Jesaja 31 - Herero Revision Bible (HRR)

Ndjambi ma yama Jerusalem

1 Owee ku imba mbu mave i kOengipte okukakwa ombatero! Owo ve riyameka kotjimbumba otjinamasa otjinene tjOvaengipte tjovita, okutja oukambe nomatemba wovita, novarwe wovita ovakavire. Nungwari kave riyameke ku Muhona, Omuyapuke wa Israel, nu kave ningire ombatero ku ye. 2 Eye ma tjiwa kutja ma tjiti vi. Ma hindi otjiwonga. Eye ma yenenisa omatandero we okuvera ovatjite vouvi na imba mbe ve yama. 3 Ovaengipte owo ovandu uriri, ka Ndjambi; oukambe wawo onyama, kambepo. Muhona tja tjiti otjiṋa, otjiwaṋa otjinamasa matji putara, notjiwaṋa otjingundi tji matji vaterwa matji u wina. Oviwaṋa aviyevari mbi mavi yandekwa.

4 Muhona wa tja ku ami: “Nangarire kutja ovarise mave uru nokuravaera kamaave tirisa ongeyama potjinamuinyo tji ya zepa; momuhingo tjingewo kape notjiṋa tji matji tjaere ami, Muhona Omunamasaaehe, okuyama ondundu Sion nondomba yayo. 5 Otja ozonḓera punga aze tengerera oviruwo vyazo okuyama ouzerona wazo, ami, Muhona Omunamasaaehe, opunga ame yama Jerusalem nokutjivandeka nokutjiyeura.”

6 Muhona wa tja: “Tjiwaṋa tja Israel, eṋe mwa tura ondjo komurungu wandje, nu mwe ndji pirukira. Nungwari nambano kotokeye ku ami! 7 Oruveze maru ya eṋe amuhe mu mamu nakaura oviserekarera vyoomukuru vovisenginina, mbi mwa ungura posilveri na pongoldo nomake weṋu omanaurunde. 8 Ovaasirie mave ṱengaruvyo, nungwari ndi he ri oromundu. Owo mave taura motjirwa, nomitanda vyawo mavi isiwa po ovakarere. 9 Ombara yawo mai tupukisiwa i omburuma, novahongore vawo mave tira tjinene nai nga tji mave isa omarapi wawo wotjihako.” Muhona wa hungire, Muhona womuriro mbu yaka kOsion, nu wotjipunguhiro tji tji ri mOjerusalem.