Otjipwikiro tjOmerikutiropamwe matji etwa kOjerusalem
(1Eku 13:1-1415:25—16:6, 43)1 Norukwao David wa woronganisira ovarwe wovita avehe ovatoororwa mOisrael, ovarumendu omayovi omirongo vitatu, 2 na i puna ovarumendu avehe mba kObaal mOjuda kutja ve kaete Otjipwikiro tjOmerikutiropamwe wa Ndjambi tji tji nena ra Muhona Omunamasaaehe, ngu haama kotjihavero tje tjouhona kombanda yovakerubi. 3 Nowo va kapitisa Otjipwikiro tjOmerikutiropamwe wa Ndjambi mondjuwo ya Abinadab ndja ri kondunda, nave tji turike metemba epe. OoUsa na Ahio, ovazandu va Abinadab, ave hongorere etemba ndi, 4 nu Ahio aa kayenda komurungu. 5 Nu David nOvaisrael avehe aave pundu komurungu wa Muhona nomasa wawo aehe, amave nyanda ovihumba ngamwa avihe, okutja oviharpe nozondjupa, nozongoma zovitenda, nozohiva.
6 Nu tji va kavaza kotjitondero tja Nakon, ozonduwombe otji za putara, nu Usa wa roporora eke na ṱiza Otjipwikiro tjOmerikutiropamwe wa Ndjambi. 7 Tjimanga Muhona wa ṱomazenge na Usa, ne mu zepa mena rokutja wa ṱunu kOtjipwikiro tjOmerikutiropamwe. Eye wa kokera mbo posi yOtjipwikiro tjOmerikutiropamwe wa Ndjambi. 8 David wa pindika tjinene, Muhona tjinga a vera Usa tjimanga nai. Poṋa mbo opu pa rukirwa Peres-Usa nga ku ndinondi.
9 Meyuva ndo David wa tira Muhona na tja: “Otjipwikiro tjOmerikutiropamwe wa Muhona nambano me sora vi okutjitwaerera?” 10 David otje ha vangere okutjihitisa motjihuro tje Jerusalem; nungwari eye we tji twara kondjuwo ya Obed-Edom, Omugit. 11 Otjo tja kara mbo oure womieze vitatu, nu Muhona wa sera Obed-Edom neṱunḓu re arihe ondaya.
12 Ombara David tja zuva kutja Muhona wa sera ondaya keṱunḓu ra Obed-Edom na ku avihe mbya ri na vyo mena rOtjipwikiro tjOmerikutiropamwe wa Muhona, otje ketjieta kondjuwo ya Obed-Edom, ne tji twara kotjihuro tje Jerusalem, nenyando enene. 13 Novatjinde vatjo tji va ka wondja omikambo hamboumwe, David arire tje ve kuramisa, eye ngunda ama punguhire Muhona onduwombe nondana ondume ndja ṋunisiwa. 14 David aa pundu nomasa we aehe komurungu wa Muhona, ngunda e rivaranga nombanda youpristeri porwayo. 15 Komuhingo mbwi David nOvaisrael avehe otji va twara Otjipwikiro tjOmerikutiropamwe wa Muhona kOjerusalem, amave yoroka nokuposisa ozohiva.
16 Otjipwikiro tjOmerikutiropamwe wa Muhona tji tja hita motjihuro tja David, tara, Mikal, omusuko wa Saul, tjandje ma tarere moruiho, na munu David, tji ma tukatuka nokupunda momurungu wa Muhona; neye arire tje mu nyengwa momutima. 17 Nowo va eta Otjipwikiro tjOmerikutiropamwe nave tji twa mondanda David ndje tji ṱunina. Neye wa punguhira Muhona ozombunguhiro ozoningiririsiwa nozohange. 18 Neye tja za nokupunguha ozombunguhiro nḓa, wa sera otjiwaṋa ondaya mena ra Muhona Omunamasaaehe. 19 Tjazumba otja haṋena otjiwaṋa atjihe tjOvaisrael, ovarumendu novakazendu, auhe omboroto ombomba, nonyama ndja terekwa pomakara, nomandjembere nga kahisiwa. Nu avehe va yaruka kozoyawo.
20 Tjazumba David tja kotoka koye okuminika eṱunḓu re, Mikal, omusuko wa Saul, arire tje mu tjakanene na tja ku ye: “Ombara ya Israel ndino ye ritjitire ohiviro yatjike, tji ye riraisa okukara muzu momeho wovakarere vayo ovakazendu tjimuna omundu wakauriri!”
21 Nungwari David wa tja nai ku Mikal: “Ami ee pundu okuyozika Muhona, ngwa toorora ami moruveze rwaiho neṱunḓu re okundjitjita ombara yotjiwaṋa tje Israel. Nami me pundu nondjoroka komurungu wa Muhona, 22 nu me vanga okurisusuparisa omuini komurungu. Ove mo ripura kutja owami omundu wakauriri, nungwari ovasuko mbu wa tamuna, mave ndji yozike tjinene!”
23 Nu Mikal, omusuko wa Saul, ke na pa kamuna ovanatje nga konḓiro ye.
© Herero Revision Bible © Bible Society in Namibia, 2021.
