Omiano 30 - Herero Revision Bible (HRR)

Omambo wa Agur

1 Inga owo omambo omananḓengu wa Agur, omuzandu wa Jake. Omurumendu ngwi ma tja nai:

“Ami mba kondja na Ndjambi,

ami mba kondja na Ndjambi,

nambano mba pungara.

2 Tjiri, owami eyova tjinene, himundu,

hi nozondunge zomundu.

3 Ami hi rihongere ounongo,

nu mba kaera ondjiviro aihe yaingwi Omuyapuke.

4 Owaṋi ngwe tji rondere keyuru,

tjazumba a heruka rukwao?

Owaṋi ngwe tji wongere ombepo meke re?

Owaṋi ngwe tji kutire omeva mombanda ye?

Owaṋi ngwe tji zikamisire omaandero aehe wehi?

Ena re owaṋi? Nena romuna we owaṋi, ndoovazu mo ve tjiwa?

5 “Embo ngamwa arihe ra Ndjambi oro ouatjiri; eye oruvao ku imba mbe paha omaundiro mu ye. 6 O weza ko embo komambo we kutja eye e he ku tena ne he ku vara otja omunavizeze.”

Omiano omikwao

7 Ami me ku ningire oviṋa vivari, Ndjambi, o ndji rurupara ko ngunda ambi hiya koka: 8 Humburura ovineya novizeze kokure na ami, nu o ndji pe ousyona poo outumbe; ndji parura novikurya mbya yenena mbi me hepa, 9 orondu tji mbe kuta tjinene me ku pataṋa e tja: “Muhona owaṋi” nu tji mba rire omusyona tjapo me rire erunga ne yamburura ena ra Ndjambi wandje.

10 O yamburura omukarere komuhona we kokutja eye e he ku sengi, nove o havererwa otjiṋa hi.

11 Owee korukwato ndu senga ihe naru ha sere ina ondaya, 12 na korukwato ndu rivara oruini kutja orukohoke, nungwari tjandje karuya kohoka kondova yarwo, 13 na korukwato ndu ritongamisa oruini, nu ndu riyera, 14 na korukwato ndu nomayo otja omangaruvyo, notuyeo otja otuvyo okuseseta na vyo ovasyona nokuveramba mehi, nokuseseta na vyo ovahepe nokuveramba movandu.

15 Otjisepambinḓu tji novakazona vevari: “OoNdji pao!” na “Ndji pao!”

Pe noviṋa vitatu mbi he kuta, ii, vine mbi ha tja opuwo,

16 okutja otjovakoke,

nomukazendu ongandji,

nehi ndi ha munu omeva nga yenena,

nomuriro mbu hi na maau tja opuwo!

17 Eho ndi nyekerera ihe, nu nda nyengura ina ngwa kurupa, ra pwa pokutokorwa i omakwara woruronḓu, nokuriwa i ovikuvyona.

18 Pe noviṋa vitatu mbi ri ovihimise ku ami, ii, vine mbi mbi ha tjiwa:

19 Ondjira yonguvi mevaverwa,

nondjira yonyoka kombanda yoruuwa,

nondjira yondjuwoyomomeva mokuvare,

nongaro yorusuvero pokati komurumendu nomukazendu.

20 Ongaro yomukazendu ngu katuka orukupo ya sana ngwi: Tja zu nokukatuka orukupo, u rikoha morutu na tja: “Ami hi tjitire ouvi.”

21 Pe noviṋa vitatu mbi zezerisa ehi, ii, vine ehi mbi ri ha vanga:

22 Omukarere tji ma rire ombara,

neyova tji mari kara novikurya ovingi okurya,

23 nomuyarwakazendu tja kupwa,

nomukarere omukazendu tja yaruka moruveze rwomuhona we oserekaze.

24 Pe noupuka une ouṱiṱi kombanda yehi, nungwari owo ounongo tjinene poviutwa avihe:

25 Ozombuka, ozo kaze nomasa, nungwari mokuṋi ze pwika ovikurya vyazo.

26 Ozohere, ozo kaze nomasa, nungwari ze ungura omaturiro wazo momawe.

27 Ozombahu, ozo kaze nombara, nungwari ze kayenda mouhirona ouwa.

28 Otjikoko, mo yenene okukambura meke roye, nungwari tji kara mozondjuwo zouhona.

29 Pe noviṋa vitatu, mbi risera tji mavi kayenda, ii, vine, mbi risera tji mavi yata:

30 Ongeyama, ndji ri ombanḓe movipuka nu ndji hi notjiṋa i tira.

31 Ohunguriva ondwezu ndji ritongamisa mokati kozonḓenḓu,

nondwezu yongombo, ndji ri ohongora yorupanda,

nombara, ndji ri komurungu wotjimbumba tjayo tjovita.

32 Tji wa ri eyova mokuriyera kwoye, nu tji we ripura nokutjita ouvi, kurama nu ripura. 33 Orondu ove tji wa ṱuku onḓukwa, omaihi ye eta ongondivi; tji wa ṋiṋikiza eyuru, mu pita ombinḓu; nu tji wa pendura omazenge, mo eta ozombata.