Deuteronomium 26 - Herero Revision Bible (HRR)

Ozombunguhiro zovitengakuhora

1 “Tji weya mehi Muhona, Ndjambi woye, ndi me ku pe okurira otjirumatwa, nu tji mo ri kambura ri rire ouini woye, no tura mo, 2 nu imbi ovitengakuhora vyovihape avihe, mbi mo kondo vi twa motjimbamba, nu u vi tware koṋa Muhona, Ndjambi woye, ku me ritoororere okukumbirwa. 3 Twende komupristeri ngu ma kara moviungura momayuva ngo, nu u katje nai ku ye: ‘Ndino me hongonona ku Muhona, Ndjambi woye, kutja mba hiti mehi Muhona nda kwizikira ootate mukururume noruyano nokuriyandja ku eṱe.’

4 “Omupristeri ngwi nga kambura otjimbamba hi meke roye ne ketjitwe komurungu wotjipunguhiro tja Muhona, Ndjambi woye. 5 Nu ove hongonona omambo nga komurungu wa Muhona, Ndjambi woye, amo tja: ‘Tate mukururume wa ri Omuaramea omuhangauke, tja twarere eṱunḓu re kOengipte okukatura ngo. Owo va ri ovandu ouṱiṱi tji va ya ngo, nungwari va karira otjiwaṋa otjinene notjinamasa. 6 Nungwari Ovaengipte ve tu tatumisa nokutuṋiṋikiza, nave tu ungurisa oviungura ovizeu vyoukarere. 7 Neṱe otji twa urakana ombatero ku Muhona, Ndjambi wootate mukururume; neye we tu zuvira na munu ondjenda nongondjero nombameno yetu. 8 Nu eye we tu yama neke re enamasa ne tu pitisa mOengipte. Wa tjita oviraisiro ovihimise noviṋa ovitirise. 9 Eye we tu eta nguno ne tu pe ehi ndi nde ura nomaihi nouitji wokuti. 10 Komuhingo mbwi otji mba eta ovitengakuhora vyehi ndi, ove, Muhona, ndi we ndji pa.’

“Nove otji mo twa otjimbumba hi komurungu wa Muhona, Ndjambi woye, no rikotamene ku ye. 11 Nu yoroka mena roviṋa avihe Muhona, Ndjambi woye, mbye ku pa puna eṱunḓu roye; imba Ovalevi novozonganda mba tura puna ove ngave yoroke puna ove.

12 “Mombura oitjatatu aihe, indji ombura yotjitjamurongo, tji wa zu nokuworonganisa otjitjamurongo atjihe tjovihape avihe, tji yandja kOvalevi na kovozonganda na kozosewa na kovahepundu mbe tura movirongo vyoye kutja ve rye nu ve kute. 13 Nu itja nai komurungu wa Muhona, Ndjambi woye: ‘Kape na tjimwe tjotjitjamurongo tjoviṋa oviyapuke tji tja sewa mondjuwo yandje; ami mbe tji yandja atjihe kOvalevi na kovozonganda na kozosewa na kovahepundu otja tji we ndji rakiza. Ami hi katukire nu hi zembire etwako nangarire rimwe rotjitjamurongo. 14 Ami hi na tjimwe tjavyo tji mba rya ngunda amba ri moruhoze, nu hi na tjimwe tjavyo tji mba twaerera ngunda amba ri omuhakohoke; nu hi na tjimwe tjavyo tji mba yandjere kovaṱi. Ami mba ri nonḓuviro kove, Muhona, Ndjambi wandje, nu mba tjita otja pu we ndji rakiza. 15 Tara pehi ku eṱe okuza komaturiro woye omayapuke meyuru, nu u sere ondaya kotjiwaṋa tjoye Israel na kehi, ndi wa yandja ku eṱe otja tji wa kwizikira ootate mukururume noruyano, ehi nde ura nomaihi nouitji wokuti.’

Israel otjiwaṋa tja Muhona omuini

16 “Ndinondi Muhona, Ndjambi woye, me ku rakiza okuṱakamisa omazikamisiro nomatwako nga; ye ṱakamisa nokuyetjita nomutima woye auhe, nomuinyo woye auhe. 17 Ove ndinondi wa tjiti kutja Muhona a hongonone kutja eye ma kara Ndjambi woye, nokutja mo ryanga mozondjira ze noṱakamisa omazikamisiro nomatwako nomaraerero we, no kara nonḓuviro ku ye. 18 Nu Muhona ndinondi wa tjiti kutja ove u hongonone kutja mo kara otjiwaṋa tje omuini otja pe ku kwizikira, nokutja mo ṱakamisa omatwako we aehe. 19 Wina eye we ku kwizikira kutja me ku tongamisa kombanda yoviwaṋa avihe mbya uta kohiviro na kondangero na kondjozikiro ye, nokutja mo kara otjiwaṋa otjiyapuke ku Muhona, Ndjambi woye, otja pa kwizika.”