Orukupo karu haṋika
(Mk 10:1-12)1 Jesus tja manene okuhungira omambo nga, wa zire mo mOgalilea na i kehi ra Judea munda mbwina yonḓonḓu Jordan. 2 Otjimbumba otjinene tjovandu tje mu kongorera, neye we ve verukisira mbo.
3 Ovafarisei tjiva arire tji ve ya ku ye nave mu roro amave mu pura nai: “Pa yandjerwa omurumendu okuisa omukazendu we potjiṋa ngamwa atjihe?”
4 Jesus wa zira a tja: “Kamu na pu mwa resere momatjangwa kutja ingwi Omuute wovandu kombutiro we ve utire omurumendu nomukazendu are? 5 Nu Ndjambi wa tjere: ‘Omurumendu opu ma zu okuisa ihe na ina nu a kakatere komukazendu we, nu aveyevari mave rire onyama imwe.’ 6 Owo otji ve he tji na kurira vevari, nungwari otji mave rire onyama imwe uriri. Ihi tji tja kutwa kumwe i Ndjambi ape ha ningi omundu ngu me tji haṋa.”
7 Ovafarisei ve mu purire ave tja: “Okutjavi Moses tja rakizire omurumendu kutja a tjange orutuu rwokuhaṋika nu a ise omukazendu we?”
8 Jesus a ziri a tja: “Moses we mu tjangera omazikamisiro nga mena romikukututima vyeṋu. Nungwari kombutiro katji pa ri nao. 9 Tjiri, me mu raere, omurumendu ngu ma isa omukazendu we potjiṋa tji tji he ri oruvakiro na kupu omukazendu warwe, eye ma katuka orukupo.”
10 Ovahongewa ve arire tji va tja ku ye: “Nu ndovazu ongarero pokati komurumendu nomukazendu i ri nao, okutja ngwari kakokuwa okukupa.”
11 Jesus wa zira a tja: “Omahongero nga ka yomundu auhe ngamwa, nungwari owa imba porwe Ndjambi ke ye yandja. 12 Ovandu tjiva kave kupu tjinga averi nao okuza kongwatero yawo; nu tjiva kave kupu tjinga ava tjitwa nao i ovandu; nu tjiva kave kupu motjimbe tjouhona womayuru. Auhe ngu ma sora okuyakura omahongero nga, nga tjite nao.”
Jesus ma sere ounatje ondaya
(Mk 10:13-16Lk 18:15-17)13 Ovandu va etere ounatje ku Jesus kokutja eye a yambeke omake ku wo ne u kumbire, nungwari ovahongewa va tjeverere nomasa tjinene imba mbaa ve u eta. 14 Jesus wa tja: “U eseye ounatje u ye ku ami nu amu u tjaere, ouhona womayuru tjinga au ri owaimba mbe ri nao.”
15 Eye wa yambekere omake ku wo, na rire tja i.
Omuzandona omutumbe
(Mk 10:17-31Lk 18:18-30)16 Otjikando tjimwe kwe ere omundu ku Jesus ne mu pura a tja: “Muhonge, otjiṋa otjiwa tji me sokutjita otjikeṋa kutja mbi mune omuinyo waaruhe?”
17 Jesus wa zirire a tja: “Okutjavi tji mo ndji pura kutja otjiṋa otjiwa otjikeṋa? Pena umwe porwe eye ngu ri omuwa! Nungwari tji movanga okuhita momuinyo waaruhe, ṱakamisa inga omatwako.”
18 Eye wa pura a tja: “Omatwako ngu mo hee ooyeṋe?”
Jesus a ziri a tja: “Ko nakuzepa ko; ko nakukatuka ko orukupo; ko nakuvaka ko; ko nakuhungirira ko omukweṋu omahongononeno wovizeze; 19 yozika iho na nyoko; nu suvera omukweṋu otja tji we risuvera omuini.”
20 Omuzandona arire tja ziri a tja: “Omatwako aehe nga ami mbe ye ṱakamisa. Otjikwaye tji me hepa okutjita?”
21 Jesus a ziri a tja: “Tji movanga okurira omusore nomupwe, karandise avihe mbi u na vyo, nu imbi ovimariva u kayandje kovasyona, nove mo kara notjihuze meyuru; okuzambo kotoka u ye kundjikongorera.”
22 Omuzandona tja zuva omambo nga wa ya e noruhoze, eye tjinga a ri omutumbe tjinene.
23 Jesus arire tja tja kovahongewa ve: “Tjiri, memu raere kutja ma rire ouzeu tjinene kovatumbe okuhita mouhona womayuru. 24 Me yarukire po rukwao kutja oupupu tjinene kongamero okuhitira mondovi yonane pomutumbe okuhita mouhona wa Ndjambi.”
25 Ovahongewa tji va zuva omambo nga va himwa tjinene na rire tji va pura ave tja: “Nu nambano ngu ma sora okuyamwa owaṋi?”
26 Jesus we ve tara osemba na ziri a tja: “Otjiṋa hi ovandu matji ve uru, nungwari Ndjambi ke notjiṋa tji tje mu ura.”
27 Poṋa mbo Petrus wa hungira a tja: “Tara, eṱe twa isa oviṋa avihe natu ku kongorere, nu matu munine po tjike?”
28 Jesus arire tja tja ku wo: “Tjiri, me mu raere, ouye tji wa yarurwa koupe, indu Omuna wOmundu tja haama kotjihavero tjouhona tjounene we, eṋe mba omurongo na vevari mbu mu ri ovakongorere vandje wina mamu ka haama kovihavero vyouhona okuhonaparera imbi omihoko omurongo na vivari vya Israel. 29 Nu auhe ngu ma isa onganda ye poo omarumbi novangu ve novaṱena poo ihe poo ina poo ovanatje ve poo omahi we womakunino motjimbe tjandje eye ma munine po ovingi potumasere nu a karumata omuinyo waaruhe. 30 Nungwari ovengi nambano mbe ri ovatenga mave karira ovasenina, novengi nambano mbe ri ovasenina mave karira ovatenga.
© Herero Revision Bible © Bible Society in Namibia, 2021.
