Numeri 18 - Herero Revision Bible (HRR)

Oviungura vyOvapristeri novyOvalevi

1 Muhona wa tja nai ku Aron: “Ove novazandu voye, nomuhoko woye auhe mamu tjindi ondjo ngamwa aihe youkarere wOtjouyapuke, na wina indji youkarere woupristeri 2 Eta omuhoko woye, imbwi omuhoko wa Levi, omuhoko waiho, wina ngave ye ve ku vatere, ove novazandu voye ngunda amamu ungura oviungura komurungu wOndanda yOmahakaeneno. 3 Owo ngave yenenise oviungura vyawo kove na kOndanda aihe; nungwari ave ryama popezu noviungurise vyOtjouyapuke na potjipunguhiro kutja owo ave ha ṱu, na eṋe wina. 4 Owo ngave kare puna ove potjiungura ngamwa atjihe tjOndanda yOmahakaeneno; nungwari ingwi ngu ha pwire, a ungura ko puna eṋe. 5 Ove novazandu voye amuyerike nga rire mbu mwa tjiti otjiungura tjOtjouyapuke na potjipunguhiro kutja omazenge wandje ayehe ya rukwao kOvaisrael. 6 Ami owami ngu mba toorora momuhoko weṋu, imba Ovalevi, mokati kOvaisrael ve rire oviyandjewa ku eṋe. Owo va yapurirwa ami kutja ve tjite oviungura vyawo mOndanda yOmahakaeneno. 7 Nungwari ove novazandu voye amuyerike mamu tjiti oviungura vyoupristeri, imbi vyotjipunguhiro na imbi mbi ri mOtjouyapukeyapuke. Imbi ombi ri oviungura vyeṋu, ami tjinga ambe mu pa oupristeri otja otjiyandjewa. Nu auhe ngu ha pwire tjeya popezu noviṋa oviyapuke, ma ṱu.”

Oviyandjewa kovapristeri

8 Muhona wa tja nai ku Aron: “Ami omuini me ku pe otjiungura tjokutya oviyambo avihe vyombunguhiro mbya toororerwa ami. Koviyambo avihe Ovaisrael mbi mave yapurire ami me yandja ko orukondwa kove na kozondekurona zoye otja omazikamisiro omakarerere. 9 Koviyambo avihe oviyapukeyapuke, mbi hi nokuningiririsiwa kotjipunguhiro, ombi mavi rire ovyoye, okutja ombunguhiro yovikurya noyokuisapo ourunde noyomasutiro nḓu mave ndji punguhire. Ovyo oviyapukeyapuke kove na kozondekurona zoye. 10 Vi rireye poṋa popayapuke; ovavena aveyerike nga rire mbe vi ri; ngavi rire oviyapukeyapuke kove.

11 “Oviyambo avihe vyarwe Ovaisrael mbi mave eta vi rire ombunguhiro yomatakero, mavi rire ovyoye wina. Ami me vi yandja kove na kovazandu novakazona voye otja omazikamisiro omakarere. Auhe mondjuwo yoye ngu ri omukohoke ma yenene okuvirya.

12 “Kovihape ovitenga Ovaisrael mbi mave ndji etere ombura aihe, ami me ku pe ko imbi avihe oviwa tjinene okutja omaze womiṋinga nomavinu novikokotwa. 13 Imbi avihe mavi rire ovyoye. Auhe mondjuwo yoye ngu ri omukohoke ma yenene okuvirya.

14 “Atjihe tji tja yapurirwa Muhona mOisrael matji rire otjoye.

15 “Otjiveri atjihe tjomundu poo tjotjinamuinyo Ovaisrael tji mave etere Muhona, ngatji rire otjoye. Nungwari otjiveri atjihe tjomundu notjovinamuinyo ovihakohoke tji randurura. 16 Omarandururiro wotjiveri tjomundu ye ri nai: Ovanatje votjiwondo tjomueze umwe ngave randururwe otja komasasanekero wotjouyapuke wovisilveri vitano. 17 Nungwari otjiveri tjongombe poo tjonḓu poo tjongombo, o tji randurura ko; otjo otjandje notjiyapuke; ombinḓu i tirahi keṋe yotjipunguhiro, nomaze watjo ye ningiririsa ye rire ombunguhiro oningiririsiwa, omuṋuko wavyo mau yandja onyuṋe ku Muhona. 18 Nonyama yatjo ngai rire oyoye tjimuna orukoro nokurama okunene vyotjiyandjewa tjapeke.

19 “Oviyambo avihe vyombunguhiro vyoviṋa oviyapuke Ovaisrael mbi mave etere Muhona, me vi yandja kove na kovazandu novakazona voye otja omazikamisiro omakarerere. Inga onge ri omerikutiropamwe omahateyewa komurungu wa Muhona, kove na kozondekurona zoye.”

20 Nu wina Muhona wa tja nai ku Aron: “Ove ko nokukara notjirumatwa mehi rawo, nu ko nokukara norukondwa rwehi mokati kawo. Ami, Muhona, owami ngu mbi ri oviṋa avihe, mbi mo hepa.

Otjiyandjewa kOvalevi

21 “Nu tara, ami me yandja kOvalevi otjitjamurongo tjoviṋa avihe Ovaisrael mbi mave yandja; oyo ondjambi yoviungura vyawo, mbi ve tjita mOndanda yOmahakaeneno. 22 Ovaisrael varwe ave ha ryama rukwao popezu nOndanda yOmahakaeneno, tjaa mave tura ondjo nave ṱu. 23 Nungwari Ovalevi porwe ngave tjite oviungura vyOndanda yOmahakaeneno, nu ve tjinde omerizirira aehe woukarere wOtjouyapuke. Inga onge ri omazikamisiro omakarerere kozondekurona zeṋu. Ovalevi kave nokukara notjirumatwa mokati kOvaisrael. 24 Orondu otjitjamurongo tjoviṋa avihe Ovaisrael mbi mave yandja otja otjiyandjewa tjombunguhiro ku Muhona, ami mbe tji yandja kOvalevi otja otjirumatwa. Ami opu mba tjera nai: ‘Ave pewa ko otjirumatwa mokati kOvaisrael.’ ”

Otjitjamurongo tjOvalevi

25 Nu Muhona wa rakiza ku Moses a tja: 26 “Tjivisa omaraerero nga kOvalevi: ‘tji mamu kambura otjitjamurongo tjoviṋa avihe kOvaisrael Muhona mbi me mu pe vi rire ouini weṋu, iseye ko otjitjamurongo ku tjo, nu mu tji yandje ku Muhona. 27 Otjiyambo tjeṋu tjombunguhiro matji varerwa ku eṋe tjimuna ovikokotwa okuza kotjitondero, nomavinu omape okuza motjikameno. 28 Komuhingo mbwi eṋe wina yandjeye otjiyandjewa tjapeke ku Muhona okuisa ku ngamwa otjitjamurongo tjeṋu tji mamu kambura kOvaisrael. Nu iseye ko otjiyandjewa tjohambwarakaṋa tji tji ri otja Muhona, nu mu tji tware komupristeri Aron. 29 Mu avihe, mbi mamu pewa, iseye mo imbi oviwaviwa, mu toororere Muhona otja otjiyandjewa otjiyapuke.’ 30 Nu ve raera nai: ‘Tji mwa yandja imbi oviwaviwa, kareye na imbi mbya hupu tjimuna Omuisrael auhe tji ma kara novihape mbya hupu kotjitondero na kotjikameno tje, tja zu nokueta otjiyambo tjombunguhiro ye. 31 Eṋe nomaṱunḓu weṋu mamu yenene okuvirira ngamwa apehe, tjinga avi ri ondjambi youkarere weṋu mOndanda yOmahakaeneno. 32 Tji mamu yandja otjiwa otjimanise tjavyo, kamu nokurira ovanandjo, nu kamu nokuyamburura oviyandjewa oviyapuke vyOvaisrael, nu otji mu hi nokuṱa.’ ”