Elisa nomukazendu Omusunem
1 Elisa wa raera omukazendu ngwa turire mOsunem, ina yomuatje omuzandu Elisa ngwa kotora komuinyo, kutja Muhona ma eta ourumbu mehi mbu mau kara oure wozombura hambombari, nokutja omukazendu ngwi a yende puna eṱunḓu re okukatura ngamwa akuhe kwarwe. 2 Nomukazendu wa zuva komaraerero we na i puna eṱunḓu re okukatura mOfilisti oure wozombura hambombari.
3 Kombunda yozombura hambombari omukazendu ngwi wa kotoka kOisrael, na i kombara okukaningira kutja a kotorerwe ondjuwo ye nehi re rotjikunino. 4 Omukazendu ngwi wa vaza ombara amai hungire puna Gehasi, omukarere wa Elisa; ombara iyai vanga okutjiwa ovihimise vya Elisa. 5 Gehasi ngunda ama serekarerere ombara, indu Elisa tja pendura omundu ngwa koka, omukazendu arire tja munika kombara. Gehasi arire tja tja kombara: “Muhona ombara, omukazendu eye ngwi, nomuatje we omuzandu Elisa ngwa kotora komuinyo.” 6 Nomukazendu wa zira komapuriro wombara ama zeuparisa omambo wa Gehasi; ombara otji ya isana omukarere we ombondo wondjuwo youhona ne mu raere kutja a yarure oviṋa vyomukazendu ngwi avihe puna onḓengu aihe yovihape vye, mbya hapa momahi we wovikunino moure wozombura nḓa hambombari omukazendu ngwi ngunda e ha ri po.
Elisa na Hasael
7 Elisa wa ya kOdamaskus, Benhadad, ombara ya Sirie, tja verere. Nombara tji ya raerwa kutja Elisa wa ri ngo, 8 arire tji ya tja ku Hasael, omukarere wayo umwe: “Twara otjiyandjewa komuprofete nu u ka ningire, a pure Muhona kutja me veruka.” 9 Hasael otja kutira ozongamero omirongo vine noviṋa avihe oviwa, mbi za mOdamaskus, na i ku Elisa. Hasael tja kahakaena na Elisa, wa tja nai ku ye: “Omukarere woye, ombara Benhadad, we ndji hindi okuyekukupura kutja eye ma veruka komutjise we?”
10 Elisa wa zira a tja: “Muhona we ndji tjivisa kutja ombara mai koka; nungwari twende ku yo u keiraere kutja mai veruka.” 11 Elisa wa tara momurungu wa Hasael nomeho omakukutu nga Hasael tja yumana. Mokamanga Elisa otja tetuka okurira. 12 Nu Hasael wa pura a tja: “Muhona, mo ririre tjike?”
Elisa wa zira a tja: “Orondu tjinga ame tjiwa ouvi mbu mo katjita kOvaisrael. Ove mo kahwika ovihuro vyawo mbya zeuparisiwa, no kazepa omitanda vyawo, no kanyanyaura ovanatje vawo, nu mo kaurura ovakazendu vawo ovaṱumba.”
13 Hasael wa zira a tja: “Ami kawami omundu uriri, nu me kara vi omunautwe nai?”
Elisa wa zira na tja: “Muhona we ndji raisire kutja mo karira ombara ya Sirie.”
14 Hasael wa yaruka ku Benhadad neye we mu pura nai: “Elisa wa tja vi?”
Hasael wa zira a tja: “Elisa we ndji raere kutja mo veruka.” 15 Nungwari mependukirwa Hasael wa toora otjirikutjire, e tji tjaveke momeva na sina na tjo ombara nga tji ya koka.
Nu Hasael otja pingena Benhadad okurira ombara ya Sirie.
Jehoram ma rire ombara mOjuda
(2Eku 21:1-20)16 Mombura oitjatano youhona wa Jehoram, omuzandu wa Ahab, ombara ya Israel, Joram, omuzandu wa Josafat, otja rira ombara mOjuda. 17 Eye wa ri notjiwondo tjozombura omirongo vitatu na mbari tja rira ombara, nu wa honapara mOjerusalem oure wozombura hambondatu. 18 Omukazendu we wa ri omusuko wa Ahab. Joram tjinga a ri owomuhoko wa Ahab, wa kongorera ozondjira ozombi zozombara za Israel. Eye wa tura ondjo komurungu wa Muhona, 19 nungwari Muhona ka vangere okunyona Juda, tjinga a kwizikirire omukarere we David kutja ozondekurona ze aruhe maze karerere mouhona.
20 Jehoram ngunda a ri ombara, Ovaedom va sekamena Juda, nave rizikire ombara yawo oveni. 21 Jehoram otja kumuka nomatemba we aehe wovita na i kOsair ovarwe vOvaedom wovita ku ve kevekoverera. Mokati kouṱuku Joram novahongore ve vomatemba wovita va ṋingapara okutaura nokutupuka, novarwe ve wovita va taurira kozonganda zawo. 22 Okuza koruveze ndo Ovaedom otji va kutuka kOvajuda. Moruveze tjingero ndo otjihuro Libna wina otji tje ripora komerikutiro.
23 Oviṋa avihe Jehoram mbya tjita vya tjangwa mEkuruhungi rOzombara za Juda. 24 Jehoram wa koka na pakwa momaendo wouhona mOtjihuro tja David. Nomuzandu we Ahasia we mu pingena mouhona.
Ahasia ma rire ombara mOjuda
(2Eku 22:1-6)25 Mombura oitjamurongo na mbari youhona wa Jehoram, omuzandu wa Ahab, ombara ya Israel, Ahasia, omuzandu wa Joram, otja rira ombara mOjuda. 26 Eye wa ri notjiwondo tjozombura omirongo vivari na mbari, tja rira ombara, nu wa honapara mOjerusalem oure wombura imwe. Ina wa ri Atalja, omusuko wombara Ahab, nomusuko womusuko wa Omri, ombara ya Israel. 27 Ahasia tjinga a ri omukwe wombara Ahab, otja tura ondjo komurungu wa Muhona tjimuna omuhoko wa Ahab tjiyau tjiti.
28 Ombara Ahasia we rikuta kuna Joram, ombara ya Israel, movita okurwisa Hasael, ombara ya Sirie, kOramot mOgilead, nu Joram wa tendwa movita. 29 Joram wa yaruka kOjesreel okukaveruka ovito vye, nu Ahasia wa ya ngo okukemuvarura.
© Herero Revision Bible © Bible Society in Namibia, 2021.
