Eimburiro rondangero
Eimburiro rondangero ra David.
1 Ami me vanga okuhongonona
ounene woye, Ndjambi
wandje nOmbara yandje;
me hivirike ena roye aruhe nga aruhe.
2 Eyuva arihe me ku hivirike,
nu me tanga ena roye aruhe nga aruhe.
3 Muhona eye omunene,
nu wa pwa pokutangwa tjinene;
nounene we ouhakonḓononwa.
4 Omuhoko nga komuhoko mau
tanga ovitjitwa vyoye;
ovyo mavi hongonona oviungura
vyoye ovinamasa.
5 Ovyo mavi hungire ondjozikiro
nounene woye, nami me ripura
novitjitwa vyoye ovihimise.
6 Ovandu mave hungire oviungura
vyoye ovinamasa,
nami me hongonona ounene woye.
7 Owo mave serekarere ouwa woye auhe,
nu mave yorokere ondjamo yoye.
8 Muhona u nomutima omuwa notjari,
u nomuretima norusuvero orukarerere.
9 Eye omuwa kovandu avehe, nu
u ṱondjenda noviṋa avihe mbya uta.
10 Oviutwa vyoye avihe, Muhona,
mavi ku hivirike, novaingona
voye avehe mave ku tanga.
11 Owo mave hongonona omasa
wouhona woye ounamasa,
nu mave serekarere ouvara woye ounene,
12 kokutja ovandu avehe ve tjiwe
oviungura vyoye ovinamasa
nongeṋangeṋeno onene youhona woye.
13 Ouhona woye owo ouhona mbu
karerera nga aruhe,
nouvara woye u tandavara okuza
komuhoko nga komuhoko.
Muhona u yenenisa omakwizikiro we,
noviṋa avihe eye mbye tjita
ovyo ovisemba.
14 Muhona u vatera avehe mbe ri
moumba, nu u yeura avehe mba wa.
15 Omeho woviutwa avihe ye tara kove,
nove u vi pa ovikurya
moruveze orusemba.
16 Ove u paturura eke roye
no kutisa atjihe tji tji nomuinyo,
punga au vanga.
17 Muhona omusemba mu avihe
mbye tjita,
nu u notjari movitjitwa vye avihe.
18 Muhona u ri popezu na imba
avehe mbe mu isana,
imba avehe mbe mu isana mouatjiri.
19 Eye u tjita ombango yaimba mbe
mu karera, nu u zuva
ondjuriro yawo ne ve yama.
20 Muhona u ṱakamisa avehe
mbe mu suvera,
nungwari ma yandeke ovanauvi avehe.
21 Ami aruhe me tanga Muhona;
oviutwa vye avihe ngavi hivirike ena
re eyapuke aruhe nga aruhe.
© Herero Revision Bible © Bible Society in Namibia, 2021.
