otja osilveri okurukohorora. Me ru roro otja ongoldo tji i rorwa. Norwo maru kumbu ku ami, nami me ru zuvire. Ami me ru raere kutja orwo otjiwaṋa tjandje, notjo matji hongonona kutja owami Ndjambi watjo.”
© Herero Revision Bible © Bible Society in Namibia, 2021.
