Maleaki 3 - Herero Revision Bible (HRR)

1 Muhona Omunamasaaehe ma ziri nai: “Tara, ami me hindi omuhindwa wandje kutja a ṱune ondjira komurungu wandje! Nu Muhona ngu mamu paha otji meya tjimanga kondjuwo ye. Nomuengeri womerikutiropamwe wandje ngu mamu zeri u ri pokuya.”

2 Nungwari owaṋi ngu ma yenene okurikukutisa meyuva eye ndi meya? Nowaṋi ngu ma yenene okuhupa eye tje ya? Eye ma sana komuriro womuhambure na komeva nga hara esuzu. 3 Eye meya okupangura otja umwe ngu hambura nokukohorora osilveri. Eye ma kohorora ovapristeri tjimuna osilveri nongoldo tji vi zuzurwa kutja vi kohoroke. Notji mave punguhire Muhona ozombunguhiro komuhingo omusemba, 4 nozombunguhiro nḓu maze punguhirwa Muhona i ovandu va Juda nova Jerusalem maze rire ozonanyuṋe ku ye otja punga apa ri rukuru.

5 Muhona Omunamasaaehe ma tja nai: “Ami meya ku eṋe okumupangura; nu kamanga ami otji me hongononene ozondjai novakatuke wotukupo, na imba mbe kora ovizeze, na imba mbe tjita ovineya kovakarere vawo pomasutiro wozondjambi zawo, na imba mbe ṋiṋikiza ovahepundu nozosewa novozonganda, okutja owo mba avehe mbe he ndji yozike.

Omasutiro wotjitjamurongo

6 “Ami, ngu mbi ri Muhona, hi runduruka; neṋe mbu mu ri ozondekurona za Jakob, ingee otji mu hiya hangauka. 7 Okuza komayuva wooiho mukururume mwa humburuka nomatwako wandje namu he ye ṱakamisa. Ritanaurireye ku ami, nu ami otji me tanaukire ku eṋe. Nungwari eṋe mamu pura nai: ‘Ngatu tanaukire tjike?’ 8 Osemba nao okutikura Ndjambi are? Kako! Nungwari mamu ndji tikura. Mamu pura nai: ‘Tu ku tikura vi?’ Omoviṋa vyotjitjamurongo na moviyandjewa vyozombunguhiro. 9 Osengiro ya tuwa ku eṋe amuhe, orondu eṋe amuhe, ihi otjiwaṋa atjihe, mamu ndji tikura. 10 Eteye otjitjamurongo atjihe kondjuwo ya Muhona Omunamasaaehe kutja mu kare ovikurya ovingi mu yo. Nu ndji roreye kutja nani me mu patururire otuiho tweyuru nokumutiririra ondaya onyingi tjinene. 11 Ami wina me mu tjaerere ozombahu kutja aze ha nyono ovihape vyovikunino vyeṋu, nokutja ovikunino vyeṋu vyomivite vi kare nomandjembere omengi. 12 Nomihoko avihe otji mavi tanga ouindandu weṋu, ehi reṋu tjinga amari rire ewa okutura mo.” Muhona Omunamasaaehe ongwa hungire.

Omakwizikiro wotjari tja Ndjambi

13 Muhona ma tja nai: “Eṋe mwa hungira omambo omakukutu ku ami. Nungwari mamu pura nai: ‘Eṱe twa hungira tjike kove?’ 14 Eṋe mwa tja nai: ‘Okukarera Ndjambi kahepero. Nu mape tu vatere tjike okuṱakamisa omazikamisiro we nokuryanga atwa pirike komurungu wa Muhona Omunamasaaehe? 15 Nambano tu hivirika ouindandu wa imba ovirangaranga mbe zemba Muhona; ovatjite vouvi aruhe kave munu ouṋingandu porwe, nungwari tjinene ve kara nokuhinokuverwa, andarire kutja ve rora onḓaro orure ya Ndjambi.’ ”

16 Ovandu mbe nondira ku Muhona otji verihungirire oveni ave tja, nu Muhona wa puratena na zuu imbi mbyaa ve hungire. Nu momurungu we pa tjangwa embo romazemburukiro ku imba mbe nondira ku ye nu mbe yozika ena re. 17 Muhona Omunamasaaehe ma tja nai: “Meyuva ndo ami tji me yenenisa oviṋa mbi owo mave rire ouini wandje omuini. Nami meve tjariparere otja ihe tjinga e tjariparera omuzandu we ngu mu karera. 18 Nu eṋe rukwao otji mamu munu ombangu ndji ri pokati komusemba nomunauvi, na pokati kaingwi ngu karera Ndjambi na ingwi ngu he mu karere.”