Omawiro wa Babilon
1 Indji ondji ri ombuze ndja hungirirwa Babilon.
Otja orukumbambura punga amaru hingi mokuti onguza, otjiwonga opunga ama tji ya okuza kehi etirise. 2 Ami mba muna otjirimunikise tjovitjitwa oviyaukise, otjirimunikise tjomarondororero notjomanyoneno.
Tjimbumba tja Elam tjovita, karwise! Tjimbumba tja Medie tjovita, kovera ovihuro! Ndjambi ma yandisa ondatumisiro aihe ndja etwa i Babilon.
3 Imbi mbi mba muna na imbi mbi mba zuva motjirimunikise vye ndji wira nondiriro nomihihamo, omihihamo tjimuna imbi vyomukazendu mombandukiro. 4 Omutima wandje mau pukapuka, nami me zezerisiwa i ondiriro. Ami ee zeri kutja ongurova i ye, nungwari kai na tji ye ndji etera posi yooma porwe.
5 Motjirimunikise omukandi wa ṱunwa; ovinguma vya yarerwa ovaṋangwa okuhaama po. Owo mave ri nave nu. Mokamanga omarakiza maye ravaerwa nai: “Vahongore! Rongereye otuvao tweṋu!”
6 Muhona arire tja tja nai ku ami: “Twende u katwe po omutjevere nu u kemuraere kutja a hepure imbi mbi ma munu. 7 Eye tja munu ovandu mbu mave ya koukambe kovevarivari, novandu, mba kavire kousino na kozongamero, nge ve tarere nawa nokukengeza.”
8 Omutjevere ma ravaere nai: “Muhona, ami ee tjeverere poruhungu rwandje omutenya nouṱuku.”
9 Mokamanga owo arire tji ve ya! Ovarumendu mbe ri koukambe, kovevarivari. Nomutjevere wa tjivisa ombuze ndji: “Babilon tja u, tja u! Oomukuru avehe vovisenginina owo kuyave rikotamene va nyanyaurirwa pehi!”
10 Tjiwaṋa tjandje tjOvaisrael, eṋe mwa tondwa otja ovirya, nungwari nambano ami mbe mu tjivisa ombuze, ndji mba zuva mu Muhona Omunamasaaehe, Ndjambi wa Israel.
Ombuze ndja hungirirwa Edom
11 Indji ondji ri ombuze ndja hungirirwa Edom.
Omundu worive me ndji ravaerere okuza kOedom, ama tja: “Mutjevere, ouṱuku mau kapita ruṋe? Ndji raera kutja mau yanda ruṋe?”
12 Ami mba zira ne tja: “Omuhuka mau ya, nouṱuku mau ya rukwao. Tji mamu vanga okupura rukwao, kotokeye mu pure.”
Ombuze ndja hungirirwa Araba
13 Indji ondji ri ombuze ndja hungirirwa Araba.
Eṋe, vandu va Dedan, mbu mu rara mozondanda zotutjindo mokuti kwa Araba ku kwa kuruka, 14 yandjeye omeva kovananyota mbu mave ya ku eṋe! Eṋe, vandu vehi ra Tema, yandjeye ovikurya kovataure! 15 Ovandu mave taura okuhena komangaruvyo nge ri pokuvezepa, na komauta nge ri pokuveyaha, na komaumba aehe wovita.
16 Muhona wa tja nai ku ami: “Moure wombura imwe, tjiri, ounene womihoko vya Kedar mau yanda. 17 Ovakedar mbe tjiwa okurwa nomauta owo omapenda tjinene, nungwari mape hupu tjiva vawo uriri. Ami ngu mbi ri Muhona, Ndjambi wa Israel, mba hungire.”
© Herero Revision Bible © Bible Society in Namibia, 2021.
