Omeriyarikaṋeno kondanaukiro
1 Muhoko omuhinahoṋi, kotoreye ozondunge mu ripure, 2 ngunda amu hiya hingwa nokurimbwa tjimuna ovihozu, nomazenge omandandi wa Muhona ngunda aye hiye ya kombanda yeṋu, neye ngunda e hiye mu raisira omazenge we. 3 Paheye Muhona, oweṋe verisusuparise amuhe mbu mu nonḓuviro komarakiza we. Ramangeye imbi mbi ri ovisemba nu mu risusuparise oveni komurungu wa Muhona. Ngahino mamu taurire omberero meyuva romazenge wa Muhona.
Omasengiro koviwaṋa mbya kondoroka Israel
4 Kape nomundu ngu ma sewa motjihuro Gasa. Askelon matji rire ongaango. Ovature va Asdod mave rambwa mutenya, nu imba Ovaekron mave yandekwa. 5 Owee ku eṋe, Vafilisti, eṋe ovandu mbu mwa tura meṋe yokuvare. Muhona ma eta omberero ye ku eṋe. Eye me mu yandeke, nu kape na umwe ngu ma hupu. 6 Ehi reṋu meṋe yokuvare mari rire okuti kwomaryo ku ku nozondanda zovarise noviunda vyozonḓu. 7 Ovajuda mbu mave sewa po mave kambura ehi reṋu. Owo mave risire mo ozonḓu zawo, nu mave rara mozondjuwo za Askelon. Muhona, Ndjambi wawo me rikendere wo nu meve ṋingaparisa rukwao.
8 Muhona Omunamasaaehe ma tja nai: “Ami mba zuva Ovamoab nOvaamoni amave yamburura namave nyekerere otjiwaṋa tjandje, nu amave rihivi kutja mave kambura ehi ratjo komasa. 9 Tjiri, otja ngu mbi ri Muhona omunamuinyo, Ndjambi wa Israel, ami me yana kutja Ovamoab nOvaamoni mave yandekwa tjimuna Sodom na Gomora. Omahi wawo maye rire otja ovitoto vyomongwa, notja otjitambatundu tjaaruhe mu mwa hapa ozondombora. Imba ovandu vandje mba hupa mave ve pundu oviṋa nave kambura ehi rawo.”
10 Imbwi owo omuhingo ovandu va Moab nova Amon mbu mave verwa na wo mena romeritongamisiro nourangaranga wawo, na mena rokuyamburura otjiwaṋa tja Muhona Omunamasaaehe. 11 Muhona meve tirisa. Eye ma ṱikonaparisa oomukuru avehe vehi kutja ve rire oviṋa uriri, nu tjazumba omuhoko auhe mau rikotamene ku ye, auhe mehi rawo ouini.
12 Muhona wina ma zepa Ovasudan nengaruvyo.
13 Muhona ma tjiti ovyomasa we okuyandeka Asirie. Eye ma tjiti otjihuro Ninive tji rire otjitambatundu, okuti onguza ku ku hi nomeva. 14 Otjo matji rire otjirongo mu mamu wombo otupanda twozonyanda nozongombe novipuka omihokohoko. Ovisiwi mavi tura momatundu watjo, nu avi posire motuiho. Omakwara maye vandarere pomuti womuvero. Omiti vyotupapa twozondjuwo zatjo mavi zukurwa. 15 Imbi ombi mavi tjitwa kotjihuro tji tji ritongamisira ouvara watjo otjini, nu tji tji tjangovasi otjo katji natjipo. Ovandu vatjo ve tjangovasi otjihuro tjawo otji tji ri otjinenenene mouye. Otjo matji rire etundu, otjirongo mu mamu tura ovipuka vyokuti! Omundu auhe ngu ma kapita pu tjo ma hwinḓa nu ma yaukwa.
© Herero Revision Bible © Bible Society in Namibia, 2021.
