Deuteronomium 13 - Herero Revision Bible (HRR)

Omberero kovaprofete vakaseruseru

1 “Tji pa penduka omuprofete poo omumangurure woturoto mokati keṋu na serekarere otjiraisiro poo otjihimise, 2 notjiraisiro poo otjihimise hi tje mu kwizikire nomambo na tji tjitwa, neye motjimbe tjanao a tja nai kove: ‘Ngatu kongorere oomukuru vovisenginina mbu mu he ve i, nu tu ve karere,’ 3 amu puratene komambo womuprofete poo womumangurure woturoto ngwi; orondu Muhona, Ndjambi weṋu, me mu roro a tjiwe kutja mwa suvera Muhona, Ndjambi weṋu, tjiri, nomitima vyeṋu avihe nominyo vyeṋu avihe. 4 Kongororeye Muhona, Ndjambi weṋu, nu mu tireye amamu ṱakamisa omatwako we namamu puratene keraka re nokumukarera, nu panḓereye pu ye. 5 Nungwari omuprofete poo omumangurure woturoto ngwi nga ṱe, tjinga e zuvarisa kutja mu poke ku Muhona, Ndjambi weṋu, ngwe mu pitisire mOengipte ne mu kutura kouhuura; nu omuprofete poo omumangurure woturoto ngwi me mu yepisa mondjira ya Muhona, Ndjambi weṋu, ndje mu rakiza kutja mu ryange mo. Komuhingo mbwi otji mamu isa mo ouvi, mbu ri mokati keṋu.

6 “Nangarire erumbi poo omuangu woye poo omuzandu poo omusuko woye poo omukazendu ngu wa suvera poo epanga roye ropopezu na ove tje ku popo mongumumu, a tja: ‘Ngatu karere oomukuru varwe vovisenginina, ove nooiho mukururume mbu mu he i’ 7 nu umwe wawo tje ku popo okukarera oomukuru vovisenginina voviwaṋa, mbi ri meṋe yeṋu poo vyaimbi mbi ri popezu poo kokure na ove, okuza kotjikoro tjimwe tjehi nga kotjikoro tjarwe, 8 o tjiti ombango ye nokuzuva ku ye. O mu ṱire otjari poo ondjenda, nu o karere ku ye. 9 Mu zepa, tjiri! Ove nga rire ngu wa tenge po okumuveta nomawe; tjazumba otjiwaṋa atjihe tji mu zepe. 10 Mu zepa nomawe, tjinga e ku kondjisa okukupora ku Muhona, Ndjambi woye, ngwe ku pitisa mehi ra Engipte mouhuura. 11 Ovaisrael avehe mave zuu nave tira, nowo kamaave tjiti otjiṋa otjivi tji tja sana ngo rukwao.

12 “Nu ove tji wa tura motjihuro tjimwe Muhona, Ndjambi woye, tji me ku pe, no zuu nai: 13 Ovandu ovehinohepero votjiwaṋa tjeṋu va pukisa ovandu motjihuro tjawo amave tja: ‘Ngatu karere oomukuru varwe vovisenginina, mbu mu hi na mwe ve tjivirwe’ 14 tji wa zuu ombuze otja indji, i konḓonona nokuipura nawa; noyo tji i ri ouatjiri kutja otjiṋa otjivi otja ihi tja tjitwa, 15 zepa ovandu avehe motjihuro ho novinamuinyo vyawo avihe; nu nyona otjihuro ho okumana. 16 Woronganisira ovipundwa avihe pomarandisiro wotjihuro. Nu ningiririsa otjihuro hi novipundwa avihe, mbi ri mu tjo vi rire ombunguhiro ndja yenena ku Muhona, Ndjambi woye; notjo ngatji rire otjitambatundu nga aruhe, nu atji tungururwa rukwao. 17 O rikamburire omuini otjiṋa ngamwa atjihe tji tja sengwa konyoneno kutja Muhona e he ku ṱire omazenge omanene, nungwari e ku tjariparere, eye ma kara notjari na ove ne ku takavarisa otja pa kwizikira ooiho mukururume noruyano, 18 indu tji wa puratene keraka ra Muhona, Ndjambi woye, amo ṱakamisa omatwako we aehe ngu me ku rakiza ndinondi, namo tjiti imbi mbi ri osemba komurungu wa Muhona, Ndjambi woye.