Ndjambi ma yandeke Ovamoab
1 Indji ondji ri ombuze ndja hungirirwa Moab.
Ovihuro Ar na Kir vya nyonwa mouṱuku umwe; nu ehi arihe ra Moab ra yandekwa. 2 Otjiwaṋa tja Dibon matji rondo kondunda okukaririra pondjuwo onḓere. Otjiwaṋa tja Moab matji tonene ovihuro Nebo na Medeba ondoro; ovature va Moab va hora oviuru vyawo, nu va kurura otuyezu twawo moruhoze. 3 Ovature momivanda ve zara ozombanda zomakutu; komitutu vyozondjuwo na pomarandero ovandu mave ṱoruhoze nokurira. 4 Otjiwaṋa tja Hesbon notja Eleale mavi uru, nomauriro wavyo maye zuvaka nga kokure kOjahas. Ovarwe wovita vOvamoab opu mave zu okuzezera; omayanḓiparero wawo kaetjipo. 5 Omutima wandje mau urire Moab! Otjiwaṋa tja taurire kotjihuro Soar na kOeglat-Selisija. Tjiva mave twara ondjira, ndji ronda okuyenda kOluhit, amave riri; nu tjiva mave taurire kOhoronaim, ave noruhoze tjinene mena romayandekero. 6 Oruronḓu Nimrim rwa pwira; omahozu nga hapa meṋe yarwo ya kukuta, nu kape noruhapo ndwa sewa po. 7 Otjiwaṋa matji kondo Omukutu wOmipanda ama tji kondjo okuhena nouini watjo auhe. 8 Ombosiro yondjuriro mai zuvaka akuhe pomiruko vyehi ra Moab. Oyo mai zuvakere movirongo Eglaim na Ber-Elim. 9 Onḓonḓu motjirongo Dimon ya seraerisiwa i ombinḓu, nungwari Ndjambi ma eta oumba oukwao ounene tjinene kotjiwaṋa tjotjirongo hi. Ii, mape kara omatirahiro wombinḓu yovandu avehe, mba sewa po mOmoab.
© Herero Revision Bible © Bible Society in Namibia, 2021.
