Jesus ma yandja ovikurya kovandu omayovi yane
(Mt 15:32-39)1 Moruveze tjingero ndo otjimbumba otjikwao otjinene tja woronganene. Novandu tjinga ave ha ri notjiṋa okurya, Jesus arire tja isana ovahongewa ve na tja ku wo: 2 “Ami me ṱire ovandu mba ondjenda, orondu owo va kara oure womayuva yetatu puna ami, nu kave notjiṋa tji mave ri. 3 Nu tji mbe ve yarura kozoyawo nondjara, ngahino mave wotamene mondjira, orondu tjiva vawo va zire kokure.”
4 Ovahongewa ve ve mu pura ave tja: “Omundu mokuti onguza ngwi ma yenene vi okuyandja ovikurya mbi mavi yenene kovandu avehe mba?”
5 Jesus wa pura a tja: “Eṋe mu nozomboroto ngapi?”
Owo ave ziri ave tja: “Tu nozomboroto hambombari.”
6 Eye wa rakiza kutja otjimbumba tjovandu tji haame pehi. Tjazumba otja toora inḓa ozomboroto hambombari, a tja okuhepa ku Ndjambi, e ze koyora nu e ze yandja kovahongewa ve kutja ve ze haṋe movandu; novahongewa arire tji ve ze haṋa movandu. 7 Owo wina va ri nozohi tjiva ouṱiṱi. Jesus tja za nokuze sera ondaya, wa raera kovahongewa kutja wina ve ze haṋe movandu. 8-9 Ovandu va rya nave kuta. Ovahongewa va wonga outekero mbwa hupa ko nave urisa na wo ovimbamba hambombari. Nu poṋa mbo pa ri ovandu mangara omayovi yane. Tjazumba Jesus arire tje ve hindi okuyaruka kozoyawo. 10 Nu eye wa ronda tjimanga mokayaha puna ovahongewa ve, nu ave i korukondwa rwehi ra Dalmanuta.
Ovafarisei mave ningire otjihimise
(Mt 12:38-42Mt 16:1-4)11 Ovafarisei tjiva ve ya ku Jesus nave utu ozombata kuna ye. Owo ve mu rora amave vanga kutja eye a tjite otjiraisiro tji matji zu keyuru. 12 Nungwari Jesus wa suvana oukoto tjinene momuinyo we na tja: “Ovandu vanambano mave pahere tjike otjiraisiro? Tjiri, me mu raere kutja ovandu mba kavena kupewa otjiraisiro!”
13 Eye we ve esa mbo, a rondo rukwao mokayaha, nu a kondo munda mbwina nomuronga.
Osurise yOvafarisei noya Herodes
(Mt 16:5-12)14 Ovahongewa va zemba okutoora ozomboroto, posi ya imwe uriri ndji va ri na yo mokayaha. 15 Jesus we ve ronga a tja: “Ṱakamiseye nu mu ritjevere nawa kosurise yOvafarisei na wina ku indji oya Herodes.”
16 Owo aave rihungirire nai: “Ma hungire nao mena rokutja katu nomboroto.”
17 Jesus aa tjiwa imbi mbyaa ve hungire, nu otje ve pura nai: “Okutjavi tji mamu rihungirire kutja kamu nomboroto? Ngundee kamuya tjiwa nu kamu nakuzuva are? Omitima vyeṋu omikukutu okuzuva are? 18 Okutjavi mu nomeho nu tji mu hi nokumuna, nu mu nomatwi nu tji mu hi nokuzuva? Kamuna ku zemburuka, 19 indu tji mba koyorera ovandu omayovi yetano ozomboroto ndano? Ovimbamba mbi mwe urisa noutekero wozomboroto mbwa hupire vya ri vingapi?”
Owo va zira nai: “Ovimbamba omurongo na vivari.”
20 Nu “Indu tji mba koyorera ovandu omayovi yane ozomboroto hambombari, ovimbamba mbi mwe urisire noutekero wozomboroto vya ri vingapi?”
Owo va zira ave tja: “Ovimbamba hambombari.”
21 Eye we ve pura a tja: “Nu okutjavi ngamba tji mu hi nokuzuva?”
Jesus ma verukisa omupoṱu mObetsaida
22 Owo ve ya mObetsaida, novandu tjiva ave eta omupoṱu ku Jesus nave riyarikaṋa kutja eye a ṱune ku ye. 23 Jesus wa kambura omupoṱu ngwi keke ne mu nanene pendje yotjihuro. Tjazumba a tjekere omate momeho we, a ṱunu ku wo nomake we ne mu pura kutja: “Mo munu otjiṋa?”
24 Nomupoṱu wa yera omeho a tja: “Me munu ovandu, nungwari owo mave munika tjimuna omiti mbi mavi ka wondja.”
25 Jesus wa ṱuna rukwao nomake we komeho womupoṱu. Otjikando hi omupoṱu ngwi wa uta okumuna nawa, nu tjandje wa veruka. Neye wa uta okumuna oviṋa avihe nawa. 26 Jesus we mu hinda okuyaruka konganda ne mu rakiza atja: “Okahita motjirongo kako.”
Petrus ma hongonona Jesus
(Mt 16:13-20Lk 9:18-21)27 Jesus novahongewa ve va ya kovirongo mbya ri popezu na Kesarea-Filipi. Ngunda averi mondjira eye we ve pura a tja: “Ovandu ve tja ami owami aṋi?”
28 Owo va zira ave tja: “Tjiva ve tja oove Johanes Omupapitise, tjiva ve tja oove Elia, nu tjiva ve tja oove umwe wovaprofete.”
29 Jesus wa pura tja: “Neṋe mu tja ami owami aṋi?”
Petrus wa zira nai: “Oove ngu u ri Omutwirisiwa!”
30 Okuzambo Jesus we ve rakiza nomasa a tja: “Ngaamu roro amu ndji tjiukisa komundu.”
Jesus ma hungire ondatumisire nonḓiro ye
(Mt 16:21-28Lk 9:22-27)31 Jesus wa utire okuhonga ovahongewa ve a tja: “Omuna wOmundu ma sokuhihamisiwa tjinene, nu ma sokunakaurwa i ovanene novapristeri oviuru, nozonongo zomambo. Eye ma ṱu, nungwari kombunda yomayuva yetatu eye ma penduka movakoke.” 32 Otjiṋa hi, eye wa hungira nawa ongahukiro kuna wo. Petrus otja twara Jesus peke, nu a utu okumuronga nomambo. 33 Nungwari Jesus wa tanauka, a tara kovahongewa ve nu a raere Petrus oukukutu na tja: “Yaruka kombunda yandje, Satan, orondu ove ko nakuripura na imbi Ndjambi mbi ma vanga, nungwari mo ripura na imbi ovandu mbi mave vanga!”
34 Tjazumba Jesus wa isanena otjimbumba tjovandu novahongewa ve ku ye na tja ku wo: “Auhe ngu ma vanga okundjikongorera, nge rizembe omuini, a toore otjikoroise tje nu e ndji kongorere. 35 Orondu ingwi ngu ma vanga okuhupisa omuinyo we omuini, me u pandjarisa; nungwari ingwi ngu ma pandjarisa omuinyo we mena randje na mena rOmbuze ombwa, eye me u hupisa. 36 Hapo pe nombatero yatjike omundu okukara noviṋa avihe mouye auhe, nu a pandjarisa omuinyo we? 37 Notjiṋa otjinene tji tja sokuṱeka pomuinyo womundu otjikeṋa? 38 Omundu ngu ma ṱohoṋi na ami nomambo wandje mokati komuhoko mbwi omuhaṱakama nomunauvi, Omuna wOmundu wina ma ṱohoṋi na ye, indu tji ma kotoka mongeṋangeṋeno ya Ihe puna ovaengeri ovayapuke.”
© Herero Revision Bible © Bible Society in Namibia, 2021.
