Okutanga ounongo
1 Purateneye! Ounongo mau isana.
Ozondunge maze ravaere.
2 Kozondomba zozondundu meṋe yondjira
na pomapingasaneno wozondjira ounongo opu wa kurama.
3 Pomahitiro wotjihuro posi yomivero,
owo mau ravaere nomasa, mau tja
4 “Ami me ku ku eṋe, vandu;
me mu isana amuhe kombanda yehi.
5 Eṋe mbu mu hiya punga ozondunge,
ri hongeye kutja mu punge ozondunge.
Eṋe, mayova, rihongeye kutja mu kare nozondunge.
6 Purateneye komambo wandje omawa nomasemba;
avihe mbi me mu raere vi ri osemba,
7 mbi hungira ouatjiri nu mba tonda ouvi.
8 Omambo aehe ngu me hungire owo omasemba;
kape na nge ri posyo poo nge wovisa.
9 Ku ingwi ngu nozondunge owo omakahu;
ku ingwi ngu nondjiviro owo omasemba.
10 Toorora omahongero wandje moruveze rwosilveri;
nu u toorore ondjiviro pongoldo ongohoke.
11 “Ii, ounongo owo ounanḓengu
pomawe omahuze womosengo;
kape notjiṋa tjonḓengu ndji ṱeki poyandje.
12 Owami ounongo, nu mbi nozondunge;
mbi nondjiviro nomeripura omawa.
13 Ondira ku Muhona oyo okutonda ouvi;
ami mba tonda omeritongamisiro nourangaranga,
nongarero youvi nomambo wovizeze.
14 Mbi nozondando ozombwa
nounongo okuzeyenenisa;
mbi nondjiviro nu mbi nomasa.
15 Owami ngu mbi vatera ozombara okuhonapara,
novanane okutjita ozondyero ozosemba.
16 Ovanane avehe kombanda yehi ve
honapara puna ombatero yandje,
ovaingona novapangure ve horera ku ami.
17 Ami mba suvera imba mbe ndji suvera;
nu auhe ngu me ndji paha me ndji munu.
18 Mbi noutumbe nondjozikiro okuyandja,
nouṋingandu nondoṋeno wina.
19 Ovihape mbi mamu munu ku ami,
ovyo ovinanḓengu tjinene pongoldo
ongohoke na posilveri ongohoke.
20 Ami mbi ryanga mondjira yousemba,
nu mbi ramanga omirari vyousemba,
21 okuyandja outumbe ku imba mbe ndji suvera,
nokuurisa ovipwikiro vyawo vyovihuze.
22 “Muhona wa tenga po okundjimema pu avihe,
otja otjiṋa otjitenga tjoviungura vye oruveze orukuru,
23 Eye we ndji memene kombutiro rutengatenga,
ouye ngunda au hiya utwa.
24 Ngunda aku ha ri omakuvare notuharwi tomeva,
tjandje ami mba kwatwa.
25 Ozondundu ngunda aze hiya kara po,
novivanda ngunda avi hiya tuwa poṋa pavyo,
ami tjandje mba kwatwa,
26 Ndjambi ngunda e hiya
mema ehi nomaryo waro,
na indi ehi romakunino.
27 Ami opu mba ri eye tja
zika evaverwa poṋa paro,
na tandavarisa omuruko
weyuru kombanda yokuvare.
28 Ami opu mba ri eye tja
twa ovikamba kevaverwa,
na tja paturura otuharwi twokuvare,
29 na tja rakiza ozongazona kutja
aze ha tanana omikuro vyokuvare,
ami opu mba ri eye tja
zika omazikameno wehi.
30 Mba ri posi ye otja omuungure onongo,
mba ri enyando re eyuva arihe peke,
aruhe ame nyandere momurungu we,
31 ame nyandere apehe mouye we
nambi nondjoroka puna ovandu.
32 “Nambano, vanatje vandje,
purateneye ku ami!
Kareye nonḓuviro komambo wandje,
neṋe mamu rire ovaṋingandu.
33 Purateneye komahongero wandje
namu ye nakaura ko,
neṋe mamu rire ozonongo.
34 Ovaṋingandu imba mbe zuva ku ami,
mbe kara pomuvero wandje eyuva arihe peke,
amave ndji undjire pomahitiro wondjuwo yandje.
35 Ingwi ngu me ndji munu ma munu omuinyo,
nu Muhona ma kara nonyuṋe mu ye.
36 Nungwari omundu ngu he ndji
paha me rihihamisa omuini;
nu ngwe ndji tonda wa suvera onḓiro.”
© Herero Revision Bible © Bible Society in Namibia, 2021.
