Josua 21 - Herero Revision Bible (HRR)

Ovihuro vyOvalevi

1 Ovanane womaṱunḓu wOvalevi ve ya komupristeri Eleasar na ku Josua, omuzandu wa Nun, na koviuru vyomaṱunḓu aehe wa Israel. 2 Owo va tja nai ku wo imbo mOsilo mehi ra Kanaan: “Muhona wa rakizire ku Moses kutja tu pewe ovihuro tu ture mo, na wina omahi womaryo nga kondoroka vyo kovinamuinyo vyetu.” 3 Otja komarakiza wa Muhona, Ovaisrael va yandja ovihuro vyorive kOvalevi puna omahi womaryo, mokati komahi wawo.

4 Omaṱunḓu womuhoko wa Levi wonganda ya Kehat onga ri omatenga okupewa ovihuro. Omaṱunḓu wozondekurona za Aron, omupristeri, ya pewa ovihuro omurongo na vitatu mehi romuhoko wa Juda noromuhoko wa Simeon noromuhoko wa Benjamin. 5 Otjihupe tjonganda ya Kehat tja pewa ovihuro omurongo mehi romuhoko wa Efraim norwa Dan norwa Manasse wokongurova.

6 Onganda ya Gerson ya pewa ovihuro omurongo na vitatu mehi romuhoko wa Isakar norwa Aser norwa Naftali norwa Manasse wokomuhuka.

7 Omaṱunḓu wonganda ya Merari ya pewa ovihuro omurongo na vivari mehi romuhoko wa Ruben norwa Gad norwa Sebulon.

8 Ovaisrael va yandja ovihuro mbi nomaryo wavyo kOvalevi mokuumba ozohanga otja Muhona pa rakizire ku Moses.

9 Inga onge ri omana wovihuro vyehi romuhoko wa Juda noromuhoko wa Simeon mbya yandjewa 10 kozondekurona za Aron, nḓa ri ozonganda ya Kehat, nu nḓa ri oza Levi. Omayandjero wovihuro kozondekurona nḓa onga ri omatenga. 11 Ozo za pewa Kirjat-Arba (Arba ongwa ri ihe ya Anak), tji tji ri Hebron, mehi rozondundu ra Juda puna ehi romaryo nda kondorokere tjo. 12 Nungwari ovikunino vyotjihuro novirongo vyatjo vya yandjerwe rukuru ku Kaleb, omuzandu wa Jefune vi rire ouini we.

13 Kozondekurona za Aron, omupristeri, owo va yandja kOhebron, ihi otjihuro tjomaundiro, puna ovihuro mbi nomahi wavyo womaryo: OoLibna 14 na Jatir na Estemoa, 15 na Holon na Debir, 16 na Ajin na Juta na Bet-Semes. Avihe kumwe vya ri ovihuro muvyu vyomuhoko wa Juda nowa Simeon. 17 Mehi romuhoko wa Benjamin va pewa ovihuro vine mbi: OoGibeon na Geba, 18 na Anatot na Almon puna ehi ravyo romaryo. 19 Ovihuro omurongo na vitatu avihe kumwe puna omahi wavyo womaryo ombya yandjewa kovapristeri, imba ozondekurona za Aron.

20 Omaṱunḓu omakwao womuhoko wa Levi, wonganda ya Kehat, ya pewa ovihuro tjiva mehi romuhoko wa Efraim. 21 Owo ya pewa ovihuro vine mbi: OSikem, tji tji ri otjihuro tjomaundiro, mehi rozondundu ra Efraim, na Geser, 22 na Kibsajim na Bet-Horon puna omahi wavyo womaryo. 23 Mehi romuhoko wa Dan ya pewa ovihuro vine mbi: OoElteke na Gibeton, 24 na Ajalon na Gat-Rimon puna omahi wavyo womaryo. 25 Mehi romuhoko wa Manasse wokongurova ya pewa ovihuro vivari, okutja ooTaanak na Gat-Rimon puna omahi wavyo womaryo. 26 Omaṱunḓu nga wonganda ya Kehat ya pewa ovihuro omurongo avihe kumwe puna omahi wavyo womaryo.

27 Omaṱunḓu omakwao warwe womuhoko wa Levi, wonganda ya Gerson, ya pewa ovihuro vivari mehi romuhoko wa Manasse wokomuhuka, okutja oGolan mObasan, tji tji ri otjihuro tjomaundiro, na Astarot puna omahi wavyo womaryo. 28 Mehi romuhoko wa Isakar owo ya pewa ovihuro vine, okutja ooKisjon na Daberat, 29 na Jarmut na En-Ganim puna omahi wavyo womaryo. 30 Mehi romuhoko wa Aser ya pewa ovihuro vine, okutja ooMisal na Abdon, 31 na Helkat na Rehob puna omahi wavyo womaryo. 32 Mehi romuhoko wa Naftali ya pewa ovihuro vitatu mbi: OKedes mOgalilea, tji tji ri otjihuro tjomaundiro, na Hamot-Dor na Kartan puna omahi wavyo womaryo. 33 Omaṱunḓu nga wonganda ya Gerson ya pewa ovihuro omurongo na vitatu avihe kumwe puna omahi wavyo womaryo.

34 Ihi otjihupe tjOvalevi, okutja onganda ya Merari, tja pewa ovihuro vine mehi romuhoko wa Sebulon: OoJokneam na Karta, 35 na Dimna na Nahalal puna omahi wavyo womaryo. 36 Mehi romuhoko wa Ruben tja pewa ovihuro vine, okutja oOBeser na Jahas, 37 na Kedemot na Mefaat puna omahi wavyo womaryo. 38 Mehi romuhoko wa Gad tja pewa ovihuro vine, okutja oRamot-Gilead, tji tji ri otjihuro tjomaundiro, na Mahanaim, 39 na Hesbon na Jaser puna omahi wavyo womaryo. 40 Omaṱunḓu nga wonganda ya Merari ya pewa ovihuro omurongo na vivari avihe kumwe.

41 Mehi rOvaisrael nda ri ouini wawo mwa yandjewa ovihuro omirongo vine na hambondatu kumwe kOvalevi puna omahi wavyo womaryo. 42 Atjihe tjovihuro mbi tja ri nehi romaryo nde tji kondorokere.

Ovaisrael mave kambura ehi ndi ri rire ouini wawo

43 Komuhingo mbwi Muhona otja yandja ehi ndi arihe kOvaisrael, nda kwizikire noruyano kooihe mukururume kutja meve pe. Nowo ve ri kambura nave tura mu ro. 44 Muhona otje ve pa ohange kominda avihe otja pa kwizikire kooihe mukururume. Nu mokati kovanavita na wo avehe kapa ri umwe ngwa yenene okuvepirukira, Muhona tjinga e ve pa outoṋi kombanda yovanavita na wo avehe. 45 Muhona wa yenenisa omakwizikiro aehe omawa, nga tjitire kOvaisrael. Tjiri, aehe ya yenenisiwa.