1 Ami me ku rakiza oukukutu komurungu wa Ndjambi na Kristus Jesus ngu ma pangura ovanamuinyo novakoke, nu ngu meya okuyekuzika ouhona we, 2 kutja u zuvarise Ombuze ya Ndjambi, u panḓere po, kutja oruveze ndu ri rwo poo ndu he ri rwo, u vyure ovandu, u ve vere nu u ve yanḓiparise tji mo hongo nomuretima auhe. 3 Oruveze maru ya ovandu mu ve hi nokuzara omahongero omasemba, nungwari mu mave kongorere ozonḓero zawo oveni nokuripahera ovahonge mbu mave ve raere imbi mbi mave vanga tjinene okuzuva. 4 Owo mave isa okupuratena kouatjiri nave yandja ombango kovimbaharere. 5 Nungwari ove ritjaera omuini ku avihe mbi, tjinda ondatumisire, ungura oviungura vyoye otja omuzuvarise wOmbuze Ombwa nu u yenenise oviungura vyoye avihe otja omukarere wa Ndjambi.
6 Nami, oiri ya yenene yokutja mbi punguhwe, noruveze orondwi rokutja ami mbi haṋike nomuinyo mbwi. 7 Ami mba rwa otjirwa otjiwa okumana, mba toṋa motjikara tjotjirarakaneno, nu mba panḓera pongamburiro. 8 Nambano pa sewa oruzenga rwondoṋeno ku ami, Muhona, omupangure omusemba, ndu me ndji pe meyuva ndi meya, nu kakutja oku ami porwandje, nungwari wina oku imba avehe mbe undja norusuvero inga omeero we.
Omambo wandje omuini
9 Kondja tjinene okuya ku ami tjimanga. 10 Demas wa uta okusuvera ouye mbwi, notje ndji esa, nu wa i kOtesalonika. Kresens wa ya kOgalatie, nu Titus wa ya kOdalmatie. 11 Lukas erike onguri puna ami. Tji mo ya, eterera Markus, eye onguma sora okundjivatera oviungura. 12 Tikikus mba hinda kOefese. 13 Nu tji mo ya ndji eterera ongwava, ndji mba sya mOtroas poya Karpus; eterera omambo wina, nu tjinene inga nga ungurwa pomikova mbi ku za opergament.
14 Aleksander, omuhambure wovitenda, we ndji tjita ouvi ouingi. Muhona nge mu pangurire imbi mbya tjita. 15 Ove omuini ritjevera nawa ku ye, eye tjinga a pirukira ombuze yetu noutwe.
16 Ami tji mbe riyeura omuini porutenga motjombanguriro, kapa ri omundu ngwa karera ku ami; avehe ve ndji esire. Nu Ndjambi e he ve verere otjiṋa hi! 17 Nungwari Muhona we ndji karera po mu avihe ne ndji pe omasa kutja mbi yenene okuzuvarisa ombuze aihe okuura, ku imba mbe he ri Ovajuda kutja ve zuve. Ami mba yamwa motjinyo tjongeyama. 18 Muhona me ndji yama kouvi ngamwa auhe, nu me ndji hitisa nokuhinatjipo mouhona we womayuru. Neye nga yozikwe aruhe nga ko nga aruhe! Amen.
Ozombinika
19 Minika Priskila na Akuila nonganda ya Onesiforus. 20 Erastus wa kara mOkorinte; nu Trofimus mbe mu esa mOmiletus, eye tjinga a verere. 21 Kondja okuya, okupepera ngunda aku hiye ya. Eubulus na Pudens na Linus na Klaudia mave minike nga kovakambure ovakwetu avehe.
22 Muhona nga kare puna ombepo yoye! Otjari tja Ndjambi ngatji kare na eṋe amuhe!
© Herero Revision Bible © Bible Society in Namibia, 2021.
