Atalja ma rire ombara oserekaze mOjuda
(2Eku 22:10—23:15)1 Atalja, ina yombara Ahasia, tja zuva kutja omuzandu we wa ṱu, otja zepa ovandu avehe veṱunḓu rombara ya Juda. 2 Joas, omuzandu wa Ahasia, erike ongwa poṋa po. Eye wa ri pokuṱa puna ovakwao, nungwari wa yamwa i hongaze Joseba, omusuko wombara Jehoram, omuṱena wa Ahasia. 3 Joseba we mu horeka mondjuwo ya Muhona, ne mu kurisa oure wozombura hamboumwe, Atalja ngunda aa honapara otja ombara oserekaze.
4 Nungwari mombura oitjahambombari Jojada, omupristeri, wa isana ovahongore mbaa ve ṱakamisa ovatjevere vombara na imba ovatjevere vondjuwo youhona, ne ve raere kutja ve ye kondjuwo ya Muhona, eye pe ve yanisira okuitavera komeripura we. Tjazumba we ve raisira Joas, omuzandu wombara Ahasia, 5 ne ve pe omarakiza nga: “Tji mamu ya koviungura mesabata, orukondwa orutjatatu rweṋu ngaru tjevere ondjuwo youhona; 6 norukondwa orutjatatu orukwao ngaru tjevere omuvero Sur, norukondwa indwi orutjatatu orusenina ngaru tjevere omuvero kongotwe yovatjevere ovakwao. 7 Ovimbumba mbi vivari mbi mavi zu moviungura mesabata ngavi katjevere ondjuwo ya Muhona okuyama ombara ndji. 8 Eṋe tjevereye ombara Joas nomangaruvyo momake, nu mu kare puna ye ngamwa akuhe ku ma i. Auhe ngu meya popezu na eṋe nga ṱe.”
9 Ovahongore va kara nonḓuviro komarakiza wa Jojada nave eta ovandu vawo ku ye, okutja imba mbaa ve zu moviungura mesabata na imba mbaa ve i koviungura. 10 Jojada wa yandja omanga notuvao kovahongore, mbya ri ovyombara David nu mbya pwikirwe mondjuwo ya Muhona. 11 Eye wa kuramisa ovarumendu, mba ri nomanga momake, okukondoroka komukuma auhe wokomurungu wondjuwo ya Muhona kutja ve tjevere ombara. 12 Jojada wa pitisa Joas na twa ekori rouhona kotjiuru tje ne mu pe embo romatwako womananeno wouhonapare. Tjazumba Joas otja twirisiwa na zikwa okurira ombara. Novandu va tona ozongwise nave ravaere ave tja: “Ombara ngai hupe orure!”
13 Ombara oserekaze Atalja wa zuva ondokohero ndjiyai tjitwa i ovatjevere novandu; kamanga otja tupuka kondjuwo ya Muhona ku kwa woronganena otjimbumba. 14 Atalja wa muna ombara ombe aya kurama pongunḓe pomahitiro wondjuwo ya Muhona otja tji pe kara. Ombara ombe ndji ya wongarerwa i ovahongore novatone vozohiva, novandu avehe va ravaera nave posisa ozohiva. Atalja wa nyondorora ozombanda ze na ravaere a tja: “Omatjendje! Omatjendje!”
15 Jojada ka vangere kutja Atalja a ṱire popezu nondjuwo ya Muhona; notja rakiza kovahongore votjimbumba tjovita na tja: “Pitisireye Atalja pokati kotuteto twovatjevere, nu zepeye ngamwa auhe ngu ma vanga okumuyama.” 16 Novandu va kambura Atalja, ave mu twara kondjuwo youhona nave kemuzepera pOmuvero wOukambe.
Jojada ma yandisa okukarera ovisenginina
(2Eku 23:16-21)17 Nu omupristeri Jojada wa kondja kutja ombara Joas notjiwaṋa ve tjite omerikutiropamwe na Muhona wokutja mave kara otjiwaṋa tja Muhona; wina wa tjita omerikutiropamwe pokati kombara notjiwaṋa. 18 Notjiwaṋa atjihe otji tja ya kondjuwo onḓere ya Baal nave keihaṋa; owo va nyanyaura ovipunguhiro noviserekarera vyovisenginina, nave zepere Matan, omupristeri wa Baal, momurungu wovipunguhiro.
Wina omupristeri Jojada wa zika ovatjevere kondjuwo ya Muhona. 19 Tjazumba eye novahongore, novatjevere vombara, novatjevere vondjuwo youhona va ṱika ombara kondjuwo ya Muhona okuyenda kondjuwo youhona amave kongorerwa i otjiwaṋa atjihe. Nu Joas wa hitira mOmuvero wOvatjevere na kahaama kotjihavero tjouhona. 20 Otjiwaṋa atjihe tja yoroka, notjihuro tja porimana, Atalja tja za nokuṱira mondjuwo youhona.
21 Joas tja ri nozombura hambombari otja rira ombara mOjuda.
© Herero Revision Bible © Bible Society in Namibia, 2021.
