1 Samuel 19 - Herero Revision Bible (HRR)

David ma suverwa i Jonatan na rambwa i Saul

1 Saul wa hungira komuzandu we Jonatan na kovahongore ve avehe kutja ma vanga okuzepa David. Nungwari Jonatan wa suverere David tjinene, 2 notja serekarera avihe mbi ku David, a tja: “Tate u vanga okukuzepa. Mependukirwa ritjevera, u kaṱare poṋa pu u hi nokumunika. 3 Ami omuini me piti okukakurama meṋe ya tate, mokuti ku mo kaṱara, nu me kahungira ohunga naove kuna ye. Nu tji mba kakonḓonona otjiṋa me ku tjivisa.”

4 Jonatan wa hungira oviṋa ovingi oviwa kuna ihe ohunga na David, na tja ku ihe: “Ombara ai tjiti navi komukarere wayo David; orondu eye tjinga e ha tjitire navi kove, nungwari we ku tjitira ouwa ounene. 5 Eye wa twa omuinyo we moumba indu tja zepa Goliat, nu komuhingo mbwi Muhona otja etera Israel atjihe outoṋi ounene. Ihi ove omuini we tji muna, no yoroka. Okutjavi tji movanga okuriturisa ondjo kombinḓu ohinandjo, tji mo zepa David ngu hi notjipo?”

6 Saul wa zuva komambo wa Jonatan na yana a tja: “Tjimbe tja Muhona omunamuinyo David ke nokuṱa.” 7 Jonatan otja isana David, e mu serekarerere omambo nga aehe. Nu Jonatan wa twara David ku Saul, nu David wa ungurira ombara otja rukuru.

8 Nu pa sekama ovita kuna Ovafilisti rukwao. David we ve rwisa ne ve havere nga tji va taura komurungu we.

9 Eyuva rimwe ombepo ombi ndja hindwa i Muhona ya hita mu Saul rukwao. Saul wa haamene mondjuwo ye, nenga meke re; nu David wa ri mbo ama nyanda otjiharpe. 10 Saul wa vanga okupapera David nenga kekuma rondjuwo, nungwari David wa yepa, nu indi enga ra kakatera mekuma rondjuwo. David otja tupuka na hene.

11 Nouṱuku tjingewo mbo, Saul wa hinda ovarumendu okukatjungira ondjuwo ya David nokukemuzepa tji pa tji. Nu Mikal, omukazendu wa David, we mu ronga na tja ku ye: “Tji u hi nakuhena ouṱuku mbunombwi, muhuka tjandje wa ṱu.” 12 Nu Mikal we mu pitisira moruiho; nu David wa tupuka na hene. 13 Tjazumba Mikal wa toora otjiserekarera tjotjisenginina tjomondjuwo ne tji twa kombete; neye wa twa oruzenga rwomainya wozongombo kotjiuru tjatjo, ne tji kutjire. 14 Novarumendu va Saul tji va ya okukaeta David, Mikal arire tje ve raere kutja David wa vere. 15 Nu Saul wa yarura ovahindwa okukerimunina David oveni. Neye we ve rakiza a tja: “Mu tooreye potjiraro tje nu mu mu ete nguno mbi mu zepe.” 16 Nowo va hita mondjuwo nave vaza mo otjiserekarera tjotjisenginina tjomondjuwo mombete, noruzenga rwomainya wozongombo kotjiuru tjatjo. 17 Nu Saul wa pura ku Mikal a tja: “Ove we ndji tikurire tjike nai, tji wa henisa omunavita na ami?”

Mikal we mu zira a tja: “Eye wa tja me ndji zepa, tji mbi he mu vaterere kutja a hene.”

18 David wa hena, a i ku Samuel kOrama ne kemu raera avihe Saul mbya tjita ku ye. Tjazumba eye na Samuel va ya kOnaiot, nave kakara ngo. 19 Nu Saul wa raerwa kutja David u ri mOnaiot tji tja ri popezu na Rama. 20 Saul otja hinda ovatumwa okukakambura David. Nowo tji va kavaza otjimbumba tjovaprofete puna Samuel otja ngu ri otjiuru tjawo amave uku, Ombepo ya Ndjambi otji ya hita movarumendu va Saul, nowo wina va uta okuuka. 21 Nu Saul tja zuva otjiṋa hi, wa hinda ovatumwa varwe; nowo wina va kauta okuuka. Neye wa hinda ovatumwa otjikando otjitjatatu, nu pa tjitwa omuhingo tjingewo. 22 Neye omuini arire tja i kOrama wina. Neye tje ya pondjombo onene, ndji ri mOseku, wa pura a tja: “OoSamuel na David ve ri pi?” Nowo va zira ave tja: “Ve ri kOnaiot tji tji ri popezu na Rama.” 23 Nu Saul tje ya ngo, Ombepo ya Ndjambi arire tji ya hiti mu ye wina; neye wa yenda ama uku ondjira aihe nga tja kavaza kOnaiot popezu na Rama. 24 Eye wa hukura ozombanda ze wina na ukire momurungu wa Samuel na rangavara muzu oure weyuva arihe. Opu pe hungirirwa nai: “Na Saul wina eye owozombuke are?”