Ndjambi eye omupangure waavihe
1 Muhona, oove Ndjambi,
ngu yandja omberero;
riraisa momazenge woye!
2 Oove omupangure wovandu avehe;
sekama u sutise overitongamise otja
kozondjito zawo!
3 Imba ovanauvi mave yoroka orure
nai nga ruṋe?
Nga ruṋe nai, Muhona?
4 Mave handukire tjike nai?
Nu mave rihivire ouvi wawo nai nga ruṋe?
5 Owo ve ṱukuṱura otjiwaṋa tjoye, Muhona;
nu ve tatumisa imba mbe ri ovoye.
6 Ve sina ovahepundu nozosewa,
nu ve zepa ovandu wozonganda mba
tura mehi retu.
7 Owo ve tja: “Muhona ke nokutumuna;
Ndjambi wa Israel ke nakukeva ko.”
8 Tjiweye, oweṋe vehinazondunge motjiwaṋa!
Neṋe mayova mamu kara ruṋe nozondunge?
9 Ndjambi ngwa uta omatwi wetu,
ke nakuzuva are?
Neye ngwa uta omeho wetu,
ke nokumuna are?
10 Eye ngu vyura oviwaṋa, ke nokuvivera are?
Ke nakuhonga ovandu avehe ondjiviro are?
11 Muhona u tjiwa ourizemburuka womundu;
nokutja omeripuriro womundu owo omungandjo.
12 Omuṋingandu ingwi ngu ma
rongwa i ove, Muhona,
na ingwi ove ngu mo hongo
omatwako woye!
13 Ove mo mu pe orusuvo komayuva woumba,
nga oruhoro tji rwa sewa kutja mu wire omunauvi.
14 Muhona ke nokuisa otjiwaṋa tje,
nu ke nakunakaura ko imba mbe ri ove.
15 Ousemba mau munika rukwao motjombanguriro,
novasemba avehe mave u kongorere.
16 Owaṋi ngu me ndji yeura kovanauvi?
Owaṋi ngu me ndji vatere kovatjite vouvi?
17 Andakuzu Muhona ke ndji vaterere,
ami etje hakahana okuyenda
koṋa ku kwa mwina.
18 Tji mba tja: “Ami me putara,”
Otjari tjoye, Muhona, tje ndji ṱiza.
19 Tji mba ri nomeripuriro omazeu
morukoro rwandje,
omahuhumiṋino woye ya tarareka
omuinyo wandje.
20 Ove u notjiṋa kuna ovapangure mba zunḓaka
nu mbe rundurura ouhasemba u rire ousemba are?
21 Owo ve pirukira ovasemba nu ve
pangura ovehinandjo kokuṱa.
22 Nungwari Muhona me ndji yeura;
Ndjambi wandje me ndji yama.
23 Eye meve verere omaurunde wawo,
nu meve nyonene omauvi wawo;
Muhona, Ndjambi wetu, meve yandeke.
© Herero Revision Bible © Bible Society in Namibia, 2021.
