Ovasirie mave tanda Jerusalem
(2Ozo 18:13-372Ozo 19:14-19, 2Ozo 35-37Jes 36:1-22Jes 37:8-38)1 Kombunda yovitjitwa mbi Hiskija ma karera Muhona nouṱakame, Sanherib, ombara yOvasirie, wa rwisa Juda. Eye wa kovera ovihuro ovinamasa, na rakiza kotjimbumba tje tjovita kutja tji taurire motumbo. 2 Hiskija tja muna kutja Sanherib we rimana okurwisa Jerusalem wina, 3 otje ripura puna ovahongore ve novarwe ve ozombangaṋe kutja ve pate omeva wotuharwi tu twa ri pendje yotjihuro; nowo ve mu vatera. 4 Ovandu ovengi va wongara, nowo va pata otuharwi atuhe nomuramba mbuyau pupu mehi, amave tja: “Ozombara zOvasirie maze sokuvazera tjike omeva omengi nai, tji maze ya?” 5 Ombara ya zeuparisa omatungiro wokuyama otjihuro, okutja ya tungurura otumbo, ai tungu otuhungu kombanda yatwo, nai tungu orumbo orutjavari kongotwe yaindwi orutenga. Wina ya zeuparisa otjiṱunga Milo mOtjihuro tja David, nai ungurisa omanga omengi notuvao otuingi. 6 Ombara ya twa ovarumendu avehe votjihuro kehi yondyero yovahongore votjimbumba tjovita nai raera kovahongore mba kutja ve ve woronganisire morupare pomuvero wotjihuro. Oyo ya tja nai ku wo: 7 “Rireye ovanamasa nu yanḓipareye! Amu tira ombara yOvasirie poo otjira tjovita tji tji i kongorera! Eṱe tu nomasa tjinene pu wo. 8 Eye u nomasa womundu, nungwari eṱe tu na Muhona, Ndjambi wetu, ngu me tu vatere nokuturwira ovita vyetu.” Ovandu va yanḓiparisiwa i omambo nga wombara.
9 Kombunda yanao Sanherib notjimbumba tje tjovita ngunda ava ri mOlakis, eye wa hinda ombuze ku Hiskija na kOvajuda, mba ri puna ye mOjerusalem, ndji mai tja: 10 “Ami, Sanherib, ombara ya Asirie, me pura kutja mwe riyameka otjikeṋa tji mwa hirimana mOjerusalem, ngunda atja koverwa. 11 Hiskija me mu wovisa ame mu raere kutja Muhona, Ndjambi weṋu, me mu yama komasa wetu, nungwari ma tjiti kutja mu ṱondjara nonyota. 12 Eye ongwa hahaura poṋa pomerikotameneno ku Muhona, novipunguhiro vye, nu tjazumba ongwa raera ovandu va Juda nova Jerusalem kutja ve rikotamene nokutwimisira ovyomoro omuwa kotjipunguhiro tjimwe uriri. 13 Kamu nokutjiwa imbi ootate mukururume na ami mbi twa tjitire kovandu vomihoko vyarwe are? Oomukuru vomihoko vyarwe ngamwa ve na pu va yamene ovandu vawo kouvara wandje are? 14 Omukuru uṋe womihoko vyarwe mbya yandekerwe i ootate mukururume, ngwa sorere okuyama ovandu ve ku ami? Nambano Ndjambi weṋu ma sora vi okumuyama? 15 Amu wovisiwa poo amu pukisiwa i Hiskija! Amu kambura mu ye! Kape nomukuru womuhoko poo wouhona ngamwa ngwa yenenene okuyama ovandu ve ku ami poo kootate mukururume. Nu tjiri, Ndjambi weṋu ngwi kamaa yenene okumuyama.”
16 Ovahongore vOvaasirie va hungirira ko oviṋa ovingi oviyamburure ku Muhona Ndjambi, na ku Hiskija, omukarere wa Muhona. 17 Ombara Sanherib wina wa tjanga orutuu ama yamburura Muhona Ndjambi wa Israel. Mu rwo mwa tjangwa nai: “Oomukuru vomihoko vyomahi warwe kave yamene ovandu vawo kouvara wandje, nu Ndjambi wa Hiskija wina kamaa yama ovandu ve ku ami.” 18 Ovahongore va ravaera nai mOtjiheberi kutja ve tirise nokumumaparisa ovature va Jerusalem, mba ri kombanda yorumbo rwotjihuro kokutja a rire oupupu ku wo okukambura otjihuro. 19 Owo va hungira Ndjambi wa Jerusalem momuhingo tjingewo mbu ve hungira oomukuru voviwaṋa vyarwe, imbi ovisenginina mbya ungurwa i omake wovandu.
20 Ombara Hiskija nomuprofete Jesaja, omuzandu wa Amos, va kumbira otjiṋa hi ku Ndjambi nave ku ombatero ku ye. 21 Muhona wa tuma omuengeri ngwa zepa ovarwe ozombanḓe avehe, novanane novahongore votjimbumba tjOvaasirie tjovita. Nombara otji ya yaruka kOasirie mohoṋi. Eyuva rimwe oyo tji ya ri mondjuwo onḓere yomukuru we, tjiva vovazandu ve otji ve i zepa nomangaruvyo wawo.
22 Komuhingo mbwi Muhona wa yama Hiskija novandu va Jerusalem kouvara wa Sanherib, ombara ya Asirie, na wina kovanavita na wo varwe. Eye wa yandja ohange kovandu komikuma avihe. 23 Ovandu ovengi ve ya kOjerusalem amave eta oviyambo vyozombunguhiro ku Muhona, noviyandjewa ovinanḓengu ku Hiskija. Okuzambo ovandu va kara nondengero onene kombara Hiskija.
Ouvere nomeritongamisiro wa Hiskija
(2Ozo 20:1-3, 2Ozo 12-19Jes 38:1-3Jes 39:1-8)24 Moruveze mangara tjingero ndo ombara Hiskija wa vera na hara okukoka. Eye wa kumba, nu Muhona we mu zuvira ne mu raisire kutja me mu verukisa. 25 Nungwari ombara Hiskija we ritongamisa tjinene, a ha tja okuhepa kouwa Muhona mbwa tjita ku ye; nu Juda na Jerusalem vya hihamisirwa otjiṋa hi. 26 Tjazumba Hiskija novature va Jerusalem ve risusuparisa, nu Muhona otje haverere ovandu, nga kombunda yonḓiro ya Hiskija.
Outumbe wa Hiskija
27 Hiskija wa rira omutumbe tjinene, nu auhe we mu yozika tjinene. Eye wa tungisa ozondjuwo zokupwikirwa mo ongoldo nosilveri, nomawe omahuze, novyomoro omuwa, notuvao, noviṋa ovikwao ovinanḓengu. 28 Nu noho wa tungisa ozondjuwo zokupwikirwa mo ovikokotwa, nomavinu, nomaze womiṋinga; na wina wa tungisa oviunda vyozongombe novyozonḓu ze. 29 Posi yaimbi avihe Ndjambi we mu pa ozonḓu nozongombe, noutumbe ounene; neye wina wa tunga ovihuro ovingi. 30 Ombara Hiskija ongwa pata omeva woruharwi Gihon ne ye pitisire moturora tu twa tuurunga orumbo okutwara omeva mOtjihuro tja David. Hiskija wa ṋingapara moviṋa avihe mbya tjita. 31 Nandarire ovatumwa va Babilon tji ve ya okukonḓonona otjiraisiro otjihimise tji tja tjitirwe mehi, Ndjambi wa isa Hiskija okuripura mu ye omuini, e mu rore nu a tjiwe oviundikwa avihe, mbi ri momutima we.
Ondjandero youhona wa Hiskija
(2Ozo 20:20-21)32 Oviṋa avihe vyarwe ombara Hiskija mbya tjita, nokuriyameka kwe ku Muhona, vya tjangwa mOmavandururiro womuprofete Jesaja, omuzandu wa Amos, na mEkuruhungi rOzombara za Juda noza Israel. 33 Hiskija wa koka na pakwa kondunda, popezu nomaendo wozondekurona za David. Ovandu avehe va Juda nova Jerusalem ve mu tjitira ondjozikiro onene monḓiro ye. Omuzandu we Manasse we mu pingena mouhona.
© Herero Revision Bible © Bible Society in Namibia, 2021.
