Oviyandjewa vyOmbepo
1 Ramangeye orusuvero. Nu zereye oviyandjewa vyOmbepo, nu tjinene ingwi okuzuvarisa ombuze ya Ndjambi. 2 Ingwi ngu hungira omaraka pekepeke eye ka hungirire ovandu, nungwari u hungirira Ndjambi, tjinga ape hi na ngu me mu zuu nawa. Eye u hungira omaundikiro nomasa wOmbepo. 3 Nungwari ingwi ngu zuvarisa ombuze ya Ndjambi u hungirira ovandu, nu u ve tunga nomayanḓiparisiro nomahuhumiṋino. 4 Ingwi ngu hungira omaraka pekepeke eye u ritunga omuini, nungwari ingwi ngu zuvarisa ombuze ya Ndjambi eye u tunga ombongo aihe.
5 Ami etje vanga kutja eṋe amuhe mu hungire omaraka pekepeke, nungwari tjinene etje vanga kutja mu zuvarise ombuze ya Ndjambi. Orondu ingwi ngu zuvarisa ombuze ya Ndjambi eye omunanḓengu tjinene komeho okukapita ingwi ngu hungira omaraka pekepeke, pendje na indu tji pe nomundu ngu ma sora okutoroka omambo we, kokutja momuhingo mbwi ombongo aihe i sore okutungwa. 6 Nu, vakwetu, ami tjinangara meya ku eṋe, me mu vatere na tjike tji me hungire omaraka pekepeke. Tji me mu vatere, karondu porwe tji me mu vandururire omauatjiri wa Ndjambi poo tji me mu etere ondjiviro poo ombuze ya Ndjambi poo omahongero?
7 Ripureye novihumba tjimuna ohiva notjiharpe. Tji vi hi nokueta ozombosiro pekepeke, mape tjiukwa vi kutja ombosiro ndji mai pose oyohiva poo oyotjiharpe? 8 Ohiva tji i hi nokueta ombosiro ongahuke, ndji tjiukwa, owaṋi ngu me rirongerere ovita? 9 Nu momuhingo tjingewo eṋe tji mamu hungire omambo momaraka nge hi nokuzuvaka nawa, owaṋi ngu ma zuu kutja mamu tja tjike? Okutja mamu hungire omambo womungandjo ngu maye twarewa i ombepo! 10 Mouye mu nomaraka omengi pekepeke, nu kape na nangarire rimwe ndi hi na tji mari hee. 11 Nungwari ami tji mbi hi nokutjiwa eraka ndi mari hungirwa, ingwi ngu ma hungire ro ku ami eye omundu wozonganda, nami wina ku ye owami owozonganda. 12 Nu wina ku eṋe otjinga ape ri nao. Tji mamu ramangere okupewa oviyandjewa vyOmbepo, kondjereye okumuna kombanda yaavihe imbi mbi vatera okutunga ombongo.
13 Ingwi ngu ma hungire omaraka pekepeke, u sokukumbira otjiyandjewa tjokutoroka omaraka nga. 14 Orondu tji me kumbu momaraka nga, ombepo yandje ondji mai kumbu, nungwari ozondunge zandje kaze norupa mongumbiro ndji. 15 Nu tjiperi nao, ami me tjiti vi? Ami me kumbu nombepo yandje, nu wina me kumbu nozondunge zandje; me imbura nombepo yandje, nu wina me imbura nozondunge zandje. 16 Tji mo kumbu ongumbiro yokutja okuhepa ku Ndjambi mombepo uriri, ingwi ngu ri puna ove mbo ma sora vi okutja “Amen” kongumbiro yoye yondangero? Omambo nga ove ngu wa hungire eye ke ye zuvire nu! 17 Ii, ongumbiro yoye yondangero ku Ndjambi oyo ombwa, nungwari ingwi omukweṋu kai nakuvatera.
18 Ami me tja okuhepa ku Ndjambi kutja mbi hungira omaraka pekepeke okukapita eṋe amuhe. 19 Nungwari momerikotameneno wombongo ami me ṱokuhungira omambo yetano ngu maye zuvaka kutja mbi honge ovakwetu, komeho yokuhungira omambo omayovi omurongo momaraka pekepeke.
20 Vakwetu, momeripura weṋu amu kara ko otja ovanatje! Nu mozondjito zeṋu kareye otja ovanatje ovehinandjo, nungwari mouripura weṋu mu ngare mwe kura. 21 Momatjangwa mwa tjangwa nai:
“Ami me hungire notjiwaṋa tjandje momaraka warwe
notjinyo tjovandu wozonganda,
nungwari nandarire nao otjo katji nakundjizuva,
Muhona ma tja nao.”
22 Punao, otjiyandjewa tjokuhungira momaraka pekepeke otjiraisiro ku imba mbe ha kambura, nu ka ku imba mbe kambura, nu wina otjiyandjewa tjokuzuvarisa ombuze ya Ndjambi otjiraisiro ku imba mbe kambura, nungwari ka ku imba mbe ha kambura.
23 Nombongo aihe tji ya worongana, nu auhe a utu okuhungira momaraka pekepeke, nu tji pa hiti ovayenda mongamburiro poo ovahakambura, owo kamaave tja eṋe mwa vera oviyoze are? 24 Nungwari avehe tji mave zuvarisa ombuze ya Ndjambi, nu tji pa hiti omuhakambura poo omuyenda mongamburiro, u sokurimuna kutja eye, tjiri, omunandjo, tji ma puratene komazuvasirio nga; neye ma pangurwa i imbi mbi ma zuu. 25 Ouripura we ouhorekwa womomutima otji mau horoka, neye otji ma u kozongoro ne rikotamene ku Ndjambi ama hongonona nai: “Tjiri, Ndjambi u ri mba mokati keṋu!”
Ouhirona mombongo
26 Nambano pe sokukara vi, vakwetu? Eṋe aruhe tji mamu worongana, auhe weṋu u kara notjiṋa okutjita: Okuimbura eimburiro, okuhonga, okuvandurura omauatjiri wa Ndjambi, okuhungira omaraka pekepeke nokutoroka imbi mbya hungirwa. Avihe mbi ngavi tjitirwe okutunga ombongo. 27 Nu tji pena ngu ma hungire omaraka, tjinene nga rire ovandu vevari poo vetatu, nu ve pasane otuveze; nu ngape kare warwe ngu ma toroka imbi mbya hungirwa. 28 Nu tji pe hi nomutoroke, ingwi ngu hungira omaraka pekepeke nga mwine mombongo, nu koye a rire ke kerihungirira omuini ku Ndjambi. 29 Nu imba mba pewa ombuze i Ndjambi, vevari poo vetatu ngave hungire, nu imba ovakwao ve sosonone omambo wawo. 30 Nu ngahino umwe ngwa haama mombongo ma pewa ombuze ya Ndjambi; ingwi ngwa vazewa ama hungire, nga mwine. 31 Eṋe amuhe mamu sora okuzuvarisa ombuze ya Ndjambi, nungwari nga rire koumweumwe, kokutja avehe mba wongara mbo ve rihonge nu ve panḓiparisiwe. 32 Ingwi ngwa pewa okuzuvarisa ombuze ya Ndjambi, nge ritjaere omuini momambo we. 33 Orondu Ndjambi tje he ri Ndjambi wouhazendu, nungwari eye tje ri Ndjambi wouhirona nowohange.
Notja tjinga ape ri mozombongo azehe zovakambure, 34 ovakazendu ve sokumwina mozombongarero zeṋu. Owo kave yandjererwe okuhungira, nungwari ngave riwise kehi otja Omatwako punga amaye hee. 35 Nowo tji mave vanga okutjiwa nawa otjiṋa ongahukiro, ngave kapure kovarumendu vawo kozoyawo; orondu ondjambu ovakazendu okuhungira mombongo.
36 Indu embo ra Ndjambi ra zire mu eṋe are? Poo oro re ya ku eṋe porweṋu? 37 Nu tji pe nomundu ngu me ritjangovasi eye omuhindwa wa Ndjambi poo eye u nOmbepo ya Ndjambi, nga tjiwe nawa kutja imbi mbi me tjanga ku eṋe ovyo omarakiza wa Muhona. 38 Neye tje hi na ko na tja nomarakiza wa Muhona nga, Ndjambi wina ke nokukara ko na tja na ye.
39 Nu, vakwetu, kareye nonḓero yokuzuvarisa ombuze ya Ndjambi, nungwari ingwi okuhungira omaraka pekepeke amu ku tjaere ko. 40 Avihe ngavi tjitwe momuhingo omuwa na mouhirona.
© Herero Revision Bible © Bible Society in Namibia, 2021.
