Nehemia 9 - Herero Revision Bible (HRR)

Otjiwaṋa matji rihepura omauvi watjo

1 Meyuva oritjamirongo vivari na yane komueze tjingewo, Ovaisrael va wongara kutja ve ritjaere kovikurya, tjandje va zara omakutu nu veri yumbu ehi moviuru okuraisa oruhoze. 2 Owo va haṋikire rukuru novandu wozonganda; nu va sekama ave utu okurihepura omauvi wawo ngu va tjita, na inga wooihe mukururume. 3 Oure wozoiri mangara ndatu owo va reserwa Embo rOmatwako wa Muhona Ndjambi wawo, noure wozoiri ozongwao ndatu owo ve rihepura omauvi wawo, nave rikotamene ku Muhona Ndjambi wawo.

4 Pa ri otjikurameno tjOvalevi, nu kombanda yatjo kwa kuramene Jesua na Bani na Kadmiel na Sebanja na Buni na Serebja na Bani na Kenani. Owo aave kumbu ku Muhona, Ndjambi wawo neraka enene.

5 Ovalevi, mba isana ovandu komerikotameneno, owo mba: OoJesua na Kadmiel na Bani na Hasabneja na Serebja na Hodija na Sebanja na Petakja. Owo va tja nai:

“Sekameye mu tange Muhona, Ndjambi weṋu;

Mu tangeye aruhe nga aruhe!

Auhe nga tange ena re enandjozikiro,

nandarire kutja ondangero yomundu kai yenene.”

Ongumbiro yOmerihepuriro

6 Tjazumba Ovaisrael otji va kumba ongumbiro ndji:

“Ove, Muhona, oove erike

ngu uri Muhona;

Ove wa ungura omayuru

nozonyose mevaverwa.

Ove wa ungura ehi nokuvare

na avihe mbi ri mu vyo,

ove wa yandja omuinyo ku avihe.

Ovimbumba vyomayuru vi ripeta

navi rikotamene kove.

7 Ove, Muhona, Ndjambi,

wa toorora Abram nomu pitisa mOur,

mehi ra Babilon;

Ove wa rundurura ena re ri rire Abraham.

8 Ove wa muna kutja eye wa ṱakama move,

nu wa tjita omerikutiropamwe na ye.

Ove we mu kwizikira kutja

mo mu pe ehi rOvakanaan,

nehi rOvaperesi norOvajebusi norOvagirgasi,

ye rire omahi mu mamu tura ozondekurona ze.

Ove wa yenenisa omakwizikiro woye,

tjinga au ri omuṱakame.

9 “Ove wa muna ombamisiro

yootate mukururume mOengipte

no zuu ondjuriro yawo pOmuronga wOtuu.

10 Ove wa tjita oviraisiro novihimise

ku Farao na kovahongore ve

na kovandu ve avehe vehi re;

orondu ove oo tjiwa kutja owo

ve ṋiṋikiza otjiwaṋa tjoye.

Notji wa muna ondangu ndji una yo

nga ku ndinondi.

11 Ove wa tjitira otjiwaṋa tjoye

ondjira momuronga notji kondisa

mehi nda kaha.

Imba mbaa ve tji tezere,

we ve ṱomwinisa momeva tjimuna ewe

ndi mari ṱomwine mozongazona zomuronga.

12 Ove we tji hongorera notjikamba mutenya,

notjikamba tjomuriro okuyerisa

ondjira yatjo ouṱuku.

13 Ove wa rauka kondundu Sinai okuza keyuru,

wa hungira kootate mukururume

nove pe omatwako omawa

nomaraerero omasemba.

14 Ove we ve honga kutja

ve yapure esabata roye,

nu arire tji we ve pe omatwako

nomazikamisiro woye

notjinyo tjomukarere woye Moses.

15 “Tji va ri nondjara,

ove we ve parura nomboroto

ndja zire keyuru,

nomeva okuza moruuwa,

tji va ri nonyota,

ove we ve raera kutja ve kambure ehi,

ndi we ve kwizikira kutja mo ve pe.

16 Nungwari ootate mukururume

ve ritongamisa nave rire ovirangaranga,

nu va panḓa okuṱakamisa omarakiza woye.

17 Owo va panḓa okukara nonḓuviro,

nu va zemba ovihimise avihe

mbi wa tjitire ku wo.

Mokuritongamisa kwawo ve ritoororera omunane

ngu meve yarura kouhuura kOengipte.

Nungwari oove Ndjambi ngu isira;

Ove u notjari norusuvero nomuretima,

nouwa woye owo ounene.

Ove ko ve nakaurire ko.

18 Owo va ungura otjiserekarera

tjombunikiro yondana ondume

nave tja oyo ondji ri Ndjambi

ngwe ve pitisa mOengipte.

Owo, tjiri, ve ku yamburura, Muhona!

19 Nungwari ove ko ve esire mokuti onguza,

otjari tjoye tjinga atji ri otjinene tjinene.

Ove ko isire ko otjikamba nomuriro,

mbye ve raisira ondjira mutenya nouṱuku.

20 Mouwa woye ove we ve raera

imbi mbi va sere okutjita;

Ove we ve parura notjimana,

no ve pe omeva okunwa.

21 Moure wozombura omirongo vine

mokuti onguza

ove we ve pa avihe mbi va hepere;

ozombanda zawo kaze na pu za kurupire,

nozombaze zawo kaze

surisirwe i omihihamo.

22 “Ove we ve toṋisa oviwaṋa nomauhona,

inga omahi, nga ri meṋe yomiruko vyawo.

Owo va toṋene otjiwaṋa tjehi ra Hesbon

muyamu honapara ombara Sihon,

na indi ra Basan muyamu honapara ombara Og.

23 Ove we ve pa ovanatje ovengi tjinene

tjimuna ozonyose mevaverwa,

no tjiti kutja ve huure ehi okutura mu ro

ndi wa kwizikira ooihe mukururume

kutja mo ve pe.

24 Owo va huura ehi ra Kanaan;

Ove wa havera oviwaṋa mbya turire mu ro;

no yandja omasa ku wo,

ve tjite pu mave vanga koviwaṋa

na kozombara za Kanaan.

25 Otjiwaṋa tjoye tja kambura

ovihuro mbya zeuparisiwa,

nomahi omahapise,

nozondjuwo nḓe ura noutumbe,

nozondjombo nḓa hupurirwe rukuru,

nomiti vyomiṋinga novyovihape,

novikunino vyomivite.

Owo va rya avihe mbyaa ve vanga ave ṋunu;

va vyarisirwe i oviṋa oviwa ovingi

ove mbi we ve pere.

26 “Nungwari otjiwaṋa tjoye tje ku pirukira,

natji kara nokuhinonḓuviro kove;

novandu vatjo va yandja omatambo

wawo kOmatwako woye.

Owo va zepa ovaprofete mbaa ve ve rongo,

nokuveraera kutja ve kotoke kove.

Owo ve ku yamburura potuingi.

27 Ove otji wa yandjera ovanavita na wo

kutja ve ve havere nu ve ve honaparere.

Mouzeu wawo owo va kwa ombatero kove,

nove meyuru arire tji we ve zuvire.

Motjari tjoye otjinene ove we ve

hindira ovanane mbe ve yama

kouvara wovanavita na wo.

28 Tji pa kara ohange otji va tura ondjo rukwao,

nove we ve yandja rukwao

momake wovanavita na wo.

Nungwari tji ve ritanaura

nave ku ombatero kove,

ove meyuru we ve zuvira,

no ve yama potuingi

motjari tjoye otjinene.

29 Ove we ve ronga kutja ve kare

nonḓuviro komatwako woye rukwao,

nungwari momeritongamisiro wawo

owo va nakaura omazikamisiro woye,

nangarire kutja okuṱakamisa

Omatwako woye okukuri ondjira yomuinyo.

Nozongukutusengo nourangaranga wawo

owo va panḓa okukara nonḓuviro.

30 Ozombura ozengi ove wa kara

nomuretima na wo,

nu wa pendura ovaprofete

voye kutja ve ve ronge,

nungwari owo vari ozomboro,

notji we ve yandja mouvara

woviwaṋa vyarwe.

31 Nu vari ouwa womutima woye

tjinga au ri ounene,

ove otjinga au he ve

nakaurire nokuveyandeka.

Ove oove Ndjambi omunatjari

nomunaunyaṋutima.

32 “Ndjambi, Ndjambi wetu, tjiri,

oove omunene nomutirise nomunamasa!

Ove u yenenisa omakwizikiro

womerikutiropamwe nouṱakame.

Okuza koruveze ndwi ozombara

za Asirie ndu ze tu ṋiṋikiza

nga ku ndinondi, eṱe, tjiri,

twa muna ouzeu!

Ozombara zetu, novanane novapristeri

novaprofete vetu,

nootate mukururume

notjiwaṋa tjetu atjihe va muna ouzeu.

Zemburuka ouzeu mbu twa zara!

33 Ove wa tjita osemba, tji we tu vera;

Ove wa kara nouṱakame,

nangarire kutja eṱe twa tjita ouvi.

34 Ootate mukururume,

nozombara zetu novanane

novapristeri vetu

kave ṱakamisire Omatwako woye,

nu kave puratenene komazikamisiro

na komaronga woye.

35 Ozombara za honaparera otjiwaṋa

tjoye aze nondaya yoye,

indu tji za turire mehi eparanga nehapise,

ndi we ze pere,

nungwari kaze isire ouvi wazo,

kaze na pu ze ku karera.

36 Nambano oweṱe ovakarere mehi,

ndi wa yandja kootate mukururume,

ehi ndi ehapise ndi tu pa ovikurya.

37 Imbi ehi mbi ri hapisa vi yenda kozombara

nḓu wa twapo kutja ve tu honaparere,

motjimbe tjouvi wetu.

Owo ve tjita otja pu mave vanga

kweṱe na kovinamuinyo.

Neṱe tu ri mombamisiro onene!”

Ovandu mave twa omunwe kembo

38 Mena raimbi avihe mbya tjitwa, eṱe Ovaisrael twa tjita omazuvasaneno omazikame momatjangwa; nu ovanane nOvalevi novapristeri vetu va twako otjihako tjawo ku wo.