Otjiungura tja Paulus mokati kaimba mbe he ri Ovajuda
1 Ami, Paulus, omupandekwa wa Kristus Jesus, ngu mba pandekerwa eṋe mbu mu he ri Ovajuda, opu me zu okukumbira eṋe ku Ndjambi. 2 Eṋe hapo mwa zuva kutja Ndjambi motjari tje we ndji pa otjiungura hi okuungurira ombwiro yeṋu. 3 Ndjambi wa vandurura otjiundikwa tje ne tji tjivisa ku ami; ami mba zu nokutjitjanga nambano nai moumbo ouṱiṱi, 4 nu tji mamu rese imbi mbi mba tjanga, mamu hara ondjiviro mounongo wandje mbu mbi na wo motjiundikwa tja Kristus. 5 Momayuva nga kapita ovandu kave na indu va raererwe otjiundikwa hi; nungwari Ndjambi nambano we tji vandururira ovaapostele novaprofete ve ovayapuke mOmbepo ye. 6 Notjiundikwa otjo hi: Mokuzuvarisa Ombuze Ombwa na moruwano rwawo na Kristus Jesus ovandu mbe he ri Ovajuda wina mave kara norupa motjiwaṋa tja Ndjambi nave rire ouṋepo worutu rwa Kristus; nu wina mave kara norupa mu imbi Ndjambi mbya kwizika.
7 Ami mba rira omukarere wOmbuze Ombwa ndji, ihi otjiyandjewa otjihuze Ndjambi tje ndji pa motjari tje, punga ape ungura omasa we mu ami. 8 Nangarire kutja owami omuhinanḓengu tjinene povakambure avehe, Ndjambi we ndji pa ousemba wokuzuvarisira imba mbe he ri Ovajuda Ombuze Ombwa yovihuze vya Kristus mbi ha vazewa, 9 nokutjivisa kovandu avehe kutja Ndjambi, omuute woviṋa avihe, nambano otjiundikwa tje me tji yenenisa vi, indu tja za nokutjihoreka okuza kombutiro youye, 10 kokutja omauhona nomauvara nge ri mevaverwa ye mune ouingi wounongo wa Ndjambi tji mau ungura okupitira mombongo momihingo pekepeke. 11 Notjinga ape ri otja Ndjambi pe rivangera okuza ko nga aruhe, nu punga a yenenisa mu Kristus Jesus, oMuhona wetu. 12 Nu moruwano na Kristus na mongamburiro yetu mu ye eṱe matu sora okukakurama komurungu wa Ndjambi atu hi nomburuma nu atu nomeriyamekero aehe ku ye. 13 Ami opu me zu okuriyarikaṋa ku eṋe kutja amu ha mumapara motjimbe tjokutja me tatumisirwa eṋe. Notjiṋa hi eṋe mamu sokutjivara otja ondengero yeṋu.
Orusuvero rwa Kristus
14 Nopu me zu okuwora ozongoro komurungu wa Ihe, 15 mu mu za oruwano aruhe rwovakambure meyuru na kombanda yehi. 16 Ami me kumbu ku Ndjambi kutja mOmbepo ye e mu zeuparise okuza moutumbe wounene we, mu hare omasa mourekoto weṋu oveni. 17 Me kumbu kutja Kristus a ture momitima vyeṋu mongamburiro, nokutja eṋe mu nangananise omize vyeṋu morusuvero nokuzikama mu rwo, 18 kokutja pamwe notjiwaṋa atjihe tja Ndjambi mu hare omasa okuzuva nawa kutja orusuvero rwa Kristus ru nouparanga noure noutonga noukoto mbu ṱa pi. 19 Tjiweye orusuvero rwe, indwi orusuvero ndu kapita ozondunge zetu, kokutja mu urisiwe tjinene nomeurisiro wa Ndjambi.
20 Eye, ngu ungura mu eṱe otja komasa we, nu ngu sora okutjita ovingi okukapita eṱe pu matu sora okukumba poo okuripura, 21 nga pewe ondjozikiro mombongo otja koruwano rwetu na Kristus Jesus, okuza komihoko avihe aruhe nga ko nga aruhe. Amen.
© Herero Revision Bible © Bible Society in Namibia, 2021.
