Ongumbiro yombatero
Epsalme ra David.
1 Me ku kove, Muhona, ngu u ri oruuwa rwandje.
O mwina uriri, nu o ndji esa,
Orondu ove tji wa mwina,
ami me sana novandu, mba pakwa momaendo.
2 Zuva eraka romerihekeneno wandje
tji me ku ombatero kove,
nu tji me yere omake wandje
kondjuwo yoye ondjapuke.
3 O ndji wongatere muna ovanauvi
na imba mbe tjita ouvi;
owo ve hungira omambo wohange kovakwao,
nungwari momitima vyawo tjandje mu nonyengo.
4 Ve verera ozondjito zawo
nouvi woviungura vyawo,
ve verera oviungura vyomake wawo,
ngave pewe imbi mbye ve pwira.
5 Owo kave ripura noviungura vya Muhona
naimbi eye mbya ungura nomake we,
punao eye otjinga ame ve nyono
nokuveyandeka nga aruhe.
6 Muhona nga tangwe,
tjinga a zuvira eraka romerihekeneno wandje.
7 Muhona eye omasa nomuyame wandje,
omutima wandje mau riyameke ku ye.
Eye we ndji pa ombatero ne ndji pe enyando,
nami me mu tanga neimburiro randje.
8 Muhona eye omasa wotjiwaṋa tje;
eye otjiṱunga nondjamo kombara ye ondoororwa.
9 Yama otjiwaṋa tjoye Muhona,
nu u sere ondaya ku imba mbe ri ovoye.
Rira omurise watjo
nu u tji ṱakamise nga aruhe.
© Herero Revision Bible © Bible Society in Namibia, 2021.
