1 David wa kurupire tjinene, notja ziki omuzandu we Salomo okurira ombara mOisrael.
Oviungura vyOvalevi
2 Ombara David wa woronganisa ovanane avehe vOvaisrael, novapristeri nOvalevi avehe. 3 Eye wa vara ovarumendu Ovalevi avehe, mba ri notjiwondo tjozombura omirongo vitatu nokomurungu. Avehe kumwe va ri 38,000. 4 Ombara ya zika ovandu 24,000 okuungura oviungura vyondjuwo ya Muhona; ovatjangere vouhona novapangure voviposa avehe kumwe va ri 6,000. 5 Wina ya zika ovandu omayovi yane motjiungura tjokutjevera pomivero, nomayovi yane okutanga Muhona amave nyanda ovinangoma ombara mbi ya etera otjiungura hi.
6 David wa haṋa Ovalevi movimbumba vitatu otja kozonganda zawo: Ooya Gerson, noya Kehat, noya Merari.
7 Gerson wa ri novanatje ovazandu vevari: OoLadan na Simi. 8 Ladan wa ri novanatje ovazandu vetatu: OoJehiel na Setam na Joel. 9 Jehiel wa ri novanatje ovazandu vetatu: OoSelomit na Hasiel na Haran; imba omba ri oviuru vyozonganda zozondekurona za Ladan. 10 Simi wa ri novanatje ovazandu vane: OoJahat na Sina na Jeus na Beria otja koviwondo vyawo. 11 Nungwari ooJeus na Beria kava ri nozondekurona ozengi; owo otji va varwa otja ovonganda imwe, novotjiungura tjimwe.
12 Kehat wa ri novanatje ovazandu vane: OoAmram na Jishar na Hebron na Usiel. 13 Omuzandu we otjiveri Amram ongwa ri ihe ya Aron na Moses. Aron nozondekurona ze va toororwa kutja aruhe ve tjevere oviṋa oviyapuke, nokutwimisira Muhona ovyomoro omuwa, nokumukarera nokusera otjiwaṋa ondaya mena re. 14 Nungwari ovazandu va Moses, omukarere wa Ndjambi, va tuwa mokati kOvalevi. 15 Moses wa ri novazandu vevari: OoGersom na Elieser. 16 Omunane mokati kovazandu va Gersom wa ri Sebuel. 17 Elieser wa ri nomuatje omuzandu umwe uriri wena Rehabja; nungwari Rehabja wa ri nozondekurona ozengi.
18 Omuzandu outjavari wa Kehat, wena Jishar, wa ri nomuzandu wena Selomit, otjiuru tjonganda. 19 Nu ingwi outjatatu wena Hebron wa ri novazandu vane: OoJerija na Amarja na Jahasiel na Jekamam. 20 Omuzandu wa Kehat, ingwi outjaine wena Usiel, wa ri novazandu vevari: OoMika na Issija.
21 Merari wa ri novazandu vevari: OoMakli na Musi. Makli wina wa ri novazandu vevari: OoEleasar na Kis. 22 Nungwari Eleasar wa koka e hi novanatje ovazandu, e novakazona porwe. Ovakazona ve va kupwa i ovaramwawo ovazandu va Kis. 23 Omuzandu outjavari wa Merari wena Musi wa ri novazandu vetatu: OoMakli na Eder na Jeremot.
24 Inḓa onḓe ri ozondekurona za Levi otja kozonganda nomaṱunḓu wazo, azehe zawo, nḓa tjangwa omana. Auhe wozondekurona nḓa ngwa ri notjiwondo tjozombura omirongo vivari nokomurungu wa ri notjiungura mondjuwo ya Muhona.
25 David wa tja nai: “Muhona Ndjambi wa Israel wa yandja ohange kotjiwaṋa tje, neye omuini ma tura mOjerusalem nga aruhe. 26 Nambano Ovalevi kave nokuhepa okutjinda Ondanda yOmahakaeneno noviṋa avihe, mbi ungurisiwa momerikotameneno.” 27 Otja komarakiza wa David omasenina Ovalevi avehe ave tjangwa moviungura, tji va vaza otjiwondo tjozombura omirongo vivari. 28 Oviungura vyawo vya ri ovyokuvatera ovapristeri, inḓa ozondekurona za Aron, mokurikotamenena mondjuwo ya Ndjambi, nokutjevera orumbo rwayo nomatuwo wayo, nokuṱakamisa oviṋa avihe oviyapuke kutja avi ha yambururwa. 29 Owo ombe nousemba wOzomboroto zOmaraisiro nḓe yandjwa ku Ndjambi, noworuhere orunḓunḓura rwombunguhiro yovikurya norwomavanda omapapi nge hi nosurise, norwombunguhiro yoviterekwa; wina ombe nousemba woruhere orunḓunḓura ndwa rungwa nomaze womiṋinga, nowokusaneka omurya nondjinda yoviyandjewa vyombunguhiro vyondjuwo ya Muhona. 30 Owo ve sokutanga nokuyozika Muhona omuhuka nongurova aihe, 31 na inḓa ozombunguhiro za Muhona tji maze ningiririsiwa mesabata na mOmukandi wOmatendameno wOmueze, na momikandi vyarwe. Pe nomazikamisiro nge heya kutja Ovalevi vengapi mbu mave ungura otjiungura ihi aruhe. Oviungura vyawo vyoruveze aruhe ovyokurikotamena ku Muhona. 32 Owo ve nousemba wokutjevera Ondanda yOmahakaeneno nondjuwo ya Muhona, nowokuvatera movazamumwe vawo, imba ovapristeri, ozondekurona za Aron, mokurikotameneno mondjuwo ya Muhona.
© Herero Revision Bible © Bible Society in Namibia, 2021.
