Omazuvarisiro wa Paulus
1 Ami tji mbe ya ku eṋe, vakwetu, okuyekumuzuvarisira otjiundikwa tjouatjiri wa Ndjambi, hi ere nomambo omanene wounongo outongame. 2 Orondu tji mba ri mokati keṋu, mbe rimana kutja mbi zembe oviṋa avihe posi ya Jesus Kristus, nu tjinene onḓiro ye kotjikoroise. 3 Ami mbe ya ku eṋe otja ngu mbi ri omundu otjingundi nu ngu mbi nemuma nomazezerero omanene, 4 nu omahongero nomazuvarisiro wandje ku eṋe kaya ri momambo omanazondunge wounongo wovandu, nungwari ya ri momasa wOmbepo ya Ndjambi. 5 Punao, kaunongo wovandu mbwa tjita kutja mu zikame mongamburiro mu Kristus, nungwari omasa wa Ndjambi.
Ounongo wa Ndjambi
6 Ami wina mbi zuvarisa ounongo, tji mbi ri mokati kaimba mbe kura mombepo, nungwari ounongo mbwi kawouye mbwi nu kawovahonapare wouye mbwi. Owo ve nomasa ngu maye yanda. 7 Ami mbi zuvarisa ounongo wa Ndjambi, imbwi ounongo mbwa undikwa nu mbwa horekwa kovandu, nungwari Ndjambi mbwa twa po rukuru, ouye ngunda au hiya utwa, kutja tu kare norupa mounene we. 8 Kape nomuhonapare nangarire umwe wouye mbwi ngwa tjivirwe ounongo mbwi. Andakuzu ve u tjivirwe, katjave papera Muhona wondjozikiro kotjikoroise. 9 Nungwari omatjangwa maye tja:
“Ihi omundu tje ha munine nu tje ha zuvire,
nu tje he ripurire momutima we,
otjo Ndjambi otja ṱunina imba mbe mu suvera.”
10 Nu Ndjambi wa tjiukisa otjiundikwa tje ku eṱe mOmbepo ye. Orondu Ombepo ndji i tuurunga oviṋa avihe, nangarire imbi oviundikwa ovikoto tjinene vya Ndjambi. 11 Ombepo yomundu omuini ndji ri mu ye, ondji tjiwa imbi avihe vyomundu; nu komuhingo tjingewo Ombepo ya Ndjambi, ondji tjiwa imbi avihe vya Ndjambi. 12 Ombepo eṱe ndji twa pewa oyo kambepo youye mbwi, nungwari twa pewa Ombepo ndja za mu Ndjambi, kokutja tu tjiwe imbi avihe Ndjambi mbye tu pa motjari tje.
13 Neṱe otji tu ha hungire nomambo womahongero wounongo wovandu, nungwari otji tu hungira nomambo womahongero wOmbepo. Neṱe otji matu handjaura imbi vyombepo ku imba mbe nOmbepo. 14 Omundu ngwi ngu hi nOmbepo kamaa sora okuyakura oviyandjewa, mbi za kOmbepo ya Ndjambi. Ku ye ovyo oviporoporo. Eye wina ke nokuvizuva nawa, ovyo tjinga amavi sosononwa komuhingo wOmbepo. 15 Omundu ngu nOmbepo u sora okusosonona oviṋa avihe, nungwari eye omuini ke nokusora okusosononwa i omundu warwe. 16 Omatjangwa maye tja:
“Owaṋi ngu ma tjiwa omeripuriro wa Muhona?
Owaṋi ngu ma sora okumupa ondunge?”
Nungwari eṱe tu nOmbepo ya Kristus.
© Herero Revision Bible © Bible Society in Namibia, 2021.
