Mika 1 - Herero Revision Bible (HRR)

1 Oruveze Jotam na Ahas na Hiskija tji va ri ozombara mOjuda, ombuze ya Muhona otji ye ya ku Mika ngwa zire kotjihuro Moreset. Muhona wa tjivisa Mika oviṋa avihe mbi mavi tjitwa kOsamaria na Jerusalem.

Ondjuriro kOsamaria na Jerusalem

2 Zuveye, oweṋe viwaṋa amuhe;

atjihe tji tjiri kombanda yehi nga tji puratene

Muhona Ndjambi ongu ma

hongonona ouvi weṋu. Purateneye!

Eye ma hungire okuza mondjuwo ye ondjapuke.

3 Tareye, Muhona meya okuza kotjouyapuke tje;

eye ma raukire pehi ne ya okuryanga

kozondomba zozondundu.

4 Ozondundu otji maze zuzuka kehi ye

tjimuna erose momuriro;

nozondundu maze pupire momikutu tjimuna

omeva ngu maye rauka ku zo.

5 Avihe mbi mavi tjitwa mena rozongatukiro norourunde wotjiwaṋa tja Israel. Owaṋi ngu nondjo kozongatukiro za Israel? Indu ka Samaria, ihi otjihuro ohongora are? Nowaṋi ngu nondjo kovisenginina mbi tjitwa kozondundu za Juda? Indu ka Jerusalem are? 6 Muhona ma tja nai: “Ami me tjiti Samaria okurira otjitundu mokuti, poṋa pomakunino womivite. Nomawe watjo me kunguzurire momukutu, ne piza omazikameno watjo. 7 Oomukuru wovisenginina vyatjo avihe mbi tjaungura mavi nyanyaurwa, novisuta vyatjo avihe mbi tja sutira oukorondu mavi ningiririsiwa momuriro; novisenginina vyatjo avihe me vi hahaura; ovyo vya za mondjambi youkorondu, notji mavi karira ondjambi youkorondu rukwao.”

8 Mika arire tja tja: “Ami opu me zu okutjita omutambo nokurira; me ryanga huuna ambi ri mutundu. Nami me vandara otja ombandje ne pose otja ombo. 9 Orondu kape nomaverukisiro kovirwaro vya Samaria, novirwaro mbyo mavi vaza nga kOjuda; omayandekero ya kavaza nga komivero vya Jerusalem mu mu tura otjiwaṋa tjandje.”

Omunavita ma vaza kOjerusalem

10 Amu tjivisa kovanavita na eṱe mOgat ingwi okuhaverwa kwetu. Tjiteye kutja ave he mu munu tji mamu riri. Vature va Bet-Leafra, rangereye moruuma okuraisa oruhoze rweṋu. 11 Vature va Safir, twendeye kouhuura amu ri mutundu namamu ṱohoṋi! Imba mba tura mOsaanan kamaave piti motjihuro tjawo. Neṋe tji mamu zuu ondjuriro yovature va Bet-Esel otji mamu tjiwa kutja kamu nomaundiro mu tjo. 12 Ovature va Marot mave zezera momihihihamo vyawo amave zeri ondjamo, Muhona tjinga a eta otjiwonga nga komivero vya Jerusalem. 13 Kutireye oukambe weṋu komatemba wovita, vature va Lakis. Eṋe mwa horera kouvi wOvaisrael, notji mwa turisa Jerusalem ondjo. 14 Neṋe nambano, Vajuda, virikizeye otjirongo tja Moreset-Gat. Ozombara za Israel kaze nokumuna ombatero kotjirongo Aksib.

15 Neṋe, vature va Maresa, Muhona me mu yandja komunavita ngu ma huura otjirongo tjeṋu. Ovanane ovatjiukwa va Israel mave kaṱara mondimba ya Adulam. 16 Tjiwaṋa tja Juda, horee ozondjise zeṋu, nu mu kurure otuyezu tweṋu okuririra ovanatje veṋu ovaingona. Nu oviuru vyeṋu nga vi kare nongwara otja oviuru vyozonguvi; orondu ovanatje veṋu mave isiwa po pu eṋe okutwarewa kouhuura.